Skip to content

Skip to table of contents

Nduwe Uulisalila Buumi Mbuyoopona Kunembo!

Nduwe Uulisalila Buumi Mbuyoopona Kunembo!

NDUWE UULISALILA NA BUUMI MBUYOOPONA KUNEMBO? Bamwi bantu basyoma kuti zintu zichitika mubuumi bwabo zyakabambwa kale akuti tabalisalili pe. Chiindi nibakachilwa kuzuzikizya zipeekezyo zyabo tabalikataazyi pe. Baamba kuti, “Teenzindakabambilidwe pe.”

Bamwi balakonzya kumana manguzu akaambo kakubona kuti taakwe muntu uukonzya kumana kudyaaminina akutalulamisya kuvulide munyika. Nikuba kuti baleezya kuchita zintu zilikabotu pesi zintu zili mbuuli nkondo, kuvula kwamilandu, malwazi amapenzi aalichitikila zilikubakachizya kuti bazuzikizye zipeekezyo zyabo. Ngabalibuzya kuti ‘Ndilikataazizyaanzi?’

Nisimpe kuti zintu zichitika mubuumi zilakonzya kupa kuti tukachilwe kuzuzikizya zipeekezyo zyesu. (Mukambausi 9:11) Nikuba boobo, tulakonzya kulisalila buumi mbutuyanda kuyoopona kunembo. Bbayibbele litondeezya kuti buumi bwakunembo buyeeme munzila muntu njasalaayo. Langa-langa nzilyaamba.

MaIsrayeli nibakali baba afwiifwi kunjila Munyika Yachisyomezyo, Musa wakabalayilila kuti: “Buumi alufu, lulongezyo alutuko, zyoonse ndazibika kuti mulisalile. Amusale buumi, kuti mupone, nywebo abana banu. Amuyandisye Jehova Leza wanu, amuswiilile ijwi lyakwe, amumukakatile.”Deuteronomo 30:15, 19, 20.

“Buumi alufu, lulongezyo alutuko, zyoonse ndazibika kuti mulisalile. Amusale buumi.”—Deuteronomo 30:19

Leza wakafutula maIsrayeli kuzwa kubuzike kuEgepita alubo wakabasyomezya kuti bakali kuyoopona buumi bulikabotu Munyika Yachisyomezyo. Pesi bakeelede kuchita zimwi zintu kuti bajane zilongezyo eezyo. Bakeelede ‘kusala buumi.’ Bakali kuyoozichita biyeni? Kwiinda ‘mukuswiilila jwi lyaLeza akukakatila kulinguwe.’

Andiswe mazubaano tweelede kulisalila buumi mbutuyanda kuyoopona kunembo. Ulakonzya kusala kuyoopona buumi butamani muparadayizi aanyika kuti wayanda Leza, waswiilila jwi lyakwe akukakatila kuli nguwe. Pesi eezi ziswaanizyaanzi?

SALA KUYANDA LEZA

Luyando mbube bwaLeza buyandikana. Mwaapostolo Johane kazulwidwa amuuya uusalala wakalemba kuti, “Leza nduluyando.” (1 Johane 4:8) Nkinkaako, chiindi Jesu naakabuzigwa mubuzyo wakuti nguuli mulawu mupati wakati: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” (Matayo 22:37) Tweelede kuyanda Jehova kazizwa aansi aamoyo kutali kuupawupa ameso. Nkamboonzi nitweelede kumuyanda?

Jehova ulabayanda bantu mbuuli bazyali mbubachita bana babo. Nikuba kuti bazyali tabamaninide pesi bayanda kuti bana babo babotelwe mubuumi, nkinkaako balabalaya, balabalumbayizya alubo balabagwasilizya. Pesi bazyali balangililaanzi kubana babo? Bayanda kuti bana babo babayande akuti baswiilile nzibabayiisya nkaambo zilabagwasya. Zilaantanganana kuti tweelede kuyanda Ndeende wesu wakujulu nkaambo utuchitila zintu zyiingi.

 SWIILILA JWI LYAKWE

Kweendelana ambulibelesedwe muBbayibbele, bbala lyakuti “kuswiilila” liswaanizya “kuchita” zintu nzwaabuzigwa. Teenzizyo na nzitwaamba chiindi nitubuzya bana kuti, “Amuswiilile bazyali banu”? Nkinkaako, kuswiilila jwi lyaLeza chaamba kwiiya nzyayanda akuzichita. Nikuba kuti tatukonzyi kumvwa Leza kalikwaambuula pesi tulakonzya kumuswiilila kwiinda mukubala akubelesya zili muJwi lyakwe Bbayibbele.—1 Johane 5:3.

Jesu wakatondeezya mbukuyandikana kuswiilila Jwi lyaLeza naakati: “Teensi insima ilike njaaponena muntu, ulaponena amajwi oonse aazwa kumulomo wa-Leza.” (Matayo 4:4) Mbukunga chakulya chakumubili chilatugwasya, kuba aluzibo atala aLeza kulatugwasya. Kutugwasya biyeni? Mwaami musongo Solomoni wakati: “Busongo bulatabilila mbubonya mbuli mali mbwaatabilila, aluzibo lulagwasya nkaambo busongo bulavuna buumi bwabaabo babujisi.” (Mukambausi 7:12) Luzibo abusongo zizwa kuli Leza zilakonzya kutukwabilila mazubaano alubo zitugwasya kuti tusale munzila iyoopa kuti tukajane buumi butamani kunembo.

KUKAKATILA KULI NGUWE

Yeeya chikozyano chaJesu nchitwakiiya muchiiyo chayinda chili amajwi aati: “Mulyango uumanikide anzila iipatide njiitola kubuumi, nkabela abo biijana mbace.” (Matayo 7:13, 14) Kweenda munzila eeyi kuyootugwasya kuti tukkale katuli afwiifwi amuzulwidi mupati alubo kuyoopa kuti tukajane buumi butamani. Nkinkaako, tweelede kukkala katuli abweenzuma bulikabotu aLeza. (Intembauzyo 16:8) Kujana twazichita biyeni eezi?

Buzuba abuzuba kuli zintu zyiingi nzitweelede kuchita anzituyanda kuchita. Zintu eezi zilakonzya kupa kuti tubule chiindi chakuyeeyesesya atala azintu Leza nzyayanda kuti tuchite. Nkinkaako, Bbayibbele litubuzya kuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.” (BaEfeso 5:15, 16) Kubikka zintu zyabukombi mubusena bwakusaanguna kupa kuti tube abweenzinyina bulikabotu aLeza.—Matayo 6:33.

NDUWE UULISALILA

Nikuba kuti tukonzyi kuchincha zintu zyakachitika chiindi pesi ulakonzya kusala kuyoopona buumi bulikabotu kunembo. Bbayibbele litondeezya kuti Ndeende wesu wakujulu Jehova ulatuyanda alubo litubuzya nzyayanda kuti tuchite. Musinsimi Mika wakaamba kuti:

“Wakutondezya, O muntu, cintu cibotu mbucibede. Taakwe cintu cimbi Jehova ncayanda kulinduwe, pele kucita bululami akuyanda luzyalo akweenda cakulibombya a-Leza wako.”Mika 6:8.

Uyooswiilila Jehova na kuti ukajane zilongezyo nzyaakasyomezya aabo bamuswiilila? Nduwe uulisalila!