Skip to content

Skip to table of contents

Nziizili Zintu Leza Nzyaakachita?

Nziizili Zintu Leza Nzyaakachita?

Kuti kuyanda kumuziba kabotu umwi muntu, weelede kuziba nzyaakachita abuyumu-yumu mbwaakazunda. Mbukubede akuli Leza, kuti kuyanda kumuziba kabotu, weelede kuziba zintu nzyaakachita. Kuti wachita oobo uyoobona mbuzikugwasya zintu nzyaakachita ambuziyookugwasya kunembo.

LEZA WAKALENGA ZINTU ZYOONSE KUTI ZITUGWASYE

Jehova Leza Mulengi Mupati alubo “kuzwa kumalengelo aanyika makani aakwe atabonwi alaboneka kukumvwigwa kuncito zyakwe, nkukuti inguzu zyakwe abu-Leza bwakwe zitamani.” (BaRoma 1:20) “Nguwe iwakalenga nyika kunguzu zyakwe, iwabamba luwa mubusongo bwakwe, akutandabika majulu mumaanu aakwe.” (Jeremiya 10:12) Bubotu bwazintu zyakalengwa aaLeza butondeezya kuti ulatuyanda.

Atubone Jehova mbaakatondeezya kuti ulatuyanda kwiinda mukutulenga “mucinkozya cakwe.” (Matalikilo 1:27) Wakatulenga munzila yakuti tukonzye kutobelezya buntu bwakwe busumpukide nikuba kuti tatukonzyi kuchita oobo chakumaninina. Wakatulenga katuli achiyandisyo chakukomba naakuti kubona zintu mbuuli mbazibona akuziba milawu yakwe yakulijata. Kubona zintu mbuuli mbazibona akulijata kutugwasya kuti tubotelwe mubuumi. Kwiinda zyoonse wakapa kuti tukonzye kuba abweenzinyina bulikabotu anguwe.

Zintu zituzyungulukide zyakalengwa aaLeza zitondeezya kuti ulatuyanda. Mwaapostolo Pawulu wakaamba kuti, Leza “takalekede kulilungulula walo, mbwaakachita kabotu akumupa imvula eziindi zyazilyo izizwa kujulu, wazuzya myoyo yanu kulya akubotelwa.” (Incito 14:17) Jehova utupede zintu zyiingi zitugwasya kuti tupone. Wakatupa zintu zisiyene-siyene kuchitila kuti tubotelwe mubuumi. Pesi zintu eezi nziche loko kuti twazikozyanisya azintu nzyaakali kuyanda kutupa.

 Jehova wakalenga nyika kuti ibe muunzi wabantu kukabe kutamani. Bbayibbele lyaamba kuti: “Nyika wakiiaba kubana babantu” alubo “teewakayilenga kuti ibe yalupilingano pe, wakaibumba kuti ikalwe bantu.” (Intembauzyo 115:16; Isaya 45:18) Mbantu bali biyeni batakakkale aanyika alubo bayookkala kwachiindi chilamfu biyeni? Bbayibbele liti: “Balulami bayookona nyika, bayookala alinjiyo lyoonse.”—Intembauzyo 37:29.

Jehova wakalenga mwaalumi amwanakazi bakusaanguna Adamu aEva, akubabikka mumuunda waEdeni kuti ‘bawulime akuubamba.’ (Matalikilo 2:8, 15) Leza wakabapa milimu iibili iibotezya, wakati: “Amuzyalisye, muvule, muzuzye nyika akwiibombya.” (Matalikilo 1:28) Adamu aEva bakali achilongezyo chakupona kababotelwa kukabe kutamani aanyika. Zilawusisya kuti bakasala kutaswiilila Leza alubo zyakapa kuti batabi aakati ‘kabalulami bayookona nyika.’ Mbuuli mbutuyoobona, kubisya kwabo teekwakapa kuti makanze aaLeza atala abantu anyika atazuzikizigwi. Atusaangune kubona chimwi chintu nchaakachita Leza.

LEZA WAKATUPA JWI LYAKWE

Bbayibbele ndiJwi lyaLeza. Nkamboonzi Leza naakatupa Bbayibbele? Chakusaanguna, uyanda kuti twiiye atala anguwe. (Tusimpi 2:1-5) Nisimpe, Bbayibbele talisanduli mibuzyo yoonse njitulaayo atala aLeza alubo taakwe limwi bbuku likonzya kusandula mibuzyo njitulaayo. (Mukambausi 3:11) Zintu zilembedwe muBbayibbele zitugwasya kuti tumuzibe Leza. Nzila njakabajataayo bantu bachiindi itugwasya kuziba buntu bwakwe. Bbayibbele litugwasya kubona zintu zipa kuti atuyande akuti atatuyandi. (Intembauzyo 15:1-5) Lituyiisya mbutweelede kumukomba, mbutweelede kulijata ambutweelede kububona bunoti. Tulakonzya kuziba buntu bwaLeza kwiinda muzintu nzyakaamba anzyaakachita Mwanaakwe Jesu Kristu.—Johane 14:9.

Chintu chachibili chakapa kuti Jehova atupe Jwi lyakwe Bbayibbele nchakuti uyanda kuti tupone buumi bulikabotu butakwe mapenzi. Bbayibbele litugwasya kubona mbutukonzya kubotelwa mumpuli, kukkutisikana mubuumi ambutukonzya kulwana mapenzi. Alubo mbuuli mbutuyoobona muzyiiyo zilikunembo mumagazini eeyi, Bbayibbele litugwasya kujana nsandulo zyamibuzyo iikataazya iili mbuuli yakuti: Nkamboonzi munyika nikuvulide mapenzi? Mazuba aalikunembo anooli biyeni? Alubo Bbayibbele litondeezya zintu Leza nzyaakachita kuti makanze aakwe azuzikizigwe.

Kuli zintu zyiingi zitondeezya kuti Bbayibbele lyakalembwa aaLeza. Lyakalembwa abaalumi bali 40 muminyaka iili 1 600 yakiinda pesi lyaambuula zintu zyeendelana, eezi zitondeezya kuti lyakalembwa aaLeza. (2 Timoteo 3:16) Kusiyana aamwi mabbuku aachiindi, taakwe nilyakachincha lichili mbuuli mbulyakalembedwe mumalembe aachiindi. Kuyungizya waawo, Bbayibbele lyakazwidilila kusandululwa nikuba kuti bamwi teebakali kuyanda. Mazubaano lilajanika mubantu biingi alubo lijanika mumilaka myiingi kwiinda aamwi mabbuku. Kufutuka kwaBbayibbele kusikila kuchiindi chesu mbumboni bwakuti “majwi aa-Leza ayoobedelela” naakuti anooliko lyoonse mane kukabe kutamani.—Isaya 40:8.

MAKANZE AALEZA AYOOZUZIKIZIGWA

Chimwi chintu nchaakachita Leza nkutupa chipo chiyandikana chipa kuti tube achoonzyo chakuti makanze aakwe ayoozuzikizigwa. Mbuuli mbutwabona, Leza wakali kuyanda kuti bantu bapone kukabe kutamani aanyika. Chiindi Adamu aEva nibakasala kutaswiilila Leza, bakabisya alubo teebakachili kukonzya kupona kukabe kutamani kuswaanizya abana mbibakali kuyoozyala. Bbayibbele litii: “Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.” (BaRoma 5:12) Kutaswiilila kwaAdamu kwakapa kuti kubonekaanga makanze aaLeza afwidilila. Jehova wakachita biyeni?

Jehova wakabambulula nkani eeyi munzila yabululami. Wakapa Adamu aEva mulandu akaambo kakubisya nkubakachita pesi bana babo wakabapa bulangilizi. Jehova wakaamba mbaakali kuyooyibambulula nkani eeyi alubo wakabelesya busongo kuti ayibambulule. (Matalikilo 3:15) Leza wakali  kuyoobelesya Mwanaakwe Jesu Kristu kuti atufutule kuchibi alufu. Eezi zyakali kuswaanizyaanzi?

Kuti afutule bantu kuchibi alufu zyakeetwa aAdamu, Jehova wakatuma Jesu aanyika kuti ayiisye bantu mbubeelede kupona akuti kumamanino ‘ape buumi bwakwe bube chinunuzyo chabiingi.’ * (Matayo 20:28; Johane 14:6) Jesu wakali kukonzya kunununa bantu nkaambo taakalikwe chibi mbuuli Adamu. Kusiyana aAdamu, Jesu wakaswiilila kusikila kulufu. Mbukunga Jesu taakeelede kufwa, Jehova wakamubusya kuti akapone lubo kujulu. Jesu wakapa kuti bantu baswiilila bakajane buumi butamani bwakasowegwa aAdamu. Bbayibbele lyaamba kuti: “Nkaambo mbuuli kukutaswiilila kwamuntu omwe banji bakaba basizibi, mbubonya obo mukuswiilila kwamuntu omwe banji balaba baluleme.” (BaRoma 5:19) Nkinkaako, chisyomezyo chaLeza chakuti bantu bakapone kukabe kutamani aanyika chiyoozuzikizigwa kwiinda muchinunuzyo chaJesu.

Nzila Jehova njakabambululaayo nkani yakutaswiilila kwaAdamu ituyiisya zyiingi atala anguwe. Taakwe chikonzya kukachizya Jehova kuti amaninsye mulimu ngwaakatalika, ijwi ndyaakamba ‘liyoochita makani ngaakalitumina.’ (Isaya 55:11) Jehova ulatuyanda. Bbayibbele lyaamba kuti: “Luyando lwa-Leza lwamulindiswe lwakaboneka boobu, nkaambo Leza wakatuma Mwanaakwe simuzyalwa-alike munyika, kuti tujane buumi kumaanza aakwe. Olu nduyando ncobeni. Teensi kwaamba kuti swebo twakayanda Leza, pe, pele walo nguwakatuyanda swebo akutuma Mwanaakwe kuti azoobe mulungo wazibi [naakuti chipayizyo chazibi] zyesu.”—1 Johane 4:9, 10.

Tulaachoonzyo chakuti Leza ‘iwatakatukasya Mwanaakwe mwini, pele wakamwaabila ndiswe toonse uyootupa buyo antoomwe anguwe zintu zimwi zyoonse.’ (BaRoma 8:32) Leza wakatusyomezya kuti uyootuchitilaanzi kunembo? Bala chiiyo chitobela.

NZIIZILI ZINTU LEZA NZYAAKACHITA?

^ par 16 Kuti ujane zyiingi atala achinunuzyo, langa chaandaano 5 chabbuku litegwa IBbayibbele Nga Lilatuyiisyaanzi?, lyakapupululwa aBakamboni baJehova alubo lilajanika awebbusayiti iitegwa www.jw.org.

Jehova wakalenga bantu kuti bakkale aanyika kukabe kutamani. Wakatupa Bbayibbele kuti tukonzye kwiiya atala anguwe. Kwiinda muchinunuzyo chaJesu Kristu, Jehova wakapa kuti makanze aakwe akazuzikizigwe