Skip to content

Skip to table of contents

Kulaya mwana kuli mbuuli rudder iigwasya bwaato kuti bukasike nkubuya

 ZIGWASYA BAZYALI

6: Kulaya

6: Kulaya

CHAMBAANZI?

Kulaya chaamba kuzulwida naakuti kuyiisya. Chimwi chiindi, kulaya chaamba kululamika michito yamwana iitali kabotu. Alubo kuswaanizya kuyiisya mwana kuti alijate kabotu akuti akonzye kusala kabotu.

NKAMBOONZI NIKUYANDIKANA?

Bamwi bazyali tabachibalayi pe bana babo nkaambo bayoowa kuti bana balakonzya kulibona kuti tabagwasyi pe. Pesi bazyali bachenjede bababikkila milawu bana babo akubayiisya kuti bayitobele.

“Bana beelede kubuzigwa nzibeelede kuchita anzibateelede kuchita kuti bazoopone buumi bulikabotu bazookomena. Bana batalayidwe bali mbuuli bwaato butakwe nsoke nkaambo bulakonzya kukachilwa kuyoosika nkubweelede kuya.”—Pamela.

NZUKONZYA KUCHITA

Tamweelede kuchincha-chincha. Kuti mwanaako katatobelezyi milawu njumupede, mupe lulayo luyandikana. Pesi kuti mwanaako waswiilila mulumbayizye.

“Chiindi chiingi, ndilabalumbayizya bana bangu kuti baswiilila nikuba kuti bapona munyika bantu mubataswiilili. Kubalumbayizya kupa kuti kubawubile kutambula lulayo.”—Christine.

NZILYAAMBA BBAYIBBELE: “Kufumbwa ncabyala muntu, ulatebula eco nciconya.”—BaGalatiya 6:7.

Amube amaboneno aalikabotu. Laya mwanaako kweendelana aminyaka njalaayo abupati bwachibi nchaachita. Kumupa lulayo kulagwasya kuti wachita chibi chipati, muchikozyano, kuti katakonzyi kwiibelesya kabotu fooni, mulakonzya kumunyanzya kwachiindi chifwiifwi. Pesi tamweelede kumunyemena nikuba mutuntu tuniini ntwabisya.

“Ndileezya kulangisisya kuti mwanaangu wachita achaali na naakuti wabisya katazi. Kwiindulula kuchita chibi achaali kulisiyene akubisya kutazi.”—Wendell.

NZILYAAMBA BBAYIBBELE: “Mutanoonyenukili bana banu, kuti batanoosululwi.”—BaKolose 3:21.

Amube aluyando. Bana balakonzya kulutambula lulayo akulubelesya kuti baziba kuti bazyali balabalaya nkaambo balabayanda.

“Chiindi mwaneesu mulombe naakali kubisya katazi, twakali kumubuzya kuti tulabotelwa akaambo kakusala kubotu nkwaakachita. Twakali kumupandulwida kuti, kubisya katazi nkwaachita takupi kuti abe ampuwo mbi, nkinkaako twakali kumugwasya kuti abambulule.”—Daniel.

NZILYAAMBA BBAYIBBELE: ‘Luyando lulakkazika moyo akufwida luzyalo.’—1 BaKorinto 13:4.