Skip to content

Skip to table of contents

 CHIIYO 1

Insiswa Ibotezya Kuti Twayiziba

Insiswa Ibotezya Kuti Twayiziba

Kuli wakali wakubuzya nsiswa na?— * IBbaibbele lyaambula atalaa nsiswa iyandikana. Ilayandikana nkaambo izwa kuli Leza. Ninsiswa nkaambo bantu tebakiizi pe. Nikuba bangelo bakali kuyanda kuziba zyiingi atalaa nsiswa eeyi. Ulayanda na kwiiziba nsiswa eeyi?—

Ubonaanga bangelo bakali kuyanda kuzibaanzi?

Ciindi loko, Leza wakalenga mwaalumi amwanakazi bakusaanguna. Mazina aabo bakali baAdamu aEva. Leza wakabapa muunzi mubotu utegwa muunda waEdeni. Nikuli Adamu aEva bakamuswiilila Leza, bo abana babo bakali kuyoocita kuti nyika yoonse ibe Paradaiso mbuuli muunda waEdeni. Bakali kuyookkala muParadaiso kukabe kutamani. Uciyeeyede na kuti Adamu aEva bakacitaanzi?—

Akambo kakuti Adamu aEva tiibakamuswiilila pe Leza, ncinco citupede kutakkala muParadaiso lino. Nikuba boobo, Leza wakaamba kuti uyoocita kuti nyika yoonse ibote, alimwi bantu boonse bayoopona mane kukabe kutamani alimwi kababotelwa. Wakalikuyoozicita biyeni? Kwaciindi cilamfu bantu tebakazi pe. Yakali nsiswa.

Ciindi Jesu nakazaa nyika, wakayiisya bantu zyiingi atalaa nsiswa eeyi. Wakaamba kuti yakali atalaa Bwami bwaLeza. Jesu wakaambila bantu kuti bakombele Bwami oobo kuti busike. Buyoocita kuti nyika ibe paradaiso mbotu.

Lino wabotelwa na kwiiziba nsiswa eeyi?— Utalubi kuti aabo baswiilila Leza mbabo abalikke batakapone muParadaiso. IBbaibbele lyaambula atalaa baalumi abanakazi bakaswiilila Jehova. Ulayanda na kwiiya atalaa mbabo?— Tubone kuti bamwi babo mbaani alimwi tulakonzya biyeni kubatobelezya.

^ par 3 Muzibalo zili mukabbuku aaka, muyobona keengo aaka (—) kunembo kwamibuzyo. Mweelede kwiimikila kwaciindi cifwiifwi kuti mwana asandule.