Skip to content

Skip to table of contents

 CHAANDAANO 14

Syomeka Muzintu Zyoonse

Syomeka Muzintu Zyoonse

‘Tuyanda kuti tusyomeke tubule akampenda.’—BAHEBRAYO 13:18.

1, 2. Jehova umvwa biyeni chiindi nitutondeezya kusyomeka?

LIMWI zuba umwi mulombe naakazwa kuchikolo wakabwezela chikwama chamali. Wakachita biyeni? Wakayibweza akwiichita yakwe na? Taakayibweza kuti ibe yakwe pesi wakayanduula munaayo. Banyina nibakamvwa atala anzyaakachita bakabotelwa loko.

2 Bazyali biingi balabotelwa kuti bana babo kabasyomeka. Taateesu uuli kujulu Jehova ‘nguLeza wakasimpe’ alubo ulabotelwa kuti katusyomeka muzintu nzituchita. (Intembauzyo 31:5) Tuyanda kuti Jehova abotelwe kwiinda mukakkala ‘katusyomeka akubula kampenda.’ (BaHebrayo 13:18) Atulange-lange mbazu zine zyabuumi zikataazya bantu biingi kuti bakkale kabasyomeka. Kuzwaawo, tuyoolanga-langa zilongezyo nzitujana kuti twakkala katusyomeka.

UTALYEENI PE

3-5. (a) Kujana twalyeena biyeni? (b) Niinzi chiyootugwasya kuti tutalyeeni?

3 Kuti tusyomeke kuli bamwi tweelede kuba  bantu basyomeka. Pesi kuchita oobo teekuuba pe. Mumwaanda wamunyaka wakusaanguna, bakwesu bamumbungano yakuLawodikkeya bakali kulyeena kwiinda mukuyeeya kuti nzibakali kuchita zyakali kubotezya Leza. (Ciyubunuzyo 3:17) Andiswe nzila njitulibonaayo ilakonzya kutweena.

4 Sikwiiya Jakkobo wakaamba kuti: “Na nkwali uuliyeeya kuti musyomi, nekubaboobo taangi lulimi lwakwe pele walyeena mumoyo wakwe mwini, busyomi bwayooyo mbwabuyo.” (Jakobo 1:26) Andiswe tunooli tulikulyeena kuti katubonaanga kuchita zintu zilikabotu kupa kuti Leza atakubikkili maanu kwaambuula majwi aatali kabotu akubeja nkutuchita. Niinzi chikonzya kutugwasya kuti tutalyeeni?

5 Kuti twalilanga achiboni-boni, tulakonzya kubona mbutubede aanze. Kuti twabala Bbayibbele tulakonzya kubona mbutubede mukati kamoyo. Bbayibbele litugwasya kubona mputuchita kabotu amputukachilwa. Alubo litugwasya kubona mbutukonzya kubambulula nzituyeeya, nzituchita anzitwaambuula. (Bala Jakobo 1:23-25.) Tatukonzyi kubambulula mputubisya kuti katulibuzya kuti nzituchita zyoonse zilikabotu. Tweelede kubelesya Bbayibbele kuti tulilange-lange mbutubede choonzyo. (Malilo 3:40; Hagai 1:5) Kukomba kutugwasya kuti tuzibe mbutubede mumoyo. Tulakonzya kukomba kuli Jehova kuti atulange-lange akuti atugwasye kubona mputweelede kubambulula. (Intembauzyo 139:23, 24) Tweelede kuyeeya kuti, ‘Jehova ulasesemwa amuntu  uupilingene, pele baluleme mbibeenzinyina.’—Tusimpi 3:32.

KUSYOMEKA MUMPULI

6. Nkamboonzi bantu bakwetene nibeelede kukkala kabasyomeka?

6 Kusyomeka kulayandikana mumpuli. Kuti bantu bakwetene kabatasisilani zintu nzibachita zipa kuti babe aluumuno akuti basyomane. Bantu bakwetene balakonzya kutondeezya kutasyomeka munzila zyiingi. Muchikozyano, muntu uuli mulukwatano ulakonzya kutalika kusaana aluyando, kweebela ponogilafu naakuti kuyandana aawumwi muntu. Sintembawuzyo wakati: ‘Tandeendi  abasilweeno pe, nikuba kweenda abasikuupawupa ameso.’ (Intembauzyo 26:4) Kuti kutasyomeki kumuntu ngukwetenaawe muzintu nzuyeeya ziyoopa kuti mutamvwanani mulukwatano lwanu.

Bantu bakwetene beelede kutantamuka zintu zikonzya kupa kuti batasyomeki

7, 8. Kujana bazyali babagwasya biyeni bana babo kuti babone mbukuyandikana kusyomeka?

7 Bana beelede kuziba kuti kusyomeka kulayandikana. Bazyali beelede kubelesya Bbayibbele kuti bayiisye bana mbubakonzya kukkala kabasyomeka. Lili azikozyano zyabantu bakatali kusyomeka mbuuli Akkani wakabba; Gehazi wakabeja kuti ajane mali aJudasi wakali kubba mali alubo mukuya kwachiindi wakawuzya Jesu amali yansiliva iisika ku30.—Joshua 6:17-19; 7:11-25; 2 Bami 5:14-16, 20-27; Matayo 26:14, 15; Johane 12:6.

8 Alubo muBbayibbele muli zikozyano zyabantu bakali kusyomeka mbuuli Jakkobo, wakabuzya bana bakwe kuti babweedezye mali njibakajana; Jefita amwanaakwe musimbi, bakazuzikizya chisyomezyo kuli Leza aJesu wakali kusyomeka nikuba muziindi ziyumu. (Matalikilo 43:12; Babetesi 11:30-40; Johane 18:3-11) Zikozyano eezi ziyoogwasya bana kuti babone mbukuyandikana kusyomeka.

9. Kusyomeka kwabazyali kubagwasya biyeni bana?

9 Bazyali balakonzya kugwasigwa amalayilile aamuBbayibbele atii: “Ino yebo oiisya mweenzinyoko sa toliisyi omwini? Yebo okambauka kutabba, sa ulabba?” (BaRoma 2:21) Bana balabona kuti bazyali babayiisya zintu nzibatachiti. Bana balakonzya kukachilwa kuziba zili nzinzyo kuti bazyali babo kabatasyomeki. Kuti bana babona kuti bazyali babo tabasyomeki  nikuba muzintu ziniini bayootobelezya chikozyano chabo. (Bala Luka 16:10.) Pesi kuti bana babona bazyali babo kabasyomeka ziyoopa kuti kabasyomeka baakuba bazyali abalabo.—Tusimpi 22:6; BaEfeso 6:4.

KUSYOMEKA MUMBUNGANO

10. Kujana twakutondeezya biyeni kusyomeka nitwaambuula abasyomima?

10 Tweelede kutondeezya kusyomeka kubakwesu abachizi. Tulakonzya kusaanguna kuvwiya naakuti kubejelezya umwi muntu nikuba kuti twatalikide katwaambuula zintu zilikabotu. Kuti twaambuula zintu nzitutazi kabotu tulakonzya kubeja. Nkinkaako tweelede ‘kukasya milomo yesu.’ (Tusimpi 10:19) Kusyomeka takwaambi kuti tweelede kwaamba zintu zyoonse nzituzi naakuti nzitwakamvwa. Nikuba kuti zimwi zintu tuzizi kabotu pesi chimwi chiindi takuyandikani pe kubuzya bamwi atala anzizyo. (1 BaTesalonika 4:11) Bamwi nga bayandisya kwaamba kuti: “Ndilikwaambisya, nkubeja na?” Pesi mbutuli bakombi baJehova tuyanda kwaambuula majwi aalikabotu chiindi choonse.—Bala BaKolose 4:6.

11, 12. (a) Muntu wakachita chibi kujana wakutondeezya biyeni kutasyomeka? (b) Njiili mibuzyo njitweelede kulibuzya? (c) Kujana twakutondeezya biyeni kusyomeka mumbunga yaJehova?

11 Jehova wakasala baalu kuti bagwasye bantu bali mumbungano. Kuti twaba bantu basyomeka ziyoopa kuti kubawubile baalu kutugwasya. Nkamboonzi? Muchikozyano, kuti wachiswa mpawo wiinka kulidokotela kujana wamusisila na zilikukuchisa?  Kuti wachita oobo uyookonzya na kukugwasya? Munzila iikozyenie, kuti twachita chibi chipati tatweelede kubasisila pe baalu. Pesi tweelede kubabuzya zyoonse zyakachitika. (Intembauzyo 12:2; Incito 5:1-11) Kujana wachita biyeni kuti waziba kuti mweenzinyokwe wakachita chibi chipati? (Levitiko 5:1) Wali kunoowumuna na kuyanda kukwabilila mweenzinyokwe? Naakuti uyooyeeya kuti baalu mbabo bakonzya kumugwasya kuti abe abweenzinyina bulikabotu aJehova?—BaHebrayo 13:17; Jakobo 5:14, 15.

12 Alubo tweelede kusyomeka chiindi nitulemba malipoti amulimu wakukambawuka. Kusyomeka kulayandikana chiindi nituzuzikizya mafoomu amulimu wabupayona aakunjila umwi mulimu wachiindi choonse.—Bala Tusimpi 6:16-19.

13. Kujana twakutondeezya biyeni kusyomeka nituchita bbizinesi amukombima?

13 MaKristu tabeelede kuswaanizya zintu zyabbizinesi abukombi. Muchikozyano, tatweelede kuchita zyabbizinesi nituli kung’anda yaBwaami naakuti nituli mumulimu wakukambawuka. Alubo tatweelede kubbida bakombima mbituchitaabo bbizinesi. Kuti kubelekelwa aBakamboni, weelede kubabbadala kweendelana ambumwakazuminana alubo ubape nzibeelede kujana kweendelana amulawu. Eezi ziswaanizya kubapa mali yakulisilisya akubapa chiindi chakulyookezya. (1 Timoteo 5:18; Jakobo 5:1-4) Kuti kubelekela Kamboni, utalangilili kujatwa mbuuli ji. (BaEfeso 6:5-8) Kuti kuli mubelesi, weelede kubeleka kweendelana ambumwakazuminana.—2 BaTesalonika 3:10.

14. MaKristu beelede kuchitaanzi kabatanatalika zyabbizinesi?

 14 Kujana twakutondeezya biyeni kusyomeka nituchita bbizinesi amukombima? Amwi mulakonzya kuswaanizya mali naakuti kukweleta mali yakuti muchite chimwi chintu. Kuti mwasala kuchita oobo, amubelesye malayilile aamuBbayibbele aayandikana aakulemba aansi nzimwazuminana. Musinsimi Jeremiya naakawula muunda, wakalemba zizuminano zibili akubuzya bakamboni kuti bazisayine mpawo wakazilondola kuti azoozibelesye. (Jeremiya 32:9-12; kozyanisya aMatalikilo 23:16-20.) Bamwi balakonzya kuyeeya kuti kulemba chizuminano kutondeezya kuti tabamusyomi mukombinyina. Pesi kulemba chizuminano kugwasya kuti bantu babe aluumuno, batanyemezyanyi akuti batakazyanyi. Nimuchita zyabbizinesi, mweelede kuyeeya kuti kubamba luumuno nchiichintu chipati kwiinda bbizinesi.—1 BaKorinto 6:1-8, langa Makani Aakumamanino 30.

KUSYOMEKA KUBANTU BOONSE

15. Jehova ukubona biyeni kutasyomeka muli zyabbizinesi?

15 Tweelede kusyomeka kubantu boonse nikuba batali Bakamboni baJehova. Jehova uyanda kuti katusyomeka. “Zipimyo zibeja zilasesemya Jehova, pele ceelesyo ciluleme cilamubotezya.” (Tusimpi 11:1; 20:10, 23) Chiindi, zikkelo zyakali kubelesegwa muli zyabbizinesi. Bamwi basikuuzya bakali kubbida bawula kwiinda mukubelesya zikkelo zyakubeja akubabbadalisya mali nyingi. Nikuba mazubaano bantu tabasyomeki pe muli zyabbizinesi. Pesi Jehova tanachincha pe maboneno aakwe atala akutasyomeka.

16, 17. Nziizili nzila zitondeezya kutasyomeka nzitweelede kutantamuka?

 16 Chimwi chiindi kulakonzya kutuyumina kusyomeka chiindi nituli kuzuzikizya mafoomu akuyanduula mulimu, mafoomu amfulumende anituli kulemba misunko yakuchikolo. Bamwi bantu bayeeya kuti kubeja teekubi pe. Tazitugambyi pe eezi. Nkaambo Bbayibbele lyakaamba kakuchili chiindi kuti kumazuba aakumamanino, bantu bakali kuyooba “basikuliyanda, basimuyanda mali, . . . batayandi bubotu.”—2 Timoteo 3:1-5.

17 Chimwi chiindi bantu batasyomeki baboneka kabali kuzwidilila. (Intembauzyo 73:1-8) Akaambo kakusyomeka, muKristu ulakonzya kumaninwa mulimu, kutapegwa mali munzila yeelede nikuba kutajatwa kabotu kumulimu. Nikuba boobo, kusyomeka kulayandikana chiindi choonse. Nkamboonzi?

ZILONGEZYO ZYEETWA AKAAMBO KAKUSYOMEKA

18. Nkamboonzi kusyomeka nikuyandikana?

18 Mazubaano kusyomeka kulayandikana nikuba kuti bantu biingi teembubabede pe. Tweelede kubeleka changuzu kuti tukkale katusyomeka. (Mika 7:2) Chimwi chiindi bamwi bantu balakonzya kukufubaazya akaambo kakuti ulasyomeka. Pesi bamwi balakonzya kukuyanda akukulemeka. Bakamboni baJehova bazibidwe kuti balasyomeka. Basimabbizinesi biingi basala kunjizya Bakamboni milimu nkaambo balizi kuti balasyomeka. Alubo chimwi chiindi  bamwi nibalesegwa milimu akaambo kakutasyomeka Bakamboni balasyaala kababeleka.

Kubeleka changuzu kupa kuti Jehova alemekwe

19. Kukkala katusyomeka kupa kuti Jehova atubone biyeni?

19 Kusyomeka muzintu zyoonse kupa kuti ube amanjezeezya aalikabotu akuti ukkalikane mumizeezo. Tuyanda kuba mbuuli Pawulu wakalemba kuti: ‘Tusyoma kuti tujisi manjezeezya aalikabotu.’ (BaHebrayo 13:18) Kuyungizya waawo, Taateesu Jehova ulabotelwa nabona katubeleka changuzu kuti tukkale katusyomeka muzintu zyoonse.—Bala Intembauzyo 15:1, 2; Tusimpi 22:1.