Skip to content

Skip to table of contents

 CHAANDAANO 1

Luyando lwaLeza Talumani Pe

Luyando lwaLeza Talumani Pe

“Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.”—1 JOHANE 5:3.

1, 2. Niinzi chipa kuti tuyande Jehova Leza?

ULAMUYANDA na Leza? Ulakonzya kutondeezya kuti ulamuyanda kwiinda mukulipeda kulinguwe. Leza ulakonzya kuba Mweenzinyokwe nguyandisya. Pesi Jehova wakasaanguna kukuyanda kutanamuziba. MuBbayibbele tubala kuti: “Swebo tulamuyanda nkaambo nguwakasaanguna kuyanda ndiswe.”—1 Johane 4:19.

2 Yeeya atala azintu zitondeezya kuti Jehova ulatuyanda. Wakatupa nyika mbotu kuti tukkale azintu zilimumo kuti tubotelwe mubuumi. (Matayo 5:43-48; Ciyubunuzyo 4:11) Jehova uyanda kuti tube abweenzinyina bulikabotu anguwe akuti tukonzye kwiiya atala anguwe. Tuswiilila Jehova chiindi nitubala Bbayibbele. Alubo ulaswiilila chiindi nitukomba. (Intembauzyo 65:2) Ubelesya muuya uusalala kuti atuzulwide akutusimya. (Luka 11:13) Wakatuma Mwanaakwe ngwayandisya aanyika kuti azootununune kuchibi alufu.—Bala Johane 3:16; BaRoma 5:8.

3. Kujana twachita biyeni kuti tube abweenzuma bulikabotu aJehova?

 3 Yeeya atala amweenzinyokwe nguyandisya, uukugwasya muzyiimo zisiyene-siyene. Weelede kubeleka changuzu kuti bweenzinyokwe amuntu ooyo busime. Mbububede bweenzuma mbutuli aabo aJehova, nkaambo Mweenzuma ngutuyandisya. Bweenzuma mbutulaabo anguwe tabumani pe. Nkinkaako, Bbayibbele litubuzya kuti: ‘Amukkale kamuli muluyando lwa-Leza.’ (Juda 21) Kujana twazichita biyeni? Bbayibbele lyaamba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.”—1 Johane 5:3.

“OKU NKOKUYANDA LEZA”

4, 5. (a) ‘Kuyanda Leza’ chambaanzi? (b) Wakatalika biyeni kuyanda Jehova?

4 Kweendelana azyaambwa aBbayibbele, ‘kuyanda Leza’ chambaanzi? Tachaambi kuti Leza nguwe utuyanda pesi chaamba kuti ndiswe tuyanda Leza. Uchiyeeyede na nwaakasaanguna kuyanda Leza?

Chiindi nulipeda kuli Jehova akubbabbatizigwa, utondeezya kuti ulamuyanda akuti uyanda kumuswiilila kukabe kutamani

5 Yeeya mbwaakalimvwa chiindi nwaakasaanguna kwiiya kuti Jehova uyanda kuti ukakkale munyika mpya kukabe kutamani. Wakiiya atala amabambe Jehova ngaakachita kuti eechi chikonzeke alubo wakayiya kuti Jehova wakatupa chipo chipati kwiinda mukutuma Mwanaakwe aanyika. (Matayo 20:28; Johane 8:29; BaRoma 5:12, 18) Nwaakaziba kuti Jehova ulakuyanda, zyakapa kuti umuyande loko.—Bala 1 Johane 4:9, 10.

6. Kuyanda umwi muntu kuswaanizyaanzi? Kuyanda Leza kwakapa kuti uchiteenzi?

 6 Pesi kuyanda Leza akali matalikilo biyo. Muchikozyano, muntu ngutumvwananaawe tumuchitila zyiingi kutali kumubuzya kuti “ndilakuyanda” luzutu. Kumuyanda kupa kuti tuchite zintu zimubotezya. Alubo kuyanda Jehova kwakapa kuti upone munzila iimubotezya. Luyando oolo nilwakasima, lwakapa kuti ulipede kulinguwe akuti ubbabbatizigwe. Kwiinda mukuchita oobo, wakasyomezya Jehova kuti uyoomubelekela kukabe kutamani. (Bala BaRoma 14:7, 8.) Kujana wachizuzikizya biyeni chisyomezyo eechi?

“TWABAMBA MILAZYO YAKWE”

7. Kuyanda Jehova kupa kuti tuchiteenzi? Milawu yakwe imwi ityeni?

7 Kuyanda Jehova kupa kuti ‘tubambe milazyo yakwe.’ Tuzichita biyeni eezi? Kwiinda mukumuswiilila. MuBbayibbele, Jehova utuyiisya mbutweelede kupona. Muchikozyano, utubuzya kuti kukolwa, kubba, kubeja, koonana amuntu ngutakwetenaawe, kukomba muntu naakuti chimwi chintu kutali Jehova, nkubisya.—1 BaKorinto 5:11; 6:18; 10:14; BaEfeso 4:28; BaKolose 3:9.

8, 9. Kujana twaziziba biyeni zintu Jehova nzyayanda kuti tuchite muzyiimo mututabikkilidwe milawu ilaantanganana? Pa chikozyano.

8 Pesi kuti tubotezye Jehova, tweelede kuchita zyiingi kutali kubamba milawu yakwe luzutu. Jehova tatubikkilide mulongo wamilawu muzintu zyoonse. Muli zimwi zyiimo, Bbayibbele talitubikkilide milawu  ilaantanganana itondeezya mbutweelede kuchita. Niinzi chikonzya kutugwasya kuti tusale kabotu? (BaEfeso 5:17) MuBbayibbele, muli njiisyo akasimpe zitugwasya kubona Jehova mbazibona zintu. Kubala Bbayibbele kutugwasya kuti tubone Jehova mbuuli Muntu wachoonzyo. Tuziba mbayeeya, zintu nzyayanda anzyatayandi.—Bala Intembauzyo 97:10; Tusimpi 6:16-19; langa Makani Aakumamanino 1.

9 Muchikozyano, tuchita biyeni chiindi nituyanda kweebela TV naakuti chiindi nituyanda kubelesya Intaneti? Jehova tatubuzyi chaantanganana nzitweelede kuchita. Pesi malayilile ngatupa atugwasya kuti tusale kabotu. Mazubaano, zyakulikondelezya zyiingi zisungwaazya kulwana akoonana. MuBbayibbele, Jehova utubuzya kuti, “moyo wakwe ulisulide basikufumpa” akuti “uyoobabeteka baamu abasimalale.” (Intembauzyo 11:5; BaHebrayo 13:4) Malayilile aaya kujana atugwasya biyeni kuti tusale kabotu? Kuziba zintu Jehova nzyatayandi anzyabona kuti nkutalilemeka, kuyoopa kuti tuzitantamuke.

10, 11. Nkamboonzi nituswiilila Jehova?

10 Nkamboonzi nituswiilila Jehova? Tatuchiti oobo akaambo kakuyoowa kupegwa chisubulo naakuti mapenzi ngitukonzya kujana kuti teetwasala kabotu. (BaGalatiya 6:7) Pesi tuswiilila Jehova nkaambo tulamuyanda. Tuyanda kubotezya Taateesu wakujulu, mbuuli bana mbubabotezya wisi. Nichoonzyo, kuziba kuti Jehova ulabotelwa muzintu nzituchita kulabotezya!—Intembauzyo 5:12; Tusimpi 12:2; langa Makani Aakumamanino 2.

 11 Tatuswiilili Jehova chiindi zintu nizilikutweendela kabotu luzutu naakuti nitwabula zyakuchita. Alubo tatusali kuti njiili milawu azyeelelo nzitweelede kutobela anjituteelede kutobela. (Deuteronomo 12:32) Pesi tulamuswiilila amoyo woonse mbuuli sintembawuzyo mbakaamba naakati: “Ilandikondezya milazyo yako, njenjandisya.” (Intembauzyo 119:47; BaRoma 6:17) Tuyanda kuba mbuuli Nowa wakatondeezya kuti ulamuyanda Jehova kwiinda mukuchita zyoonse nzyaakabuzigwa. Bbayibbele lyaamba kuti Nowa “wakacita obo.” (Matalikilo 6:22) Tuyandi na kuti Jehova azoowambe oobo kuli nduwe?

12. Kujana twachita biyeni kuti Jehova abotelwe?

12 Jehova umvwa biyeni chiindi nitumuswiilila? ‘Moyo wakwe ulakondwa.’ (Tusimpi 11:20; 27:11) Yeeyesesya atala amakani aaya! Tupa kuti Mulengi wazintu zyoonse abotelwe chiindi nitumuswiilila. Nikuba boobo, Jehova tatusinikizyi biya pe. Pesi wakatupa lwaangunuko lwakulisalila. Eezi zyaamba kuti tulakonzya kulisalila kuchita chibi naakuti chibotu. Kuyanda Jehova kupa kuti tusale kabotu akuti tupone buumi buli kabotu.—Deuteronomo 30:15, 16, 19, 20; langa Makani Aakumamanino 3.

“MILAZYO YAKWE TIILI MIYUMU”

13, 14. Tuzi biyeni kuti milawu yaJehova teemiyumu pe? Pa chikozyano.

13 Kujana twaamba kuti milawu yaJehova miyumu na kwiitobela naakuti ipa kuti tutabotelwi? Bbayibbele lipandulula kuti: “Milazyo yakwe tiili miyumu.” (1 Johane 5:3) Bbala lyachiGrikki liti “miyumu,” lyaamba  “kulema.” Mumagwalo amwi, bbala eeli lipandulula milawu iitamvwisisiki, bantu bayanda kweendelezya naakuti bayanda kumizya bamwi. (Matayo 23:4; Incito 20:29, 30) Bbayibbele litegwa New English Translation, lyaamba kuti: “Milawu yakwe tiiminyi.” Milawu yaJehova “tayilemi” alubo tulakonzya kwiiswiilila. Zintu nzyatubuzya kuti tuchite zitondeezya kuti ulatuyanda.

14 Muchikozyano, atuteedi ulikugwasya mweenzinyokwe ulikulongela kubusena bumwi. Wamujana walongela kale zintu zyakwe mumabbokesi. Mabbokesi amwi mawuba kaabwezeka, pesi amwi malemu zyakuti ayanda bantu babili kuti baabweze. Zilachita na kuti mweenzinyokwe akubuzye kuti ubweze aalya malemu awulikke? Tazichiti pe. Nkamboonzi? Nkaambo tayandi pe kuti uminwe. Jehova uli mbuuli mweenzinyokwe uulya, nkaambo tatubuzyi kuti tuchite zintu nzitutakonzyi. (Deuteronomo 30:11-14) Jehova ulizi mbutubede, “nkaambo ulizi mbububede buntu bwesu, ulaibulukwa kuti tuli bulongo buyo.”—Intembauzyo 103:14.

15. Nkamboonzi nitusyoma kuti milawu yaJehova ilatugwasya?

15 Musa wakabuzya maIsrayeli kuti milawu yaJehova yakali kuyoobagwasya kuti “bakale kabotu” akuti kuswiilila kwakali kuyoopa kuti ‘bapone.’ (Deuteronomo 5:28-33; 6:24) Mbukubede nikuba mazubaano. Zintu zyoonse Jehova nzyatubuzya kuti tuchite zigwasya ndiswe. (Bala Isaya 48:17.) Taateesu Jehova, ulizizi nzituyanda. (BaRoma 11:33) Bbayibbele litubuzya kuti: “Leza nduluyando.” (1 Johane 4:8) Eezi zyaamba kuti zintu zyoonse Jehova nzyaamba akuchita uzichita chaluyando.

16. Tuzi biyeni kuti tulakonzya kuswiilila Leza nikuba kuti tatumaninide akuti tukkede munyika yeendelezegwa aDyabbulosi?

 16 Chimwi chiindi kuswiilila Leza kulatuyumina. Nkaambo tukkede munyika yeendelezegwa aDyabbulosi. Dyabbulosi usungwaazya bantu kuti bachite zibi. (1 Johane 5:19) Alubo, tulwana akutamaninina mumizeezo amumubili, zipa kuti kutuyumine kuswiilila Leza. (BaRoma 7:21-25) Pesi kuyanda Jehova nkuko kutupa manguzu aakuti tuchite zilikabotu. Jehova ulakubona kweezya nkutuchita kuti tumuswiilile alubo ulatugwasya kwiinda mukutupa muuya uusalala. (1 Samuele 15:22, 23; Incito 5:32) Muuya uusalala upa kuti tube abube butugwasya kuti chituubile kuswiilila Leza.—BaGalatiya 5:22, 23.

17, 18. (a) Tuyooyiyaanzi mubbuku eeli? (b) Tuyooyiyaanzi muchaandaano chitobela?

17 Mubbuku eeli, tuyooyiya mbutukonzya kupona munzila iibotezya Jehova. Tuyooyiya mbutweelede kupona kweendelana amalayilile aakwe azyeelelo zyakulijata mubuumi bwesu. Tweelede kuziba kuti Jehova tatusinikizyi biya pe kuti tumuswiilile. Ikuti twasala kuswiilila Leza, tulapona buumi bulikabotu lino alubo tuyoojana zilongezyo zyiingi kunembo. Kwiinda zyoonse, kuswiilila Leza kutondeezya kuti tulamuyanda.—Langa Makani Aakumamanino 4.

18 Jehova wakatupa manjezeezya kuti tukonzye kuziba chibotu achibi. Kuti manjezeezya eesu twaayiisya kabotu, ziyoopa kuti ‘tubambe milazyo yakwe.’ Manjezeezya niinzi? Alubo kujana twaayiisya biyeni? Atubone.