Skip to content

Skip to table of contents

 CHIIYO 6

Tula Bulangilizi Na Bwakuti Bafwide Bayoobuka?

Tula Bulangilizi Na Bwakuti Bafwide Bayoobuka?

1. Makaniinzi mabotu aliwo atalaa bafwide?

Jesu nakasika kuBetaniya afwifwi aku Jerusalemu, mwenzumaakwe Lazaro wakali wabaa mazuba one kafwide. Jesu wakiinka aMariya aMarta, bacizi bamufu kukabanda. Mucindi cifwifwi bantu bakabungana. Yeya kuti Marta aMariya bakamvwa biyeni aawo Jesu naakabusya Lazaro?​—Bala Johane 11:21-24, 38-44.

Marta wakaleezi kale makani mabotu atalaa bafwide. Wakalizi kuti Jehova uyoobusya bafwide kuti bapone lubo aanyika.​—Bala Jobu 14:14, 15.

2. Bafwide bali muciimo cilibiyeni?

Leza wakabuzya Adamu kuti: “Ulibulongo buyo, akooko kubulongo nkoelede kupiluka.”​—MATALIKILO 3:19.

Bantu bakabumbwaa bulongo. (Matalikilo 2:7; 3:19) Tatulii myuya ipoona mumibili yanyama. Tulizilenge zyamibili yanyama, nkikaako takwe cisyala kacipona kuti twafwa. Kuti twafwa boongo bwesu bulafwa alimwi miyeeyo yesu ilamana. Akambo kakuti bafwide takwe ncibezi, nkikaako takwe ncakaamba Lazaro atalaa kufwa kwakwe.​—Bala Intembauzyo 146:4; Mukambausi 9:5, 6, 10.

Lino Leza wempya bafwide kabelesya mulilo na? Mbukunga iBbaibbele lyaamba kuti bafwide takwe ncibeezi, injiisyo yakwempya bafwide mumulilo tensi yacoozyo pe nkaambo ibejelezya Leza. Aaka kaambo kalamusesemya.​—Bala Jeremiya 7:31.

Yeebela kavidiyo kategwa Bafwide Bali Muchiimo Chilibiyeni?

 3. Bafwide balakonzya kwambulaa ndiswe na?

Bafwide tabaambuli pe alimwi tabamvwi pe. (Intembauzyo 115:17) Pesi kuli bangelo babi, abo balakonzya kwaambulaa bantu kabacitaanga mbantu bafwide. (2 Petro 2:4) Jehova ulakasya kwambulaa bafwide.​—Bala Deuteronomo 18:10, 11.

4. Mbaani bayoobusigwa?

Bantu biingi bafwide balii mutubaanda bayoobusigwa mubuumi aanyika. Nikuba aabo bakafwa kabataazi atalaa Leza alimwi bakalikucita zintu zibi bayoobusigwa.​—Bala Luka 23:43; Incito 24:15.

Batakabusigwe bayookonzya kwiiya kasimpe atalaa Leza akutondezya lusyomo muliJesu kwiinda mukumuswiilila. (Ciyubunuzyo 20:11-13) Aabo batakabusigwe alimwi bakacite zintu ziluleme bayoobotelwaa buumi aanyika kukabe kutamani.​—Bala Johane 5:28, 29.

5. Lino bubuke butwambilaanzi atalaa Jehova?

Leza wakapa kuti cikonzyeke kubaa bulangilizi kubafu kwiinda mukutuma Mwanaakwe kuti azotufwide. Nkikaako bubuke bututondezya luyando lwaJehova aluse lwakwe lwiindilide. Ikuti bafwide babusigwa ngwaani loko nguyanda kuzoobona?​—Bala Johane 3:16; baRoma 6:23.