Skip to content

Skip to table of contents

 CHIIYO 39

Mwaami WamaIsrayeli Wakusaanguna

Mwaami WamaIsrayeli Wakusaanguna

Jehova wakasala babetesi bakali kuzulwida maIsrayeli pesi bakazooyanda kuba amwaami. Bakabuzya Samuyele kuti: ‘Zisi zyoonse zili kumbali lyesu zilaabaami. Andiswe tuyanda kuba amwaami.’ Samuyele wakabona kuti zintu nzibakaamba tazili kabotu, nkinkaako wakakomba kuli Jehova. Mpawo Jehova wakabuzya Samuyele kuti: ‘Teensi nduwe ngubakaka, pesi bakaka ndime kuti ndibe mwaami wabo. Babuzye kuti balakonzya kuba amwaami, pesi mwaami ooyo uyooyanda zintu zyiingi kulimbabo.’ Pesi bantu bakaamba kuti: ‘Tazitukataazyi pe eezyo. Tuyanda Mwaami luzutu!’

Jehova wakabuzya Samiyele kuti muntu utegwa Sawulu wakali kuyooba mwaami wakusaanguna. Sawulu naakaya kuRama kuyooswaya Samiyele, Samiyele wakananika Sawulu kuti abe mwaami kwiinda mukumutila mafuta amutwe.

Kuzwa waawo, Samiyele wakabungania maIsrayeli kuchitila kuti abatondeezye mwaami mupya. Pesi Sawulu teebakamubona pe. Ulizi na kuti nkamboonzi? Nkaambo wakayubide muzibbudu. Pesi nibakamubona Sawulu, bakamweeta akumwiimikizya akati kabantu. Sawulu wakali mulamfu kwiinda bantu boonse alimwi wakali mubotu loko. Mpawo Samiyele wakati: ‘Amubone muntu Jehova ngwasala.’ Mpawo bantu bakoompolola kabati: ‘Mwaami apone!’

Kumatalikilo, Mwaami Sawulu wakali kuswiilila Samiyele alimwi wakali kulibombya kuli Jehova. Pesi wakazoochincha. Muchikozyano, mwaami taakali kuzumizigwa pe kutuula zituuzyo. Muli chimwi chiindi, Samiyele wakabuzya Sawulu kuti amulinde, pesi Samiyele wakanoonoka kusika. Mpawo Sawulu wakasala kuumpa zituuzyo. Samiyele wakachita biyeni? Samiyele wakabuzya Sawulu kuti: ‘Weelede kuswiilila Jehova.’ Sawulu wakayiya na kukubisya kwakwe?

Chimwi chiindi, Sawulu naakaya kukulwana maAmalekki, Samiyele wakabuzya Sawulu kuti akabajaye boonse. Pesi Sawulu wakayeeya kutajaya Mwaami Agagi. Jehova wakabuzya Samiyele kuti: ‘Sawulu wandisampawula nkaambo waleka kundiswiilila.’ Samiyele wakawusa loko alimwi wakabuzya Sawulu kuti: ‘Jehova uyoosala umwi  muntu kuti abe mwaami nkaambo waleka kumuswiilila.’ Samiyele naakeenda, Sawulu wakajata chigogo chaSamiyele, mpawo chigogo chaSamiyele chakadeluka. Mpawo Samiyele wakabuzya Sawulu kuti: ‘Jehova wakunyanzya bwaami.’ Jehova wakasala umwi muntu uswiilila kuti abe mwaami.

‘Kuswiilila nkubotu kwiinda chipayizyo.’—1 Samuele 15:22