Skip to content

Skip to table of contents

 CHIIYO 41

Davida aSawulu

Davida aSawulu

Davida naakajaya Goliyati, Mwaami Sawulu wakamubikka kuba mupati wabasilumamba bakwe. Davida wakazunda nkondo zyiingi alimwi wakaba ampuwo. Chiindi choonse Davida naakali kuzwa kunkondo, bakayintu bakali kwiimba akuzyana kabati: ‘Sawulu wakajaya zyuulu pesi Davida wakajaya makumi aazyuulu!’ Sawulu wakaba abbivwe alimwi wakayanda kujaya Davida.

Davida wakali kukonzya kuuma kantimbwa. Limwi zuba Davida naakali kuumina Sawulu kantimbwa, mwaami Sawulu wakawaala sumu kuli Davida kayanda kumujaya. Pesi Davida wakaleya sumu mpawo lyakayasa amuduli. Sawulu wakeezya ziindi zyiingi kujaya Davida. Mpawo Davida wakachija akuyooyuba kunkanda.

Kuzwa waawo, Sawulu wakabweza basilumamba bali 3 000 kuti akayanduule Davida. Sawulu abasilumamba bakwe bakanjila mumpako yabbwe pati oomo Davida abeenzinyina mubakayubide. Baalumi bakali aDavida bakamubuzya  kuti: ‘Eechi nchechiindi chakujaya Sawulu.’ Mpawo Davida wakayubilila Sawulu akunenga chigogo chamwaami. Pesi Sawulu taakwe nchaakamvwa pe. Kuzwa waawo, Davida wakakataazikana kuti taakalemeka mwaami wakasalidwe aJehova. Wakakasya beenzinyina kuti batajayi Sawulu. Alubo, Davida wakiita Sawulu kalikumubuzya kuti wakali kunoomujaya nkaambo wakalaawo mweenya wakuchita oobo. Sawulu wakaleka na kuyanda kujaya Davida?

Peepe, Sawulu wakiinkilila kunembo akuyanduula Davida. Bumwi buzuba mansiku, Davida amujwaakwe Abbishayi bakasika kwakabede Sawulu abasilumamba bakwe kabaya buyubilila. Boonse bakali koona, naba Abbineri sikulinda Sawulu. Abbishayi wakati: ‘Ngoyu mweenya! Leka ndimujaye.’ Mpawo Davida wakati: ‘Jehova ulizi mbatakamuchite Sawulu. Atubweze sumu lyakwe akankuli kakwe kamaanzi tweende.’

Davida wakatanta ajulu achilundu chakalangene abusena kwakabede Sawulu. Wakati: ‘Abbineri, nkamboonzi nutakwabilili mwaami wako? Lili kuli sumu lyaSawulu akankuli kakwe kamaanzi?’ Sawulu wakaliziba jwi lyaDavida akumubuzya kuti: ‘Wayelede kundijaya sunu, pesi teewandijaya pe. Ndilizi kuti nduwe uutobela kuzooba mwaami wamaIsrayeli.’ Sawulu wakabweeda kumuunzi wakwe. Pesi teeboonse bamumpuli yaSawulu bakali kuzonda Davida.

“Anooli kwakonzeka, nkukuti mbuli mbumukonzya nubeni, amukalane abantu boonse caluumuno. Mutaliyi inkoto, nubayandisi, pele amulekele bukali bwa-Leza busena.”—BaRoma 12:18, 19