Skip to content

Skip to table of contents

 CHIIYO 100

Pawulu aTimotewo

Pawulu aTimotewo

Timotewo wakali mukubusi mumbungano yakuLustra. Wisi wakali muGrikki, banyina bakali muJuda. Banyina bakali kutegwa Yunisi abanyinakulu bakali kutegwa Loyisi bakamuyiisya atala aJehova kuzwa kachili muniini.

Mulweendo lwakwe lwachibili, Pawulu kaswayide kuLustra, wakabona kuti Timotewo wakali kubayanda bazyalwanyina akuti wakali achiyandisyo chakubagwasya. Pawulu wakakumbila Timotewo kuti bayinke aamwi. Pawulu wakayiisya Timotewo kuti akonzye kukambawuka akuyiisya makani mabotu.

Muuya uusalala wakagwasya Pawulu aTimotewo kufumbwa nkubakali kwiinka. Bumwi busiku, Pawulu wakabona chilengaano chamuntu wakamubuzya kuti ayinke kuMakkedoniya kuyoobagwasya. Pawulu, Timotewo, Sila aLukka bakayinkaamwi kuti bakakambawuke akuyootalisya mbungano.

Bantu biingi bakali kukkala kudolopo lyakuMakkedoniya litegwa Tesalonikka, bakaba maKristu. Pesi bamwi maJuda bakali kuzonda Pawulu abeenzinyina, bakaza abantu basilunya akutola Pawulu abeenzinyina kubeendelezi mpawo bakati: ‘Baalumi aaba bapapila mfulumende yaRoma!’ Mubusiku oobo, Pawulu aTimotewo bakachijila kuBbereya nkaambo bantu bakali kuyanda kubajaya.

Bantu bakuBbereya bakali achiyandisyo chakwiiya makani mabotu nkinkaako, maJuda amaGrikki bakaba basyomi. Pesi bamwi maJuda nibakasika kuTesalonikka bakapa kuti bantu batamvwanani, Pawulu wakayinka kuAtene. Timotewo aSila bakasyaala kuBbereya kuti basimye bazyalwanyina. Mukweenda kwachiindi, Pawulu wakatuma Timotewo kuTesalonikka kuti akagwasye bazyalwanyina mumapenzi ngibakali kuswaana. Nikwakiinda chiindi, Pawulu wakatuma Timotewo kuti akasimye mbungano zyiingi.

 Pawulu wakabuzya Timotewo kuti: ‘Bantu bayanda kukomba Jehova bayoopenzegwa.’ Timotewo wakapenzegwa alimwi wakasungwa akaambo kakuba alusyomo. Wakabotelwa nkaambo wakatondeezya kusyomeka kuli Jehova.

Pawulu wakabuzya mbungano yakuFilipi kuti: ‘Ndamutumina Timotewo. Uzoomuyiisya nchikwaamba kweenda mukasimpe alimwi uzoomuyiisya kukambawuka.’ Pawulu wakali kumusyoma Timotewo. Bakabelekaamwi kabali beenzinyina kwaminyaka miingi.

‘Nkaambo taakwe uumbi uuli amoyo uuli mbuli wakwe uyoomulangania. Nkaambo boonse bayeeya kuligwasya beni luzutu, tabayeeyi makani aaKristu Jesu pe.’—BaFilipi 2:20, 21