Skip to content

Skip to table of contents

 CHAANDANO 5

Mbotukonzya Kulyandaanyaa Nyika

Mbotukonzya Kulyandaanyaa Nyika

“Tamuli bayeeyi nyika.”—JOHANE 15:19.

1. Nkaakali kaambo nkaakasimya Jesu busiku bwamamanino kalaanyika?

MUBUSIKU bwakwe bwamamanino kalaanyika, Jesu wakatondeezya kukatazikana atalaa mazuba akalikutobela aabasikumutobela. Nkinkaako, wakakomba atalaa kaambo aako kuli Wisi kati: “Nsikumbili kuti ubagwisye munyika, pele kuti ubavune kulooyo mubi. Tabali banyika mbuli mbwentali wanyika amebo.” (Johane 17:15, 16) Mukukumbila kwakwe, Jesu wakatondeezya mbwaakali kubayanda basikumutobela ambwaakali kuyandika majwi aakwe ngakaamba busiku mbuboobu bwakumamanino kuli bamwi babo aakuti: “Tamuli bayeeyi nyika.” (Johane 15:19) Chilaantanganana kuti Jesu wakali kuyanda kuti basikumutobela balyandaanyaa nyika!

2. Njiili “nyika” yakali kwaambwaa Jesu?

2 “Nyika” njakalikwaamba Jesu, mbantu baanzenaa Leza, beendelezegwaa Saatani alimwi batondeezya muuya wakuliyanda awakulisumpula uuzwa kuli Saatani. (Johane 14:30; BaEfeso 2:2; 1 Johane 5:19) Chachoonzyo, “kutangana buzwalani anyika [eeyo], nkokulwana a-Leza.” (Jakobo 4:4) Pesi, chilakonzeka biyeni kuti aabo bayanda kukkala kabali muluyando lwaLeza balyandaanyaa nyika, pesi bo kabakkede mulinjiyo? Tuyoolanga-langa nzila zili musanu zitobela: kwiinda mukukkala kabasyomeka kuBwaami bwaLeza bweendelezegwaa Kristu akutatola lubazu  mutwaambo twachisi, kwiinda mukukaka muuya wanyika, kwiinda mukuzwata akulijata munzila ilaabulemu, kwiinda mukuubya buumi bwesu alimwi kwiinda mukubelesya zilwanyo zyoonse zyaLeza.

KUKKALA KATUSYOMEKA AKUTATOLA LUBAZU

3. (a) Jesu wakalaa maboneno aali biyeni atalaa twaambo twachisi? (b) Nkamboonzi nchokutegwa basikutobela Jesu bananike mbangambela? (Swaanizya amakani aali munsi.)

3 Mubusena bwakujatikizigwa mutwaambo twachisi muchiindi chakwe, Jesu wakabikkila maanu kumulimu wakukambawuka atalaa Bwaami bwaLeza, mfulumende yakujulu njakali kuyooba Mwaami wayo. (Daniele 7:13, 14; Luka 4:43; 17:20, 21) Nkinkaako, Jesu wakaambila Mweendelezi waRoma, Ponto Pilato, kuti: “Bwami bwangu tabuli bwaansi ano.” (Johane 18:36) Basikumutobela basyomeka abalabo batobelezya chikozyano chakwe kwiinda mukusyomeka kuli Kristu aBwaami bwakwe alimwi kwiinda mukwaambilizya atalaa Bwaami oobo munyika. (Matayo 24:14) Mwaapostolo Paulo wakalemba kuti: “Tulibangambela baKristo . . . Tulamukombelezya muzina lyaKristo kuti ‘amuyanzane a-Leza.’” *2 BaKorinto 5:20.

4. MaKristu woonse atondeezya biyeni kuti alasyomeka kuBwaami bwaLeza? (Langa kabbokesi  MaKristu Akusaanguna Taakali Kut̀ola Lubazu Pe.”)

4 Bangambela bayiminina nyika yabo kabali kuliimwi nyika, nkinkaako tabeelede kujatikizigwa mutwambo twachisi naa kutola lubazu munyika nkobabelekela. Pesi, bangambela basumpula mfulumende yachisi nchibayiminina. Mbumbubo, abaKristu bananike ‘balaamunzi uuli kujulu.’ (BaFilipi 3:20) Nkinkaako, tulakulumba  loko kusungwaala kwabo kukambawuka atalaa Bwaami nkaambo bagwasya mamiliyoni “[aa]mbelele zimwi” zyaKristu kuti ‘zyanzane a-Leza.’ (Johane 10:16; Matayo 25:31-40) Zimwi mbelele, zibeleka mbuli bagwasilizyi baKristu  kwiinda mukugwasya bananike baJesu. Mbuli katanga kamwi kabelekelaamwi mukusumpula Bwaami bwaMesiya, tubunga toonse ootu tubili tatutoli lubazu mutwaambo twachisi.—Bala Isaya 2:2-4.

5. Mbungano yachiKristu isiyene biyeni amaIsrayeli aachiindi, alimwi maKristu atondeezya biyeni kuti alisiyene amaIsrayeli aachiindi?

5 Kusyomeka kuli Kristu teenkako akalikke kaambo kapa kuti maKristu aachoonzyo atatoli lubazu mutwambo twachisi. Kusiyana amaIsrayeli aachiindi akapedwe nyika yabo aLeza, iswe tuli bazyalwanyina bajanika munyika yoonse. (Matayo 28:19; 1 Petro 2:9) Nkinkaako, ikuti twatola lubazu mutwambo twachisi, lwaangunuko lwesu lwakwaambuula atalaa Bwaami akujatana kwesu mbuli MaKristu kulakonzya kunyonganisigwa. (1 BaKorinto 1:10) Kuyungizya waawo, muchiindi chankondo, tunolwanaa bakombima, aabo mbotwakalayililwa kuti katubayanda lyoonse. (Johane 13:34, 35; 1 Johane 3:10-12) Nkinkaako, Jesu wakaambila basikwiiya bakwe kuti tebakeelede kulwana pe. Alubo, wakababuzya kuti bayande basinkondonyina.—Matayo 5:44; 26:52; langa kabbokesi katii “ Tanditoli Lubazu Na Mutwaambo Twachisi?

6. Kulyaaba kwako kuli Leza kweelede kupa kuti uzibone biyeni zintu ziyandwaa Kaesara?

6 Mbotuli maKristu aachoonzyo, twaabide buumi bwesu kuli Leza kutali kuluumwi muntu, kumbungano zyabantu naa kuliimwi nyika pe. Lugwalo lwa 1 BaKorinto 6:19, 20 lwaamba kuti: “Tamulivubi nubeni pe, nkaambo mwakaulwa muulo.” Nkinkaako, basikutobela Jesu bapa “Kaesara” nzyayanda zili mbuli kulemeka, kubbadala mitelo, kuzumina kweendelezegwa, pesi bapa ‘Leza zintu zyaLeza.’ (Marko 12:17; BaRoma 13:1-7) Eezi ziswaanizya bukombi bwabo, luyando lwabo luzwa aansi aamoyo akuswiilila chamoyo woonse. Ikuti kakuyandikana, balilipedelede kuti bafwe akaambo kaLeza.—Luka 4:8; 10:27; bala Incito 5:29; BaRoma 14:8.

 KUKAKA “MUUYA WANYIKA”

7, 8. “Muuya wanyika” niinzi, alimwi “ubeleka” biyeni mubantu bataswiilili?

7 Imwi nzila maKristu njaakonzya kulyandaanyaa nyika, nkukaka muuya wayo mubi. Mwaapostolo Paulo wakalemba kuti “Muuya ngututambwide teensi muuya waansi ano pe, ngu-Muuya uuzwa kuli-Leza.” (1 BaKorinto 2:12) Wakaambila bantu baku Efeso kuti: “Nzimwakali kweendela mulinzizyo insiku, cakutobela . . . zyaansi ano azyamweendelezi ujisi bwami bwakumuuwo, nguwenya muuya ubeleka sunu mumyoyo yabana bakasampusampu.”—BaEfeso 2:2, 3.

8 “Muuwo” naa muuya wanyika, manguzu ataboneki abeleka mubantu bataswiilili Leza alimwi apa kuti babaa “zisusi zyanyama niziba zisusi zyameso.” (1 Johane 2:16; 1 Timoteo 6:9, 10) “Bwami” bwamuuya ooyo, bulaboneka kwiinda mukupa kuti bantu babisye, bulakatazya kubuziba, bwiinkilila kunembo kabuliwo, alimwi bujanika koonse-koonse mbuli luuwo. Kuyungizya waawo, “ubeleka” mubantu bataswiilili kwiinda mukupa kuti bachite zintu zisulwaa Leza zili mbuli kuliyanda, kulisumpula, busyachivulemwaangu, akubaa muuya wakuyanda kulyeendelezya akupapila. * Mubufwiifwi, muuya ooyu wanyika upa kuti mizeezo yaDiabolosi ikomene mumyoyo yabantu.—Johane 8:44; Incito 13:10; 1 Johane 3:8, 10.

9. Muuya wanyika ulakonzya kunjila biyeni mumiyeeyo amumyoyo yesu?

9 Kujana muuya wanyika wanjila na mumiyeeyo amumoyo wako? Ikuti waleka kubamba moyo wako, muuya ooyo ulakonzya kunjila. (Bala Tusimpi 4:23.) Muuya ooyu ulakonzya kutalika buniini-buniini kwiinda mukumvwananaa bantu babonekaanga balikabotu pesi mubwini kabatamuyandi pe Jehova. (Tusimpi 13:20; 1 BaKorinto 15:33) Alubo,  muuya ooyu ulakonzya kunjila mumoyo wako kwiinda muponogilafi, mukubala mabbuku atali kabotu, mumawebbusayiti aabasilweeno, muli zyakulikondelezya zitali kabotu, mumisobano, alimwi nikuba kumuntu naa kuchintu chipa kuti ubaa miyeeyo yaSaatani.

10. Kujana twawukaka biyeni muuya wanyika?

10 Kujana twawukaka biyeni muuya wanyika akukkala katuli muluyando lwaLeza? Kwiinda mukubelesya  zintu zitugwasya mubukombi nzyatupa Jehova akukomba chakutaleka katukumbila muuya uusalala. Jehova ulaamanguzu kwiinda Diabolosi naa nyika yeendelezegwaa nguwe. (1 Johane 4:4) Eelyo kaka, chilayandikana kuti tukkale katukomba kuli Jehova!

KUZWAATA AKULIJATA MUNZILA ILAABULEMU

11. Muuya wanyika upa kuti bantu kabazwaata munzila ilibiyeni?

11 Nzila muntu njazwaataayo, njalijataayo abusanambi bwakwe zilakonzya kutondeezya muuya uliikumusololela. Mumasena miingi, bantu tabachizwaati kabotu zyakuti umwi sikwaambilizya makani aamuTV wakati lino-lino uyoobulika musiyano akati kabasibwaamu abantu buyo. Nikuba tumwi tusimbi tutanakubuka twaabutobelezya nzila eeyi yakuzwaata zyakuti limwi pepa-twaambo lyakati “twaabusiya mibili aanze alimwi twaabuzwaata munzila iitakwe bulemu.” Imwi nzila nkuzwaata munzila iitali kabotu, iitondeezya muuya wakupapila awakutalilemeka.

12, 13. Ngaali malayilile ayelede kutusololela kumakani aakuzwaata aakulijata?

12 Mbotuli babelesi baJehova, tuyanda kuboneka kabotu, kwiinda mukuzwaata munzila ilaabulemu, yeebeka kweendelanaa nkutubede. Chiindi choonse, nzila njotubonekaayo yeelede kutondeezya kuti tuzwaata ‘chakulibombya mbubonya mbokweelede, katulaachiwa chibotu . . . amilimo mibotu’ zyeelela kubaalumi naa kubanakazi, balyaamba kuti ‘mbana baLeza.’ Masimpe ngakuti, tatuzwaatili kweebwaa bantu pe, pesi, nchituyanda nkuti ‘tukkale katuli muluyando lwaLeza.’ (1 Timoteo 2:9, 10; Juda 21) Chachoonzyo, tuyanda kubikkila maanu kukuzwaata “kwamukati kamoyo uuyandika loko mumeso aa-Leza.”—1 Petro 3:3, 4.

13 Utalubi kuti nzila njituzwataayo anjitulijataayo ilakonzya kuchincha nzila bantu njobabonaayo bukombi bwakasimpe. Bbala lyachiGriki lyakuti “cakulibombya,”  lyaamba kulilemeka naa kulemeka nzila bamwi njobalimvwaayo anjobayeyaayo. Nkinkaako, tweelede kulemeka manjezeezya aabamwi. Kwiinda zyoonse, mbotuli babelesi baJehova, tuyanda kupa bulemu kuli nguwe akubantu bakwe, katuchita zintu zyoonse kuti kube “bulemu kwa-Leza.”—1 BaKorinto 4:9; 10:31; 2 BaKorinto 6:3, 4; 7:1.

Ino nzila njindibonekaayo ipa bulemu na kuli Jehova?

14. Njiili mibuzyo njitweelede kulibuzya atalaa nzila njituzwataayo anjotulijataayo?

14 Mbotuzwaata, mbotulijata abusanambi bwesu ziyandikana loko chiindi notuya mumulimu wakukambawuka naa kumiswaangano yachiKristu. Libuzye kuti: ‘Ino nzila njindizwataayo anjondilijataayo zipa kuti bantu bagambe na chiindi nibandibona? Zipa kuti bamwi babaa nsoni na? Ino ndilaandaba azyeelelo zyangu na kwiinda mikuli njindikonzya kubaayo mumbungano?’—Intembauzyo 68:6; BaFilipi 4:5; 1 Petro 5:6.

15. Nkamboonzi Bbayibbele nolitakwe milawu ilatalaa kuzwaata, kulijata abusanambi?

15 Bbayibbele talyaambili maKristu milawu yanzila njobeelede kuzwataayo, kulijataayo abusanambi bwabo. Jehova tatukasyi kubelesya manguzu eesu aakuyeeya alwaangunuko lwesu lwakulisalila. Kunze lyaboobo, uyanda kuti tube bantu basimide kuzintu zyabukombi kwiinda mukubelesya malayilile aazwa muBbayibbele alimwi tube  “amiyeeyo iyakaiisigwa kusala cibotu ecibi.” (BaHebrayo 5:14) Kwiinda zyoonse, uyanda kuti tusololelwe aaluyando, chaamba kuyanda Leza abantuma. (Bala Marko 12:30, 31.) Nkinkaako, kulinzila zisiyene-siyene zyakuzwaata akulijata. Eezi zilaboneka kwiinda mukuzwaata kweebeka kwabantu baJehova kufumbwa nkubaswaaninana munyika yoonse.

MBOTUKONZYA KUUBYA BUUMI BWESU

16. Muuya wanyika usiyene biyeni anjiisyo zyaJesu, alimwi njiili mibuzyo njotweelede kulibuzya?

16 Muuya wanyika uleena alimwi upa kuti bantu babonaanga mali azintu zyanyama nzizyo zibapa kubotelwa. Nikuba boobo, Jesu wakati: “Buumi bwamuntu tabuzwi kukuvuba kwazintu nzyajisi.” (Luka 12:15) Jesu taakakasya bantu kubaa zintu naa kubotelwa mubuumi, pesi wakayiisya kuti bantu babotelwa mbabaya ‘bazi kuti bayandika  zintu zyakumuuya,’ abaabo bawubya buumi bwabo ababikkila maanu kuzintu ziyandwaa Leza. (Matayo 5:3; 6:22) Libuzye kuti: ‘Ndilazisyoma na choonzyo zyakayiisigwa Jesu naa kuti ndilikweenwaa “wisi wababeja”? (Johane 8:44) Ino mbondaambuula, zyondipekeezya, zintu nzyondibikka mubusena bwakusanguna ambondipona zitondeezya kuti ndilimuntu ulibiyeni?’—Luka 6:45; 21:34-36; 2 Johane 6.

17. Wamba zimwi zilongezyo zijanwa abaabo bawubya buumi bwabo.

17 Jesu wakati: “Maanu alulamikwa kumilimo yao.” (Matayo 11:19) Yeeyesesya atalaa zilongezyo zijanwaa baabo bawubya buumi bwabo. Bajana kukatalukwa mumulimu waBwaami. (Matayo 11:29, 30) Tabalikatazyi pe, alimwi bachita zintu zitanyonganyi mizeezo yabo. (Bala 1 Timoteo 6:9, 10.) Balakkutisikana akubaa zintu ziyandikana mubuumi, alimwi bajana chiindi chakubaamwi ampuli zyabo achakubaa maKristunyina. Akaambo kazeezi, boona ng’onzi mbotu loko. (Mukambausi 5:12) Alubo, balabotelwa chiindi nibapa kufumbwa nchobakonzya. (Incito 20:35) “Balaabulangilizi,” balaaluumuno alimwi balakkutisikana mumyoyo yabo. (BaRoma 15:13; Matayo 6:31, 32) Eelyo kaka, zilongezyo eezi nzibotu loko!

BELESYA “ZILWANYO ZYOONSE ZYA-LEZA”

18. Bbayibbele limupandulula biyeni sinkondoma, nzila nzyabelesya alimwi “nkondo” njitulwana?

18 Aabo bakkala kabali muluyando lwaLeza, balaa bweenzinyina bulaa fwiifwi aLeza bubakwabilila kuli Saatani, utayandi kuti maKristu kabotelwa akuti akajane buumi butamani. (1 Petro 5:8) Paulo wakaamba kuti: “Inkondo njitulwa tiiensi yakulwana abantu balya maila, pe, njakulwana abeendelezi abami abasinguzu bamumudima waansi ano, tulalwana amyuuya yabubi iili mumyeenya yakujulu.” (BaEfeso 6:12) Bbala lyakuti “nkondo” litondeezya kuti tatulwanaa muntu ulikule naa ngututabwene, pesi, zyaamba  kulwanaa muntu ulaafwiifwi andiswe. Kuyungizya waawo, mabala aakuti “beendelezi,” “bami,” alyakuti “basinguzu” atondeezya kuti tulwanaa zilenge zyamuuya zichenjede loko.

19. Pandulula zilwanyo zyamaKristu zizwa kuli Leza.

19 Nokuba kuti tatumaninide pe alimwi tulaa mpotugolela, tulakonzya kuzunda. Kujana twazunda biyeni? Kwiinda mukubelesya “zilwanyo zyoonse zya-Leza.” (BaEfeso 6:13) Kalupandulula zilwanyo eezi, lugwalo lwa BaEfeso 6:14-18 lwaamba kuti: “Lino mbuboobo mbumweelede kwiima. Amulyaange kuzikungu lutambo lwalusinizyo akulisamika kucamba cikwabilizyo cabululami. Zituta zyanu zibambwe kukusamikwa a-Makani Mabotu aaluumuno. Kwiinda zyoonse amubweze intobo yalusyomo, njiyonya njimukonzya kuzimya mimvwi yoonse iipya iifuswa kumubi. Alimwi amubweze ingoani yalufutuko [naa bulangilizi bwalufutuko], apanga lya-Muuya, nkukuti ijwi lya-Leza. Amukombe lyoonse azikombyo ankumbizyo zyoonse zyamu-Muuya.”

20. Nkondo yesu isiyene biyeni ayabasilumamba banyika?

20 Mbukunga zilwanyo eezi zizwa kuli Leza, tulakonzya kuzwidilila kuti twazizwaata chiindi choonse. Kusiyana abasilumamba banga bapumuna chiindi nikwaba luumuno munyika yabo, nkondo yamaKristu tiyimikilwi pe mane do Leza aakunyonyoona nyika yaSaatani akuwalila bangelo babi mumulindi uutagoli. (Ciyubunuzyo 12:17; 20:1-3) Nkinkaako, utateyi mulenga chiindi nolwanaa kuleezya kwako naa zisusi zibi, nkaambo toonse tweelede “kumizya” mibili yesu kuti tukkale katusyomekede kuli Jehova. (1 BaKorinto 9:27) Chachoonzyo, tweelede kulikatazya chiindi notutali kulwana!

21. Kujana twazunda biyeni munkondo yesu yakumuuya?

21 Kuyungizya waawo, tatukonzyi kuzunda nkondo eeyi amanguzu eesu. Aboobo, Paulo wakatuchenjezya kuti tweelede kukomba kuli Jehova “ankumbizyo zyoonse zyamu-Mu uya.” Kuchiindi nchicheecho, tweelede kuswiilila Jehova kwiinda mukubala Jwi lyakwe akuyanzana ‘abasilumambama’ chiindi choonse, nkaambo tatulaatulikke pe kukulwana nkondo eeyi! (Filimoni 2; BaHebrayo 10:24, 25) Aabo basyomeka muzyiimo eezi zyoonse bayoozunda alimwi bayookonzya kwiiminina lusyomo lwabo chiindi nolusunkwa.

KKALA KULIBAMBILIDE KUKWABILILA LUSYOMO LWAKO

22, 23. (a) Nkamboonzi notweelede kukkala katulibambilide kwiiminina lusyomo lwesu, alimwi njiili mibuzyo njotweelede kulibuzya? (b) Nkakaali kaambo nkituyoolanga-langa muchaandano chitobela?

22 Jesu wakaamba kuti: “Tamuli bayeeyi nyika . . . nkakaambo ako inyika nciimusulide.” (Johane 15:19) Nkinkaako, maKristu ayelede kukkala kalibambilide kwiiminina lusyomo lwawo chakulemeka achamoyo mutete. (Bala 1 Petro 3:15.) Libuzye kuti: ‘Ndilamvwisisya na kuti nkamboonzi chimwi chiindi Bakamboni baJehova nobachita zintu zisiyene abamwi bantu? Chiindi nondili mubuyumu-yumu ndilaamasimpe na aakuti zyambwa muBbayibbele, azyambwaa muzike uusyomeka zililuleme chiindi choonse? (Matayo 24:45; Johane 17:17) Alubo, chaboola kumakani akuchita zintu zibotezya Jehova, ndilabotelwa na kuti ndilisiyene abamwi bantu?’—Intembauzyo 34:2; Matayo 10:32, 33.

23 Nikuba boobo, kulyandaania kwesu anyika kulakonzya kusunkwa munzila zimwi zisiyene-siyene. Muchikozyano, mbuli mbukwambwa kale kumatalikilo, Diabolosi ulikweena babelesi baJehova kwiinda muzintu zyakulikondelezya zijanika munyika. Kujana twasala biyeni zyakulikondelezya zili kabotu zikonzya kupa kuti tukkale katulaa manjezeezya aali kabotu? Tuyoolanga-langa kaambo aaka muchaandano chitobela.

^ par 3 Kuzwa mubuzuba bwaPentekoste 33 C.E., Kristu wakatalika kubeleka mbuli Mwaami wambungano yabasikumutobela bananike balaa nyika. (BaKolose 1:13) Mu1914, Kristu wakatambula manguzu aakweendelezya “bwami bwaansi.” Aboobo, maKristu ananikidwe aamuuya uusalala alawo alikubeleka mbuli bangambela baBwaami bwaMesiya.—Ciyubunuzyo 11:15.

^ par 8 Langa bbuku litegwa Reasoning From the Scriptures, aapeji 389-393, lyakapupululwaa Bakamboni baJehova.