Skip to content

Skip to table of contents

Lugwalo Luzwa kuKabunga Keendelezya

Lugwalo Luzwa kuKabunga Keendelezya

Kulinduwe Nuuyanda Jehova:

Jesu wakaamba kuti: “Muyooziba bwini, abwalo bwini buyoomunununa.” (Johane 8:32) Majwi aaya alasungwaazya kaka! Masimpe, kulakonzeka kuti uzibe kasimpe nikuba katupona ‘mumazuba aamamanino’ aakataazya aazwide twaambo twakubeja. (2 Timoteo 3:1) Uchiyeeyede na chiindi nowakatalika kumvwisisisya kasimpe kazwa muJwi lyaLeza? Eezi zyakali kubotezya loko!

Nikuba kuti kulayandikana kubaa luzibo lwakasimpe akubuzya bamwi atalaa nkako, andiswe tweelede kupona kweendelana zyaambwaa kasimpe aako. Kuti tuchite oobo, tweelede kukkala katuli muluyando lwaLeza. Kuchita oobo kuswaanizyaanzi? Nsandulo yamubuzyo ooyu ijanika mumajwi akaambulwaa Jesu mubusiku bwamamanino katanafwa. Wakabuzya baapostolo bakwe basyomeka kuti: “Mwanoobamba milao yangu, munookalilila muluyando lwangu, mbubonya mbwembamba milao ya-Taata, akukalilila muluyando lwakwe.”—Johane 15:10.

Jesu wakakkala kali muluyando lwaLeza kwiinda mukubamba milawu yaWisi. Andiswe tweelede kuchita oobo. Ikuti tukkale katuli muluyando lwaLeza, tweelede kupona kweendelana akasimpe. Mubusiku mbuboobo, Jesu wakaamba kuti: “Mwanoozizi zintu ezi, muli acoolwe mwanoozicita.”—Johane 13:17.

Tusyoma kuti bbuku eeli liyookugwasya kuti wiinkilile kunembo kubelesya kasimpe mubuumi bwako alimwi ukkale “muluyando lwa-Leza . . . lutola kubuumi butamani.”—Juda 21.

Kabunga Keendelezya kaBakamboni baJehova