Skip to content

Sena Ulayanda Kuziba Nsandulo Zyakasimpe Kumibuzyo Ilaansi Awa?

Sena Ulayanda Kuziba Nsandulo Zyakasimpe Kumibuzyo Ilaansi Awa?

Eeyi njimwi yamibuzyo iyandika loko bantu biingi njobabuzya. Amwi anduwe ngawasikilwa mibuzyo ili mbuli yeeyi mumizeezo yako:

  • Sena Leza ulandaba andiswe ncobeni?

  • Inkondo amapenzi zizoomana na?

  • Nkookuli nkotuya kuti twafwa?

  • Tulabulangilizi na bwakuti bafwide bayoobusigwa?

  • Kujana ndakomba biyeni kuti Leza kandimvwa?

  • Ndilakujana biyeni kubotelwa mubuumi?

Nkookuli nkunga ulajana nsandulo zyamibuzyo eeyi? Wayinka mumaanda alondola mabbuku, naa muzintoolo muuzigwa mabbuku, ulakonzya kujana zyuulu zyamabbuku atii alakonzya kupa nsandulo. Nokuba boobo, kiingi-kiingi alakazyanya. Amwi alakonzya kubonekaanga alabeleka kwaciindi eco, pesi nokwayinda ciindi nga tacibeleki pe. Balakonzya kwaalembulula naa kulemba aambi.

Pesi, kuli bbuku lyomwe buyo lijisi nsandulo zigwasya loko. Elyo bbuku talibeji pe. Jesu Kristo kakomba kuli Leza wakati: “Ijwi lyako mbobwini.” (Johane 17:17) Mazuba ano elyo jwi litegwa ndiBbaibbele lisalala. Lyo Bbaibbele lijisi nsandulo zimvwisisika zyakasimpe zyamibuzyo ilaajulu. Mumapeji atobela, ulajana buce buyo bwa nsandulo eezyo.

 Sena Leza Ulandaba Andiswe Ncobeni?

CIPA KUTI BANTU BABUZYE MUBUZYO OYU: Tupona munyika izwide lunya akutalulamika. Zimwi zikombelo ziyiisya kuti mapenzi ngotuswaana nkuyanda kwa Leza.

NZYOLIYIISYA BBAIBBELE: Leza taciti zibi. Lugwalo lwa Jobu 34:10 lwamba kuti: “Kacili kule aLeza kuti acite bubi, AkuliSinguzuzyonse kuti alubizye.” Akambo kaluyando lwakwe, Leza ulamabambe mabotu kujatikizya bantu. Nkakaambo kaako Jesu wakatuyiisya kukomba kuti: “Taateesu ooli kujulu, . . . Abuze Bwami bwako, Alucitwe luyando lwako, Ansi ano mbubonya mbuli kujulu.” (Matayo 6:9, 10) Leza ulandaba andiswe loko izyakuti wakacita kufumbwa zyoonse nzyakonzya kuti mabambe aakwe azuzikizigwe.Johane 3:16.

Bala lubo Matalikilo 1:26-28; Jakobo 1:13; a 1 Petro 5:6, 7.

Inkondo Amapenzi Zizoomana Na?

CIPA KUTI BANTU BABUZYE MUBUZYO OYU: Bantu biingi balokufwa akaambo kankondo zitamani. Alimwi toonse tulajatikizigwa mumapenzi ngobaswaana bantu.

NZYOLIYIISYA BBAIBBELE: Leza wakaambilizya ciindi nayoyeta luumuno munyika yoonse mbiizulwa. MuBwami bwakwe, oobo buli mfulumende yakujulu, bantu “tabakooyooyiya inkondo limbi pe.” Pesi, “bayoofula mapanga aabo abe maamba aakulimya.” (Isaya 2:4) Leza uyaa kumaninsya kutalulamisya koonse amapenzi oonse. IBbaibbele lisyomezya kuti: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale [zibikkilizya kutalulamika amapenzi aliko sunu] zyamaninina.”Ciyubunuzyo 21:3, 4.

Bala lubo Intembauzyo 37:10, 11; 46:9; a Mika 4:1-4.

Nkookuli Nkotuya Kuti Twafwa?

CIPA KUTI BANTU BABUZYE MUBUZYO OYU: Zikombelo ziingi munyika ziyiisya kuti muntu nafwa muuya wakwe taufwi pe, ulendelela kaupona. Bamwi basyoma kuti bantu bakafwa balakonzya kucisa baumi. Alubo basyoma kuti Leza weempya bantu babi akutamani kabawalila mumulilo waku gehena.

NZYOLIYIISYA BBAIBBELE: Ikuti muntu wafwa ngataciwo pe. Lugwalo lwa Mukambausi 9:5 lwaamba kuti: “Bafwide tabezi cintu niciba comwe.” Mbukunga bafwide takwe ncibazi, naakumvwa, nikuba kucita cimwi cintu mubuumi, tabakonzyi kucisa baumi naakubagwasya.Intembauzyo 146:3, 4.

Bala lubo Matalikilo 3:19 a Mukambausi 9:6, 10.

 Tulabulangilizi Na Bwakuti Bafwide Bayoobusigwa?

CIPA KUTI BANTU BABUZYE MUBUZYO OYU: Tuyanda kupona katubotelwa mubuumi antoomwe ababo mbituyanda. Ikweelana ambutwakazyalwa, tulangilila kubona lubo bayandwa besu bakafwa.

NZYOLIYIISYA BBAIBBELE: Bantu biingi bakafwa bayoobusigwa. Jesu wakasyomezya kuti: “Abo boonse ibali muzyuumbwe bayoomvwa ijwi lyakwe akuzwa mulinzizyo.” (Johane 5:28, 29) Ikweelana amabambe aLeza akumatalikilo, aabo bayoobusigwa bayooba acoolwe cakupona munyika iliparadaiso. (Luka 23:43) Ezi zisyomezyo ziswanizya kuzoba amibili itakwe malwazi alimwi abuumi butamani kuli boonse baswiilila. IBbaibbele lyamba kuti: “Balulami bayookona nyika, Bayookala alinjiyo lyoonse.”Intembauzyo 37:29.

Bala lubo Jobu14:14, 15; Luka 7:11-17; a Incito 24:15.

Kujana Ndakomba Biyeni Kuti Leza Kandimvwa?

CIPA KUTI BANTU BABUZYE MUBUZYO OYU: Bantu muzikombelo zyoonse balakomba. Pesi biingi babona kuti inkombyo zyabo tazisandulwi pe.

NZYOLIYIISYA BBAIBBELE: Jesu wakatuyiisya kuti tutanoindululi inkombyo zilembedwe, naa kuzijata amutwe buyo. Wakamba kuti: “Mukukomba kwanu mutaindululi.” (Matayo 6:7) Ikuti katuyanda kuti Leza aswiilile nkombyo zyesu, tweelede kukomba munzila itambulika kulinguwe. Ikuti tukonzye kucita oobo, tweelede kwiiya nzyayanda Leza, akukomba kweendelana anzinzyo. Lugwalo lwa 1 Johane 5:14 lupandulula obu: “Na twakumbila kufumbwa cintu cili buti cili mbuli makanze [naa kuti mabambe] aakwe, ulatumvwa.”

Bala lubo Intembauzyo 65:2; Johane 14:6, 14; a 1 Johane 3:22.

Ndilakujana Biyeni Kubotelwa Mubuumi?

CIPA KUTI BANTU BABUZYE MUBUZYO OYU: Bantu biingi basyoma kuti mali, mpuwo, naa kubota zipa kuti babotelwe. Mpawo nibayandula akuzijana zintu eezi, babona kuti kubotelwa tebakujana pe.

NZYOLIYIISYA BBAIBBELE: Jesu wakaamba cinga cilatugwasya kujana kubotelwa nakatii: “Balikkomene aabo bazi kuti bayandika zintu zyakumuuya.” (Matayo 5:3, Busanduluzi bwa Nyika Mpya) Ikuti tujane kubotelwa kwacoonzyo tweelede kucita cintu ciyandikana loko mubuumi. Cintu eco nkwiiya kasimpe atala aLeza amabambe akwe kulindiswe. Kasimpe ako kajanika muBbaibbele. Kukaziba kutugwasya kuziba zintu ziyandikana loko azitayandikani loko. Ikuti twatobelezya coonzyo camuBbaibbele notusaluzya zyakucita, tulabotelwa loko mubuumi.Luka 11:28.

Bala lubo Tusimpi 3:5, 6, 13-18 a 1 Timoteo 6:9, 10.

 Mubufwiifwi twalanga-langa nsandulo zice buyo zyamu Bbaibbele zyamibuzyo iilimusanu aumwi. Ulayanda na kuziba ziingi? Ikuti kuluumwi wabantu “bayandika zintu zyakumuuya” tusyoma kuti ulayanda kuziba ziingi. Amwi anduwe ngawayeeya mibuzyo iilimbuli eeyi: ‘Ikuti Leza kalaandaba andiswe, nkaambonzi ncaazumizya bubi amafwabi kuzwa ciindi? Kujana ndacita biyeni kuti impuli yangu ibotelwe loko?’ IBbaibbele lipa nsandulo zizwide azijata moyo kumibuzyo eeyi aimwi.

Pesi biingi balayowa kubala Bbaibbele. Balibona kalili bbuku pati loko alimwi jumu kulimvwisisisya. Sena ulayanda lugwasyo lwakujana nsandulo mu Bbaibbele? Bakamboni baJehova balakonzya kukupa zibelesyo zyobilwe zinga zilakugwasya.

Cibelesyo cakutanguna ndibbuku litegwa, IBbayibbele Nga Lilatuyiisyaanzi? Lyakalembwa munzila iipa kuti ligwasye nikuba abaabo bajatikene kuti balangisisye nsandulo zimvwisisika zyamibuzyo iyandika loko. Cibelesyo cabili mabambe atabbadalwi aakwiiya Bbaibbele kumaanda. Umwi waBakamboni baJehova wakulubazu nkukkala, ulakonzya kukuswaya kun’anda yako na kulibumwi busena nkujanika. Munoyizya makani amuBbaibbele kwacindi cifwifwi buyo mviki imwi aimwi. Aaya mabambe agwasya mamiliyoni abantu munyika yoonse. Ibiingi kababoteledwe bakati: “Ndakajana kasimpe!”

Takwe lumwi lubono ndotukonzya kujana ilwiinda kasimpe kamuBbaibbele. Kalatwangununa kukusyoma zintu zyamizimu, kunjisyo zinyonganya akukuyowa zintu zitawo. Katupa bulangilizi, mabambe mubuumi alimwi akubotelwa. Jesu wakati: “Alimwi muyooziba bwini, abwalo bwini buyomunununa.”Johane 8:32.