Skip to content

Skip to table of contents

 CHIIYO 11

Nkaambo Nzi Nitunjila Miswaangano Mipati?

Nkaambo Nzi Nitunjila Miswaangano Mipati?

kuMexico

kuGermany

kuBotswana

kuNicaragua

kuItaly

Nkaambo nzi bantu aaba nibaboteledwe? Bali kuli umwi wamiswaangano yesu mipati. Mbuli babelesi baLeza baciindi, bakalayililwa kuti kababungana tutatu mumunyaka. Toonse tulangilila kubungana katuli nkamu mpati. (Deuteronomo 16:16) Munyaka amunyaka, tulaa miswaangano iitatu, iibili miswaangano yabbazu yabuzuba bumwi, alimwi amuswaangano wabbooma wamazuba aatatu. Tugwasigwa biyeni kumiswaangano eeyi?

Isimya buzyalwama bwesu bwabunaKristu. Tulabotelwa andiswe kumukomba antoomwe muziindi zibotu mbuli maIsrayeli mbubakasekelela kulumbayizya Jehova “akati kambungano.” (Intembauzyo 26:12; 111:1) Miswaangano eeyi itupa ciindi cakuliswaanizya abamwi Bakamboni bazwa mumbungano zisiyene-siyene naa kuli zimwi nyika. Isikati tubotelwa kulya antoomwe kumiswaangano, eezi zipa kuti kube muuya waluyando. (Incito 2:42) Kumiswaangano eeyi tujana luyando lutuswaanizya ‘aciinga coonse cabakwesu cilimunyika yoonse.’​—1 Petro 2:17.

Itugwasya kwiinkilila kunembo kumuuya. MaIsrayeli bakagwasigwa kwiinda “mukumvwisya majwi” aaMagwalo ngibakapandulidwa. (Nehemiya 8:8, 12) Andiswe tulatambula malayilile aamuBbaibbele ngitujana kumiswaangano mipati. Ipulogilamu imwi ayimwi iyeeme aamutwe uuzwa muMagwalo, kwiinda munkani zinoneezya, makani aakusiilana, alimwi azitondeezyo. Twiiya kucita kuyanda kwaLeza mubuumi bwesu. Tulasungwaazigwa nitumvwa izyakuluula zyabaabo ibakazwidilila akulisimya mubuyumu-yumu mbubakaswaana, aakaambo kakuba maKristu muziindi eezino zikataazya. Kumiswaangano yabbooma, zisobano zisaanwa kabazweete mbuli baciindi, zipa kuti izili muBbaibbele zibe zyacoonzyo kuli ndiswe akuti tuzisyome.Kumiswaangano yoonse, nga kwaba kubbabbatizigwa. kwabaabo bayanda kutondeezya kulipeda kwabo kuli Leza

  • Nkaambo nzi ziindi zyamiswaangano nizili ziindi zibotezya?

  • Kujana twagwasigwa biyeni mukunjila miswaangano mipati?