Skip to content

Skip to table of contents

 CHIIYO 12

Mulimu Wesu Wakukambawuka Bwaami Weendelezegwa Biyeni?

Mulimu Wesu Wakukambawuka Bwaami Weendelezegwa Biyeni?

kuSpain

kuBelarus

kuHong Kong

kuPeru

Kali wabaa fwiifwi kuya kukufwa, Jesu wakaambilizya kuti: ‘Aaya makani mabotu aaBwaami ayookambawukwa munyika yoonse kuti bukabe bumboni kumasi oonse mpoonya mamanino ayoosika.’ (Matayo 24:14) Mulimu ooyu wakukambawuka munyika yoonse wakali kuzoozuzikizigwa biyeni? Kwiinda mukutobelezya cikozyano caJesu ncaakatusiila kacili aanyika.—Luka 8:1.

Tweezya kwiinkila bantu kumaanda aabo. Jesu wakayiisya basikwiiya bakwe kukambawuka makani mabotu kun’anda an’anda. (Matayo 10:11-13; Incito 5:42; 20:20) Bakambuwusi bamumwaanda wakusanguna bakapegwa busena mbubakeelede kukambawukila. (Matayo 10:5, 6; 2 baKorinto 10:13) Mbuli mbutucita mazuba aano, mulimu wesu wakukambawuka weendelezegwa kabotu, alimwi imbungano imwi ayimwi ilapegwa ndawu yakubelekela. Eezi zipa kuti tuzuzikizye malayilile aaJesu ‘aakukambawukila bantu akupa bumboni cakulomya.’—Incito 10:42.

Tuleezya canguzu kuyanduula bantu kufumbwa nkubajanika. Jesu wakatondeezya cikozyano cibotu aawo naakali kukambawukila kujanika bantu biingi, mbuli kumbali aalwizi naa kuzikala nkubakali kutekela maanzi. (Marko 4:1; Johane 4:5-15) Andiswe tulaambuuzyania abantu Bbaibbele aawo mputukkwanisizya mbuli mumigwagwa, mumasena aakuzizya, mumasena aakulyookezezya, naa kwiinda mufooni. Tulakambawuka lubo kuli basimayakilane, mbitubelekaabo, mbitwiiyaabo, alimwi abazibbululu kuti katulaacindi cakucita oobo. Kubelekela aamwi ooku, kwakapa kuti mamiliyoni aabantu munyika yoonse bamvwe ‘makani mabotu aalufutuko.’—Intembauzyo 96:2.

Kuli mbuyanda kuzoobuzya makani mabotu aaBwaami bwaLeza na, akuti aambaanzi mubuumi bwabo? Utaleki mulumbe wabulangilizi mulinduwe, pesi utayumini pe ambuuzyania ambabo cakufwambaana mbuli mbukonzya!

  • Ngaali “makani mabotu” ayelede kukambawukwa?

  • Bakamboni baJehova baliikucitobelezya biyeni cikozyano caJesu cakukambawuka?