“Uye a nga va vanga guhegulani a di va wumba mwama ni nyamayi.”Matewu 19:4

Jehovha * Nungungulu tshadhiside mwama ni nyamayi nya gupheye. Bhibliya yari khiyo uye wumbide nyamayi nya gupheye a ‘mu bikeya [“resa,” Tradução do Novo Mundo] ga mwama.’ Adhamu a di tsaka ngudzu gu kala a ganeya gu khuye: ‘Oyu khu lisine muthu a giridwego khu sirambu sangu ni tshonge yangu.’ (Tumbunuko [Genesisi] 2:22, 23) Jehovha a ngu gu vbweta gu khuye vathu va dzeganego va tsaka.

Wa gu ba nu ngu gu tshadha, si nga gira gu u pimisa gu khuwe satshavbo si na gimbiya gwadi. Khu lisine, ambari mwama ni ngadzi va haladzanago kamwe khu myonyo yawe yatshavbo va na ni sigaradzo nya gu kari. (1 Vakorinto 7:28) Omu nya bruxura yeyi u na mana matshina nya milayo nya Bhibliya aya, wa gu ma thumisa, ma kodzago gu phasa wugadzi ni ndranga yago gu mana litsako.Ndzimo 19:9-12.

 1 DZUMEYA GIPANDRE U NINGIDWEGO KHU JEHOVHA

NGA WONA ESI BHIBLIYA YI SI GANEYAGO: Mwama khuye hungo nya ndranga.—Vaefeso 5:23.

Wa gu ba na u ri mwama a dzegidego, Jehovha a gu lindreya gu khuye u khathaleya mwangadzi wago khu ndruda. (1 Pedro 3:7) Uye mu giride kha nga mubangaladzi mwendro muvbedzisisi wago, nigu a gu vbweta gu khuye u mu phara khu ndziya nya githawo ni lihaladzo. (Tumbunuko 2:18) Uwe u fanede gu haladza ngudzu mwangadzi wago avba nya gu u dzi emiseya gu thangisa misuvo yaye guvbindra eyi yago.—Vaefeso 5:25-29.

Wa gu ba na u ri mwangadzi, Jehovha a gu lindreya gu khuye u ninga githawo nya gikhongolo mwama wago ni gu mu phasa gu tadzisa gipandre gyaye. (1 Vakorinto 11:3; Vaefeso 5:33) Seketeya esi a si hungago ni gu mu phasedzeya khu monyo wago watshavbo. (Vakolosi 3:18) Wa gu gira isoso, u na wonega na u gu tsakisa mahoni ga mwama wago ni ga Jehovha.1 Pedro 3:1-6.

GIRA KHARATI:

  • Wudzisa oyu u dzeganego naye gu khuwe ginani u fanedego gu gira gasi u khala mwama mwendro mwangadzi nya wadi. Engiseya gwadi, u gira esi u si kodzago gasi gu tshukwadzisa

  • Timiseya. Si na dzega tepo gasi gu mwa vavili mu hevbula dzindziya nya gu tsakisane

2 THEYA NGUDZU KOTA KHU GUDZIPWA GA OYU U DZEGANEGO NAYE

NGA WONA ESI BHIBLIYA YI SI GANEYAGO: Gu vbwetega u khathaleya misuvo ya oyu u dzeganego naye. (Vafilipi 2:3, 4) Mu phare kha nga muthu nya lisima, nu gu dundruga gu khuwe Jehovha o vbweta gu khuye sithumi saye si “pwanana ni vathu vatshavbo khu githawo.” (2 Thimoti 2:24) “Gu ganeya nya mba pimisisa gu ngu paya kha nga supada, ganiolu lidimi la muthu nya guti li ngu vbanyisa.” Khu kharato hatha gwadi malito yago. (Mavingo 12:18) Liphuvbo la Jehovha li na gu phasa gu ganeya khu ndruda ni lihaladzo.Vagalatiya 5:22, 23; Vakolosi 4:6.

GIRA KHARATI:

  • Gombeya ga Jehovha u lomba gu rula monyo ni gu tula mapimo yago na u si gu bhudzisani khu silo nya lisima noyu u dzeganego naye

  • Pimisisa gwadi esi u na si ganeyago ni edzi u na si ganeyago khidzo

 3 HENGEYANI MAPIMO

NGA WONA ESI BHIBLIYA YI SI GANEYAGO: Tepo u tshadhago, wa gu khala “nyama mweyo” ni oyu u dzeganego naye. (Matewu 19:5, NM) Ganiolu enu mu ngari vathu vavili, nigu si nga kodzega gu mu manega ni mawonelo nya gu hambane. Khu kharato gu vbwetega mu hevbula gu pwananisa mapimo ni gudzipwa gwanu. (Vafilipi 2:2) Gupwanana gilo nya lisima ngudzu tepo mu hungago silo. Bhibliya yari khiyo: “Makungu ma na tiya khu gu bhudzisana” (Mavingo 20:18) Dzumeyani gu thangedwa khu matshina nya milayo nya Bhibliya tepo mu khalago gumogo mu hunga silo nya lisima.Mavingo 8:32, 33.

GIRA KHARATI:

  • Bhuleya oyu u dzeganego naye khedzi u dzi pwago khidzo, na siri basi gu mu embeya mahungu ni mawonelo yago

  • Bhudzisana ni oyu u dzeganego naye na u si gu dzi emiseyi gu gira silo

^ par. 4 Jehovha khilo lina la Nungungulu kha nga edzi li tshamusedwago khidzo omu nya Bhibliya.