Skip to content

Skip to secondary menu

Skip to table of contents

Dzifakazi dza Jehovha

Gitonga

Mahungu nya yadi ya Nungungulu!

 GIHEVBULO 10

U nga wuti kharini wukhozeli nya lisine?

U nga wuti kharini wukhozeli nya lisine?

1. Wukhongeli wumowo basi nya lisine wu gomogo?

“Dzi woneyeni vaprofeti nya malipha.” — MATEWU 7:15.

Jesu hevbudzide valandreli vaye wukhongeli wumowo basi, a gu wukhongeli nya lisine. Uwo wa gu fanana ni ndziya yi yisago guvbanyani nya gupindruge. Jesu a di khuye: ‘Vadugwana va beyago’ khu ndziya yoyo. (Matewu 7:14) Nungungulu a gu dzumeya basi wukhozeli wu seketedwago Litoni laye nya lisine. Vakhozeli vatshavbo nya lisine va tshanganisidwe khu gukhodwa gumogo. — Hevbula Johane 4:23, 24; 14:6; Vaefeso 4:4, 5.

2. Ginani a nga ganeya Jesu khu maKristo nya malipha?

“Vari khavo va ngu muti Nungungulu, aholu mithumo yawe yi ngu va ganedza.” — TITO 1:16.

Jesu gengedzide vathu khu gu khuye vaprofeti nya malipha va na nyenyezisa wuKristo. Khu vbavbandze, avo va gu wonega kha nga vakhozeli nya lisine. Dzitshetshe dzawe dza gu dzi rana gu khidzo khya wuKristo. Ganiolu u nga vati vathu vovo khedzi khu lisine va gu idzo. Khu ndziya muni? Wukhozeli nya lisine khuwo basi wu velegago maKristo nya guvbeleye ma tivegago khu makhalelo ni mavbanyelo yawe. — Hevbula Matewu 7:13-23.

3. U nga vati kharini vakhozeli nya lisine?

Khu siyeyedzo sesi nya livbandre:

  • Vakhozeli nya lisine va gu ninga githawo Bhibhiliya kha nga Lito la Nungungulu. Avo va gu dzi garadzeya gu vbanya khu gu landra matshina nya milayo nya Bhibhiliya. Khu kharato, wukhongeli nya lisine wu ngu hambana ni wukhongeli wu seketedwago khu mapimo nya vathu. (Matewu 15:7-9) Vakhozeli nya lisine kha va  tshumayeli gilo gimwegyo va gira gimbe. — Hevbula Johane 17:17; 2 Thimoti 3:16, 17.

  • Valandreli nya lisine va Jesu va ngu zundza lina na Nungungulu, Jehovha. Jesu zundzide lina la Nungungulu khu gu li tivegisa. Uye phaside vathu guti Nungungulu a bwe a va hevbudza gu lombeleya gu khavo lina la Nungungulu li agiswa. (Matewu 6:9) Khu wevbi wukhongeli wu tivegisago lina la Nungungulu omu u khalago umo? — Hevbula Johane 17:26; Varoma 10:13, 14.

  • Makristo nya lisine ma ngu tshumayela Mufumo wa Nungungulu. Nungungulu rumede Jesu gu ta tshumayela mahungu nya yadi nya Mufumo. Mufumo wa Nungungulu khuwo basi wu na vbedzago sigaradzo nya vathu. Jesu ganede khuwo kala litshigu a ngafa. (Luka 4:43; 8:1; 23:42, 43) Uye gambe a di khuye valandreli vaye va na tshumayela Mufumo wowu. Wa gu hidzimeledwa khu muthu gasi gu gu bhuleya khu Mufumo wa Nungungulu, khu mawonelo yago, a gu lumba wukhongeli muni? — Hevbula Matewu 24:14.

  • Valandreli va Jesu kha va giri gipandre nya litigo leli nya guvivbe. Uwe u nga vati kholu va si dzi bedzigo mayungani nya vathu ni politika. (Johane 17:16; 18:36) Gu diga isoso, avo kha va pimedzeyi mavbanyelo ni mithumo nya mhango nya litigo leli. — Hevbula Jakobe 4:4.

  • Makristo nya lisine ma ngu haladzana nya dzadi. Ayo ma gu hevbudzwa khu Lito la Nungungulu gu yeyedza githawo ga vathu nya mafumbu yatshavbo. Ambari olu tepo nya yingi wukhongeli nya malipha wu phasedzeyago khu tshivba dzinyimbi nya mayigo, vakhozeli nya lisine va gu bomba gu gira isoso. (Mikeya 4:1-3) Vbavbandze nya isoso, maKristo nya lisine ma gu thumisa tepo ni dzithomba dzawe khu gu dzina gasi gu phasa ni gu tiyisa vambe. — Hevbula Johane 13:34, 35; 1 Johane 4:20.

4. U ngu kodza guti wukhongeli nya lisine?

Khu wevbi wukhongeli wu seketeyago satshavbo sihevbudzo sawo Litoni la Nungungulu, wu zundzago lina la Nungungulu ni gu huweleya Mufumo wa Nungungulu kha nga uwo basi wu na vbedzago sigaradzo nya vathu? Khu wevbi tsawa wu yeyedzago lihaladzo ni gu venga nyimbi? U ngu khuwe ginani? — Hevbula 1 Johane 3:10-12.