Skip to content

Skip to secondary menu

Skip to table of contents

Dzifakazi dza Jehovha

Gitonga

Mahungu nya yadi ya Nungungulu!

 GIHEVBULO 11

Matshina nya milayo nya Bhibhiliya ma gu hi phasa kharini?

Matshina nya milayo nya Bhibhiliya ma gu hi phasa kharini?

1. Khu ginani hi vbwetago gu thangedwa?

Matshina nya milayo nya Bhibhiliya ma nga hi kutsa kharini gu dzi vhikeya dzimhango? — NDZIMO 36:10.

Muvangi wathu a nguti ngudzu gu vbindra ethu. Kha nga Babe nya lihaladzo, uye a ngu hi khathaleya. Gambe uye kha hi gira gasi hi dzi fumeya habune. (Jeremiya 10:23) Khu kharato, kha nga gyanana nya gidugwana gi yedego gu thangedwa khu vavelegi vagyo, hatshavbo hi ngu vbweta gu thangedwa khu Nungungulu. (Isaya 48:17, 18) Matshina nya milayo nya Bhibhiliya ma gu hi ninga sileletelo si gu giningwa gi tago khu ga Nungungulu. — Hevbula 2 Thimoti 3:16.

Milayo ni matshina nya milayo ya Jehovha sa gu hi hevbudza ndziya nya wutshukwana nya guvbanye muhuno si bwe si hi yeyedza gu khiso hi nga mana kharini tshatshazelo nya gupindruge mindru wa tshigu. Olu Nungungulu a gu uye a hi vangidego, hi yede gu landra sileletelo saye na hi tsakide. — Hevbula Ndzimo 19:8, 12; Gutuledwa 4:11.

2. Ginani matshina nya milayo nya Bhibhiliya?

Matshina nya milayo nya Bhibhiliya khu milayo nya lisima yi seketeyago yimbe milayo. Gasi milayo ya gu thumisedwa silo nya gukhaguri basi. (Dhewuteronome 22:8) Hi yede gu thumisa gupima gwathu gasi gu pwisisa edzi litshina nya nayo li thumago khidzo omu nya makhalelo nya gu hambanehambane. (Mavingu 2:10-12) Khu giyeyedzo, Bhibhiliya ya gu hevbudza gu khiyo guvbanya giningwa gi tago khu ga Nungungulu. Litshina lolo nya nayo li ngu kodza gu hi thangeya mithumoni, ndrangani ni guendrani. Gambe la gu hi kutsa gu dzi woneya dzimhango. — Hevbula Mithumo 17:28.

3. Khu yavbi matshina mavili nya milayo ma gu ya lisima gu vbindra yatshavbo?

Jesu ganede khu matshina mavili nya milayo ma gu ya lisima gu vbindra yatshavbo. Eli nya gupheye la  gu yeyedza gighelo nya guvbanye ga vathu — gu gu guti Nungungulu, gu mu haladza ni gu mu thumeya khu gutumbega. Litshina leli nya gupheye nya nayo li yede gu dundrugwa siloni satshavbo hi si hungago. (Mavingu 3:6) Ava va landreyago litshina leli nya nayo va gu khala dzipari dza Nungungulu, va mana gutsaka nya lisine, ni guvbanya nya gupindruge. — Hevbula Matewu 22:36-38.

Litshina nya wuvili nya nayo li nga hi gira hi vbanyisana khu gurula ni vambe vathu. (1 Vakorinto 13:4-7) Gu thumisa litshina leli nya wuvili nya nayo ga gu pata gu pimedzeya edzi Nungungulu a thumisanago khidzo ni vathu. — Hevbula Matewu 7:12; 22:39, 40.

4. Matshina nya milayo nya Bhibhiliya ma gu hi phasa kharini?

Matshina nya milayo nya Bhibhiliya ma gu hevbudza dzindranga ndziya nya gu pwanane khu lihaladzo. (Vakolosi 3:12-14) Lito la Nungungulu la gu vhikeya dzindranga khu gu dzi hevbudza limbe litshina nya nayo li yedego gu dzi thangeya — li gu khilo wugadzi wu yede gu simama kala gupindruga. — Hevbula Genesi 2:24.

Khu gu landreya sihevbudzo nya Bhibhiliya, ethu hi nga dzi vhikeya maphuvboni yatshavbo nya guvbanye gwathu. Khu giyeyedzo, vamune nya dzikoponi va gu gola sithumi si landreyago matshina nya milayo nya Bhibhiliya ma ganeyago khu gutumbega ni sighingi. (Mavingu 10:4, 26; Vahebheru 13:18) Gu diga isoso, Lito la Nungungulu la gu hi hevbudza gu tsaka khu silo nya lisima si vbwetegago ni gu thangisa ngudzu wupari wathu ni Nungungulu guvbindra dzithomba. — Hevbula Matewu 6:24, 25, 33; 1 Thimoti 6:8-10.

Gu thumisa matshina nya milayo nya Bhibhiliya gu nga vhikeya womi wathu. (Mavingu 14:30; 22:24, 25) Khu giyeyedzo, gu landra nayo wa Nungungulu wu himbedzeyago guleva ga gu hi vhikeya madwali ni dzimhango dzi songago. (Mavingu 23:20) Jehovha a ngu hi dzumeleya gu seya wadwa, ganiolu hi seya khu guninganiseya. (Ndzimo 104:15; 1 Vakorinto 6:10) Matshina nya milayo ya Nungungulu ma gu hi phasa khu gu hi hevbudza gu vhikeya sigiro sathu ni mapimo yathu. (Ndzimo 119:97-100) Ambari ulolo, maKristo nya lisine kha ma ningi githawo milayo ya Nungungulu khu gu vbweta gu dzi phasa avo vamune basi. Ayo ma gu gira isoso gasi gu zundza Jehovha. — Hevbula Matewu 5:14-16.