Skip to content

Skip to secondary menu

Skip to table of contents

Dzifakazi dza Jehovha

Gitonga

Mahungu nya yadi ya Nungungulu!

 GIHEVBULO 5

Khu yavbi makungo ya Nungungulu khu mafu?

Khu yavbi makungo ya Nungungulu khu mafu?

1. Khu ginani Nungungulu a nga vanga mafu?

Jehovha ningede mafu ga vama ni vanyamayi. Ayo khiyo ndranga yathu. Khu kharato, patwa nya gupheye, Adhamu ni Evha, kha wa vangedwa gu vbanya ndzadzini — Nungungulu a di ba a vangide dzingilozi gasi dzi vbanya ndzadzini. (Joba 38:4, 7) Ganiolu, Nungungulu a di vega mwama nya gupheye paradhesini nya gutsakise yi ranwago pwani lithembwe la Edheni. (Genesi 2:15-17) Jehovha mu girede gu vbanya mafuni kala gupindruga, gumogo ni situgulwana saye si nga ba na si si gu velegwi. — Hevbula Ndzimo 37:29; 115:16.

Gupheyani, lithembwe la Edheni khilo basi li nga ba liri paradhesi. Patwa nya gupheye nya vathu wu di yede gu tadza mafu khu sanana sawe. Khu gugimbiya nya tepo, avo na va fumede mafu yatshavbo va bwe va ma gira paradhesi. (Genesi 1:28) Mafu gima kha ma na nga fuviswa. Ma na simama gu khala ndranga nya vathu kala gupindruga. — Hevbula Ndzimo 104:5.

2. Khu ginani mafu ma si rigu paradhesi muhuno?

Adhamu ni Evha kha va engisa Nungungulu, khu kharato Jehovha a di va tutumisa thembweni ga Edheni. Paradhesi yi di dzimeya, nigu mwalo muthu a kodzidego gu yi wuyisa. Bhibhiliya yari khiyo: ‘Mafu ma ningedwe mandzani ya oyu nya guvivbe.’ — Joba 9:24. — Hevbula Genesi 3:23, 24.

Ina Jehovha digide makungo yaye nya gupheye khu vathu? Ahihi! Uye khuye nyadzitshivba. Kha sindrwi khu gilo. (Isaya 45:18) Uye a na bweledzeya vathu makhaleloni yaya a nga ma dundrugeya gupheyani. — Hevbula Ndzimo 37:11, 34.

3. Yi na wuswa kharini Paradhesi?

Paradhesi yi na wuswa mafuni tepo Jesu a na gu ba a fuma kha nga Pfhumu ya Nungungulu. Nyimbini yi ranwago pwani Harimagedhoni, Jesu a na thangeya dzingilozi dza Nungungulu a fuvisa vatshavbo ava va wugeyago Nungungulu. Khavbovbo  Jesu a na khotheya Sathane khu 1000 nya myaga. Vathu va Nungungulu va na vbuluga gufuviswani gogo kholu Jesu a na va thangeya ni gu va vhikeya. Avo va na vbanya kala gupindruga Paradhesini mafuni. — Hevbula Gutuledwa 20:1-3; 21:3, 4.

4. Gu na vbeya lini gutshaniseka?

Nungungulu a na fuvisa lini guvivba mafuni? Jesu ningide “giwonegiso” mwendro giyeyedzo gasi gu yeyedza gu khuye guhegisa gomo vbafuvbi. Makhalelo nya litigo hi ma wonago muhuno ma gu vega guvbanya nya vathu mhangoni ma bwe ma yeyedza gu khayo ethu ha gu vbanya ‘guhegisani’ nya makhalelo yaya nya silo. — Hevbula Matewu 24:3, 7-14, 21, 22.

Tepo Jesu a na fumeyago mafu khu 1000 nya myaga gukhugeya ndzadzini, a na fuvisa gutshaniseka gwatshavbo. (Isaya 9:6, 7; 11:9) Vbavbandze nya gu thume kha nga Pfhumu basi, Jesu a na bwe a thuma kha nga Mupristi nya Khongolo a bwe a futa sighoho sa ava va haladzago Nungungulu. Khu kharato, khu gu thumisa Jesu, Nungungulu a na fuvisa gudwala, gugumba ni gufa. — Hevbula Isaya 25:8; 33:24.

5. Khu vamani va na vbanyago Paradhesini yeyi hi yi lindreyago?

Salawuni nya Mufumo, u nati vathu va haladzago Nungungulu va bwe va vbweta guti ndziya nya gu mu tsakise

Vathu va engisago Nungungulu va na vbanya Paradhesini. (1 Johane 2:17) Jesu rumide valandreli vaye gu vbweta vathu nya ndruda va va hevbudza ndziya nya gu va dzumelega ga Nungungulu. Muhuno Jehovha a gu dongiseya mazanazana nya vathu gasi va vbanya Paradhesini hi yi lindreyago mafuni. (Sofoniya 2:3) Dzisalawuni nya Mufumo dza Dzifakazi dza Jehovha, vathu va gu hevbula dzindziya nya gu khale vama gumogo ni vababe nya vadi, ni vanyamayi gumogo ni vamayi nya vadi. Sanana ni vavelegi va gu khozeya gumogo va hevbula dzindziya nya gu phasege khu mahungu nya yadi. — Hevbula Mikeya 4:1-4.