Skip to content

Skip to secondary menu

Skip to table of contents

Dzifakazi dza Jehovha

Gitonga

Mahungu nya yadi ya Nungungulu!

 GIHEVBULO 8

Khu ginani Nungungulu a dzumedzeyago guvivba ni gutshaniseka?

Khu ginani Nungungulu a dzumedzeyago guvivba ni gutshaniseka?

1. Guvivba gu phede kharini?

Nungungulu ningide vathu tepo nyo eneye gu fuma gasi gu yeyedza gu khuye avo kha va kodzi gu vbedza sigaradzo sa vathu

Guvivba gu phede mafuni tepo Sathane a nga ganeya malipha nya gupheye. Gupheya Sathane a diri ngilozi nya guvbeleye, ganiolu uye kha ‘emeya lisine.’ (Johane 8:44) Uye a di dogoreya gukhozedwa ogu khu lisine gu lumbago Nungungulu basi. Sathane liphede nyamayi nya gupheye, Evha, a mu kutsedzeya gu mu engisa vbavbandze nya gu engise Nungungulu. Adhamu a di dzi pata ni Evha guwugeyani ga Nungungulu. Esi Adhamu a nga gira si reside gutshaniseka ni gufa. — Hevbula Genesi 3:1-6, 19.

Tepo Sathane a nga kutsedzeya Evha gu mba engisa Nungungulu, uye a di pheya gu wugeya wufumu wa Nungungulu, mwendro giemo gyaye kha nga oyu a Khugegidego Ngudzu. Vathu nya vangi va ngu dzi pata ni Sathane va bomba Nungungulu kha nga Mufumeli wawe. Khu kharato, Sathane khade “mufumeli nya litigo leli.” — Hevbula Johane 14:30; 1 Johane 5:19.

2. Gasi sivangwa sa Nungungulu kha sa nga ba si vbelede?

Yatshavbo mithumo ya Nungungulu yi vbelede. Dzingilozi ni vathu va nga vangwa khu Nungungulu va diri ni makodzelo nya gu engise Nungungulu khu guvbeleya. (Dhewuteronome 32:4, 5) Nungungulu hi vangide a bwe a hi tshula gu hatha gu gira silo nya sadi mwendro nya guvivbe. Gutshulega gogo ga gu hi tuleya ndziya nya gu yeyedze lihaladzo lathu ga Nungungulu. — Hevbula Jakobe 1:13-15; 1 Johane 5:3.

3. Khu ginani Nungungulu a dzumedzeyago gutshaniseka kala muhuno?

Jehovha a ngu dzumeya gu khuye wufumu waye wu wugedwa khu gitepwana. Khu ginani? Gasi gu yeyedza gu khuye vathu gima kha va na nga dugeleya ambari va zama khu dzindziya dza tshavbo gu dzi fumeya nya mba phaswa khu Nungungulu. (Muhevbudzi  7:29; 8:9) Hwane nya 6000 nya myaga nya matimo nya vathu, satshavbo sa gu yeyedza gu khiso isoso lisine. Vafumeli nya vathu va tandregide gu vbedza dzinyimbi, wughevenga, guvivba, mwendro madwali. — Hevbula Jeremiya 10:23; Varoma 9:17.

Guhambana ni mifumo ya vathu, mufumo wa Nungungulu wu ngu phasa ava va wu dzumeyago. (Isaya 48:17, 18) Nugunugu Jehovha a na fuvisa mifumo yatshavbo nya vathu. Ava va ha hathago gu fumedwa khu Nungungulu khavo basi va na vbanyago mafuni. — Isaya 11:9. Hevbula Dhaniyeli 2:44.

4. Gutimiseya ga Nungungulu ga gu hi ninga tepo nya gu gire ginani?

Sathane a di khuye mwalo a na thumeyago Jehovha a gu mba gimbiledwa gwadi khu silo. U ngu dzina gu ganedza malipha yoyo? U na si kodza! Gutimiseya ga Nungungulu ga gu hi ninga tepo nya gu hatshavbo hi yeyedza gu khethu ha gu vbweta gu fumedwa khu Nungungulu mwendro gu fumedwa khu vathu. Mavbanyelo yathu ma gu yeyedza esi hi si vbwetago. — Hevbula Joba 1:8-12; Mavingu 27:11.

5. Hi nga hatha kharini Nungungulu kha nga Mufumeli wathu?

Esi hi si hathago sa gu yeyedza gu khiso ha gu vbweta Nungungulu kha nga Mufumeli wathu mwendro ahihi

Hi nga hatha Nungungulu kha nga Mufumeli wathu khu gu vbweta ni gu thumisa wukhozeli nya lisine wu seketedwago khu Lito la Nungungulu, a gu Bhibhiliya. (Johane 4:23) Hi nga bomba Sathane gu gira mufumeli wathu khu gu mba dzi bedza omu nya politika ni dzinyimbi, kha nga Jesu. — Hevbula Johane 17:14.

Sathane a gu thumisa tshivba yaye gasi gu kutsedzeya mithumo nya mhango ni guvivba. Ha gu bomba mithumo yoyo, si nga girega gu dzipari ni valongo va hi hega mwendro gu hi venga. (1 Pedro 4:3, 4) Hi yede gu hatha. Hi na hengeya ni vathu va haladzago Nungungulu? Hi na engisa milayo yaye nya lihaladzo ni guti? Ha gu gira isoso, ha gu yeyedza gu khethu Sathane liphide tepo a nga khuye vathu va gu tshaniseka kha va na nga engisa Nungungulu. — Hevbula 1 Vakorinto 6:9, 10; 15:33.

Lihaladzo la Nungungulu khu vathu giyeyedzo nya gu khigyo guvivba ni gutshaniseka si na vbeya. Ava va yeyedzago gu khavo va ngu khodwa isoso va na vbanya mafuni kala gupindruga. — Hevbula Johane 3:16.