Skip to content

Skip to table of contents

Dzifakazi dza Jehovha

Hatha lidimi Gitonga

 GIHEVBULO 12

U nga hidzimeya kharini ga Nungungulu?

U nga hidzimeya kharini ga Nungungulu?

1. Ina Nungungulu a ngu engiseya yatshavbo milombelo?

Nungungulu a gu rana vathu nya makhalelo yatshavbo gasi va hidzimeya gwaye khu nombelo. (Ndzimo 65:3) Ambari ulolo, uye kha engiseyi, mwendro gu dzumeya, milombelo yatshavbo. Khu giyeyedzo, milombelo ya mwama a tshanisago mwangadzi waye yi ngu kodza gu mba vboha ga Nungungulu. (1 Pedro 3:7) Vbavbandze nya isoso, tepo vaIsrayeli va nga simama gu gira guvivba, Nungungulu bombide gu engiseya milombelo yawe. Isoso sa gu yeyedza gu khiso nombelo thomba. Ganiolu, Nungungulu a na dzumeya milombelo nya sighohi nya sikhongolo sa gu dzi sola. — Hevbula Isaya 1:15; 55:7.

2. Hi yede gu gombeya kharini?

Nombelo gipandre nya gukhozeye gwathu, khu kharato hi yede gu gombeya ga Muvangi wathu basi, Jehovha. (Matewu 4:10; 6:9) Vbavbandze nya isoso, olu ethu hi nga ne nga vbeleya, hi yede gu gombeya khu lina la Jesu kholu uye fede sighoho sathu. (Johane 14:6) Jehovha kha vbweti gu khuye hi wuyedzeya milombelo yi gomogo hungoni mwendro yi lovidwego. O vbweta gu khuye hi ganeya esi hi si pwago monyoni. — Hevbula Matewu 6:7; Vafilipi 4:6, 7.

Muvangi wathu a ngu kodza gupwa ambari milombelo hi si yi pwadzigo. (1 Samuweli 1:12, 13) Uye a gu hi kutsa gu gombeya tepo yatshavbo, kha nga ha gu wuga mwendro ha gu ya lala, ha gu hodza ni sigaradzoni. — Hevbula Ndzimo 55:23; Matewu 15:36.

3. Khu ginani maKristo ma tshanganago?

Gu hidzimeya ga Nungungulu kha gu vbevbugi kholu hi vbanyago vbakari nya vathu va si khodwigo ga Nungungulu  va bwe va hega gitumbiso gyaye nya gu khigyo gu na ba gu romo gurula mafuni. (2 Thimoti 3:1, 4; 2 Pedro 3:3, 13) Khu kharato, hi yede gu tshangana ni makhodwa kwanu gasi hi tiyisana. — Hevbula Vahebheru 10:24, 25.

Gu tshangana ni vathu va haladzago Nungungulu ga gu hi phasa gu hidzimeya ga Nungungulu. Mitshangano ya Dzifakazi dza Jehovha ya gu hi ninga lithomo nya ladi nya gu hi phasega khu gukhodwa ga vambe. — Hevbula Varoma 1:11, 12.

4. U nga hidzimeya kharini ga Nungungulu?

U nga hidzimeya ga Jehovha khu gu dundrugeya khesi u si hevbudego khu gu thumisa Lito laye. Dundrugeya khu mithumo yaye, wusingalagadzi waye ni situmbiso saye. Gu gombeya ga gu hi phasa gu wona lisima nya lihaladzo ni guti ga Nungungulu. — Hevbula Josuwa 1:8; Ndzimo 1:1-3.

U na hidzimeya ga Nungungulu wa gu mu tumba, wa gu khodwa gwaye. Ganiolu gukhodwa ga gu fanana ni gilo gi vbanyago gi vbwetago gu hodziswa. U yede gu khala khu gu hodzisa gukhodwa gwago khu gu dundrugeya esi si tiyisago gukhodwa gogo. — Hevbula Matewu 4:4; Vahebheru 11:1, 6.

5. Gu hidzimeya ga Nungungulu gu na gu phasa kharini?

Jehovha a ngu khathaleya ava va mu haladzago. Uye a ngu kodza gu va vhikeya siloni satshavbo si kodzago gu ghoha gukhodwa gwawe ni gulindreya gwawe gu vbanya kala gupindruga. (Ndzimo 91:1, 2, 7-10) Uye a gu hi gengedza avba nya mavbanyelo ma vegago womi wathu ni gutsaka gwathu mhangoni. Jehovha a gu hi hevbudza ndziya nya wutshukwana nya guvbanye. — Hevbula Ndzimo 73:27, 28; Jakobe 4:4, 8.