Skip to content

Skip to table of contents

Dzifakazi dza Jehovha

Hatha lidimi Gitonga

 GIHEVBULO 12

Tugulo wa Pawulo kha Khala Hwanga

Tugulo wa Pawulo kha Khala Hwanga

Hongoleni hi hevbule khu lidzaha li nga vbulugisa womi wa tio walo. Tio wa lidzaha lolo gu diri mupostoli Pawulo. Kha hi liti lina la lidzaha lolo, ganiolu hi ngu dziti gu khethu li giride silo si nga yeyedza gu tiya gwalo. U ngu dzina gu siti esi li nga gira?—

Pawulo a diri pasoni Jerusalema. Uye a di modwe kholu a nga ba na gu tshumayela a ganeya khu Jesu. Vama nya gukari nya guvivbe myonyo va di gu venga Pawulo. Khu kharato va di hunga gikungu nya guvivbe. Avo va di khavo: ‘Hongoleni hi lomba ndruna nya masotshwa yi ruma masotshwa ma resa Pawulo gulamudwatunu. Ethu hi na sihala wubambe nya ndziya gasi tepo Pawulo a vbindrago hi mu songa!

Tugulo wa Pawulo embede Pawulo ni ndruna nya masotshwa khu gikungu gile nya guvivbe

Tugulo wa Pawulo pwide gikungu gyogyo. Uye na giride ginani? A di hongowa pasoni a ya embeya Pawulo. Pawulo a di dzegeya gu embeya tugulo waye a ya embeya ndruna nya masotshwa khu gikungu gyogyo nya guvivbe. Si di gu vbevbuga ga tugulo wa Pawulo gu ya ganeya ni ndruna?— Ahihi, kholu ndruna yi diri muthu nya lisima. Ganiolu tugulo wa Pawulo a di tiya a ya ganeya ni ndruna.

Ndruna yi di gu giti gilo nya gu gi gire. Yi di rana 500 nya masotshwa gasi gu vhikeya Pawulo, yi ma embeya gu dzega Pawulo ni wutshigu wule ma hongowa naye Sezareya. Ina womi wa Pawulo wu vbulugisidwe?— Khidzo, vama vale nya guvbive myonyo kha va mu wugeya! Gikungu gyawe nya guvivbe kha gya thuma.

Wa gu hevbula ginani khisoso?— Anuwe u ngu kodza gu tiya kha nga tugulo wa Pawulo. Hi fanede gu tiya ha gu ba hi ganeya ni vathu khu Jehovha. U na tiya u simama gu ganeya khu Jehovha?— Wa gu tiya, u na vbulugisa womi wa vambe vathu.