Skip to content

Skip to secondary menu

Skip to table of contents

Dzifakazi dza Jehovha

Gitonga

Hevbudza Sanana Sago

 GIHEVBULO 5

Samueli a di Simama gu Gira Silo nya Sadi

Samueli a di Simama gu Gira Silo nya Sadi

Gukhugeya na ngari dugwana, Samueli a di khala a thuma nyumbani ga Nungungulu, omu vathu va nga ba va ya khozeya Jehovha. U ngu dziti edzi Samueli a nga ya manega khidzo nyumbani ga Nungungulu? Hongoleni hi pheya khu guti Ana, mamayi wa Samueli.

Gu vbindride gikhati nya gulaphe ngudzu Ana na gu tandrega gu velega gyanana, ambari olu a nga ba a gi vbweta ngudzu. Khu kharato uye a di gombeya ga Jehovha a mu khongoteya gu a mu phasa. Ana a di tumbisa gu khuye a gu velega gyanana nya gikhwathana, a na gi rumeya gi ya khala gi thuma nyumbani ga Nungungulu. Jehovha hlamude nombelo waye, Ana a velega gyanana nya gikhwathana. Uye a di gi rana khuye khigyo Samueli. Kha nga edzi a nga tumbisa, ga gikhati Samueli a nga ba ari ni myaga miraru mwendro mina, Ana a di mu vbwegedza nyumbani ga Nungungulu gasi a ya thumeya Jehovha.

Eli khuye a nga ba ari muphasi nya khongolo nya mhamba nyumbani ga Nungungulu. Sanana saye sasivili niso si di gu thuma iyoyo. Dundruga gu khuwe nyumbani nya gu khozeye Nungungulu vathu va di gu faneya gu gira silo nya sadi. Ganiolu sanana sa Eli si di gu gira silo nya guvivbe. Samueli a di gu si wona esi va nga ba va gira. Ina Samueli a di gu gira nuye silo nya guvivbe kha nga sanana sa Eli?— Ahihi, uye simamide gu gira silo nya sadi, kha nga edzi vavelegi vaye va nga mu hevbudza khidzo.

Ginani Eli a nga ba a fanede gu gira khu sanana saye sasivili?— Uye na si tsayiside abwe a si si dzumeleyi gambe gu thuma nyumbani ga Nungungulu. Ganiolu Eli kha gira isoso. Khu kharato Jehovha a di zangareya Eli ni sanana saye sasivili. Jehovha a di khuye a na va tsayisa.

Samueli embede Eli esi Jehovha a nga ganeya

Limbe litshigu, ni wutshigu, tepo Samueli a nga ba a lade, a dipwa muthu na gu mu rana khuye: ‘Samueli!’ Uye a di wuga a hongowa ga Eli, ganiolu Eli a  ya khuye: ‘Kha nya gu rana.’ Isoso si giregide sikhati sivili gambe. Khu gikhati nya wuraru, Eli a di embeya Samueli khuye wa gupwa gambe lito lolo, indra khuwe: ‘Ina, ganeya Jehovha, nyi ngupwa.’ Khiso isoso Samueli a nga gira. Khavbovbo Jehovha a di embeya Samueli khuye: ‘Embeya Eli khuwe nyi na tsayisa ndranga yaye khu kotani nya silo nya guvivbe va girago.’ Si di gu vbevbuga ga Samueli gu embeya Eli isoso?— Ahihi, kha sa nga ba si vbevbuga. Ambari olu Samueli a nga ba na gu thava, giride esi Jehovha a nga mu embeya. Esi Jehovha a nga ganeya si giregide. Sanana sasivili sa Eli si di songwa, Eli nuye afa.

Samueli giyeyedzo nya gyadi ga ethu. Uye giride silo nya sadi ambari olu a nga ba a wona vambe vathu na va gu gira silo nya guvivbe. Ahati uwe ke? U na fanana ni Samueli, u simama gu gira silo nya sadi? Wa gu gira isoso, u na tsakisa Jehovha ni vavelegi vago.

LERI OMU NYA BHIBLIYA YAGO