Skip to content

Skip to secondary menu

Skip to table of contents

Dzifakazi dza Jehovha

Gitonga

Ndranga Yago yi ngu Kodza gu Mana Litsako

 GIPANDRE NYA 7

Ndziya nya gu Hevbudze Gyanana Gyago

Ndziya nya gu Hevbudze Gyanana Gyago

‘Milayo yeyi nyi gu ningago muhuno, u na yi vegisa monyoni gwago. u na yi wuyedzeya gu hevbudza sanana sago.’Nayo 6:6, 7

Tepo Jehovha a nga wumba ndranga, ningide vavelegi gudzihlamuleya nya gu dandrise ni gu hevbudza sanana. (Vakolosi 3:20) Kha nga muvelegi, khuwe u gu na ni gudzihlamuleya nya gu hevbudze gyanana gyago gu gola Jehovha ni gu gi dandrisa gi khala muthu nya gutumbege. (2 Thimoti 1:5; 3:15) U fanede gambe guti esi si gomogo monyoni ga gyanana gyago. Khu lisine, giyeyedzo gyago gilo nya lisima ngudzu. Gasi gu kodza gwadi gu hevbudza Lito la Jehovha gyanana gyago, u fanede gu pheya khuwe u li vega monyoni gwago.Ndzimo 40:9.

 1 GIRA SANANA SAGO SI DZIPWA NA SI TSHULEGIDE GU BHULA NAGO

NGA WONA ESI BHIBLIYA YI SI GANEYAGO: ‘Muthu ni muthu a na vbiredze gupwa, a hweya gu ganeya.’ (Jakobe 1:19) Uwe u ngu dzina gu khuwe sanana sago si dzipwa na si tshulegide gu ganeya nago. Iso si fanede gu dziti gu khiso u dzi emisede gu si engiseya tepo iso si vbwetago gu ganeya gilogyo. Vbweta makhalelo nya gurule gasi sanana si tshulega gu ganeya esi si gomogo myonyoni gwaso. (Jakobe 3:18) Sa gu wona gu khiso u na si vbenyeya mwendro gu si konaniseya, iso kha si na gu tuleya myonyo yaso. Si yeyedze gu timiseya, ubwe u tala gu si embeya gu khuwe u ngu si gola.Matewu 3:17; 1 Vakorinto 8:1.

GIRA KHARATI:

  • Sanana sago sa gu vbweta gu bhula nago, dzi ninge tepo

  • Khala khu gu bhula ni sanana sago, na gu siri basi ga gu ba guri ni sigaradzo

2 ZAMA GU PWISISA ESI ISO KHU LISINE SI GU EMBEYAGO

NGA WONA ESI BHIBLIYA YI SI GANEYAGO: “Oyu a yeyedzago guti mhakani nya gu kari a na dugeleya.” (Mavingo 16:20) Simbe sikhati u fanede gu mba khedza basi esi si ganedwago khu sanana sago gasi gu pwisisa edzi si dzipwago khidzo. Vathu vaphya va ngu tala gu engedzeya silo mwendro gu ganeya gilo nari gu khu lisine vo thula simbe. “Muthu a gu hlamula mhaka na si gu lipwi lisine la kona, a gu yeyedza wupumbu.” (Mavingo 18:13) U nga vbiredzeyi gu goroga.Mavingo 19:11.

GIRA KHARATI:

  • Na gu si khathadzisegi esi sanana si ganeyago, dzi emiseye gu mba si piya mwendro gu si vbenyeya

  • Zama gu dundruga edzi u nga ba u dzipwa khidzo tepo u nga ba u ngari tinga yaso ni esi si nga ba si wonega na siri ni lisima gwago

 3 YEYEDZANI GU PWANANA VBAGULAYATUNU NYA SANANA

NGA WONA ESI BHIBLIYA YI SI GANEYAGO: “Mwanangu, engisa gulaya ga babe wago, nigu u nga digi gihevbudzo gya mayi wago.” (Mavingo 1:8) Jehovha ningide mayi ni babe gudzihlamuleya nya gu laye sanana. Enu mu fanede gu hevbudza sanana sanu gu gu engisani ni gu gu ningani githawo. (Vaefeso 6:1-3) Sanana si ngu kodza gu wona gu khiso vavelegi vaso kha va ‘hengeyi mapimo,’ mwendro kha va pwanani. (1 Vakorinto 1:10) Mwa gu mba pwanana khu gilo nya gu kari, zamani gu mba yeyedza sanana sanu kholu isoso si nga si gira si si gu ningini githawo kha nga vavelegi.

GIRA KHARATI:

  • Bhulani mu pwanana khedzi mu na layago khidzo sanana sanu

  • Mawonelo yago mayelano ni malayelo nya sanana ma gu ba na ma guhambana naya ya oyu u dzeganego naye, moyo ni moyo wanu a na zame gu wona silo khu mawonelo ya mumbe

 4 GIRANI MALULAMISELO

NGA WONA ESI BHIBLIYA YI SI GANEYAGO: “Hevbudza gikhwathana ndziya gi fanedego gu gimbiya khiyo.” (Mavingo 22:6) Gudugeleya gu hevbudzani nya sanana kha gu giregi gabune basi. Mu fanede gu gira malulamiselo nya edzi mu na hevbudzago khidzo, ma patago ni gu laya sanana. (Ndzimo 127:4; Mavingo 29:17) Gulaya kha si thuli basi gu tsayisa, ganiolu ga gu pata gu phasa sanana gu pwisisa sighelo nya milayo si ningwago. (Mavingo 28:7) Gambe si hevbudzeni gu gola Lito la Jehovha ni gu pwisisa matshina nya milayo ma gomogo umo. (Ndzimo 1:2) Isoso si na si phasa gu haguleya livhalo nya ladi.Vahebheru 5:14.

GIRA KHARATI:

  • Phasa sanana sago gu wona Nungungulu kha nga Muthu nya lisine si fanedego gu mu tumba

  • Si phase guti ni gu potsa dzimhango nya mavbanyelo, nya nga edzi dzi manegago omu nya interneti. Si hevbudze gu dzi woneya ga vale va si vbwetago gasi gu hengeya naso malawu

“Hevbudza gikhwathana ndziya gi fanedego gu gimbiya khiyo”