Skip to content

Skip to secondary menu

Skip to table of contents

Dzifakazi dza Jehovha

Gitonga

Mahungu Nya Yadi Ya Nungungulu!

 GIHEVBULO 3

Ina Mahungu nya Yadi ma Guta khu ga Nungungulu furi?

Ina Mahungu nya Yadi ma Guta khu ga Nungungulu furi?

1. Khu mani Mutumbunusi nya Bhibliya?

Mahungu nya yadi nya gu khayo vathu va na vbanya mafuni kala gupindruga ma lovidwe omu nya Bhibliya. (Dzindzimo 37:29) Bhibliya ya gu wumbwa khu 66 nya mabhuku nya madugwana. Nungungulu thumiside vama va ninganago 40 gasi gu ma lova. Livbandre mabhuku nya gupheye ma lovidwe khu Mosi. Gu ngu ningana 3.500 nya myaga na ma lovidwe. Libhuku nya guhegise li lovidwe khu mupostoli Johane. Gu ngu vbindra 1.900 nya myaga na li lovidwe. Mapimo ya mani ma nga lowa khu valovi nya Bhibliya? Nungungulu thumiside liphuvbo nya guage gasi gu ganeya ni valovi nya Bhibliya. (2 Samueli 23:2) Avo va lovide mapimo ya Nungungulu, na gu siri mapimo yawe. Khu kharato, Jehovha khuye Mutumbunusi nya Bhibliya.Hevbula 2 Thimoti 3:16; 2 Pedro 1:20, 21.

2. Hi nga tiyisega kharini gu khethu Bhibliya yo ganeya lisine?

Hi ngu dziti gu khethu Bhibliya khya Nungungulu kholu iyo ya gu ganeya khu guvbeleya khu silo si nga rigo mbeli yibwe yi si phazami. Mwalo muthu a kodzago gu gira isoso. (Josuwa 23:14) Nungungulu nya Tshivba Yatshavbo khuye basi a kodzago gu wona nya mba phazama esi si na giregeyago vathu.Hevbula Isaya 42:9; 46:10.

Khu lisine, libhuku li tago khu ga Nungungulu li hambane ni mambe mabhuku. Bhibliya yi ngu manega khu mazana nya malimi yibwe yi ghandlwa khu dzibhiliyoni nya dzikopiya. Ambari olu yi gu ya gale, Bhibliya yi ngu pwanana ni sihevbudzo nya lisine nya siyensya. Vbavbandzi nya isoso, valovi vayo nya 40 kha va ganedzani. * Guvbindra isoso, esi Bhibliya yi ganeyago khu lihaladzo sa gu dzi yeyedza gu khiso sa guta khu ga Nungungulu, nigu iyo yi na ni tshivba nya gu vbindrugedze  guvbanya nya vathu gu gira tshukwana. Satshavbo soso sa gu gira mazanazana nya vathu va khodwa gu khavo Bhibliya Lito la Nungungulu.Hevbula 1 Vatesalonika 2:13.

3. Bhibliya yo ganeya khu ginani?

Gilo gimwegyo nya gikhongolo gi ganedwago omu nya Bhibliya khu mahungu nya yadi nya gu khayo Nungungulu vegede vathu silo nya sadi. Milowo ya gu tshamuseya edzi vathu va nga luza khidzo malungelo nya gu vbanye paradhesini mafuni gupheyani nya matimu yawe, ni edzi paradhesi khu guhegisa yi na wuyiswago khidzo mafuni.Hevbula Gutuledwa 21:4, 5.

Lito la Nungungulu gambe li na ni milayo, matshina nya milayo ni wusingalagadzi. Vbavbandzi nya isoso, Bhibliya yi na ni matimu nya edzi Nungungulu a thumisanago khidzo ni vathu—gu gu matimu ma yeyedzago makhalelo ya Nungungulu. Khu kharato, Bhibliya yi ngu kodza gu gu phasa guti Nungungulu. Ya gu tshamuseya ndziya nya gu u kodza gu khala pari ya Nungungulu.Hevbula Dzindzimo 19:8, 12; Jakobe 2:23; 4:8.

4. Khu yevbi ndziya nya gu u pwisisa Bhibliya?

Bruxura yeyi yi na gu phasa gu pwisisa Bhibliya khu gu thumisa ndziya yamweyo yi nga thumiswa khu Jesu. Uye gambe ni gambe khumbugide milowo abwe a yi tshamuseya.Hevbula Luka 24:27, 45.

Mahungu nya yadi ya Nungungulu ma ngu tsakisa ngudzu guvbindra silo nya singi. Ambari ulolo, vomo vathu va si ma khathaleyigo, ni vambe va khunguvanyegago khayo. Uwe u nga vbeyi tshivba. Guti Nungungulu khugo gu na gu girago u vbanya kala gupindruga.Hevbula Johane 17:3.

 

^ par. 3 Wona bruxura Um Livro para Todas as Pessoas.