Skip to content

Skip to secondary menu

Skip to table of contents

Dzifakazi dza Jehovha

Gitonga

Khu vamani va girago gugola ga Jehovha muhuno?

 GIHEVBULO 14

Dzixikola muni dzi dongisedwego vapiyonero?

Dzixikola muni dzi dongisedwego vapiyonero?

Estados Unidos

Xikola ya Gileyadhi, Patterson, Novha Yorki

Panama

Gukhugeya gale, Dzifakazi dza Jehovha dzi ngu thangisa sihevbudzo nya Mufumo wa Nungungulu. Gu ngu dongisedwa dzixikola nya guhathege gasi gu hevbudza vale va thumisago tepo yawe yatshavbo thumoni nya gutshumayele mahungu nya Mufumo gasi va kodza gu gira ‘thumo wawe’ khu guvbeleya. — 2 Thimoti 4:5.

Xikola nya Thumo nya Wupiyonero. Muthu a gu vbedza mwaga rumba nya gupheye na gu thuma kha nga piyonero nya tepo yatshavbo a gu lovedziswa omu nya xikola nya livbandre na limwedo matshigu yi talago gu giredwa Salawuni nya Mufumo yi manegago vbafuvbi ni avba muthu yoyo a khalago avbo. Makungo nya xikola yoyo gu phasa piyonero gu hidzimeya ga Jehovha, gu dugeleya thumoni nya gu tshumayele khu dzindziya dzatshavbo ni gu simama a thuma khu gutumbega.

Xikola nya Vavhangeli nya Mufumo. Xikola yeyi nya migima mivili yo giredwa gu hevbudza vapiyonero vale va wu olovedego thumo, va dzumeyago gu khuga omu va khalago umo va ya tshumayela ni hayini gu vbwetegago. Khu lisine, avo vari khavo: “Nyi womo avba. Nyi rume.” Khu kharato avo va gu dzegeleya Jesu Kristo, a gu Muvhangeli nya khongolo guvbindra vatshavbo va thumidego mafuni. (Isaya 6:8; Johane 7:29) Gu khuga va ya khala hwindzo ni gaya gwawe si nga lomba gu khiso va vbevbugisa womi wawe. Yimbe tepo mavbanyelo, dzinango ni guhodza ga omu va ya thumeyago umo si nga hambana ngudzu ni esi va si olovedego. Gudzina saye si nga lomba gambe gu va hevbula lidimi nya liphya. Xikola yeyi ya gu phasa vandriyathu nya vama nya sikwendra, vandriyathu nya vanyamayi va si gu dzegwigo ni mipatwa, va gu na ni 23 kala 65 myaga, gu haguleya makhalelo nya liphuvbo va na ma vbwetago thumoni wawe ni mano ma na va girago va thumiswa khu guvbeleya khu Jehovha ni hengeledzano yaye.

Xikola nya Bhibhiliya ya Gileyadhi ya Torre de Vigia. Khu giHebheru, lito li gu khilo “Gileyadhi” la gu thula “Nyandra nya Wufakazi.” Gukhugeya yi nga tudwa xikola ya Gileyadhi khu 1943, gu hevbudzidwe vathu va vindrago 8000 va rumedwa kha nga vamisyonaryo gasi gu ya ninga wufakazi “kala mahegiso nya litigo.” Nigu va ngu dugeleya thumoni wowo. (Mithumo 13:47) Tepo vamisyonaryo va Gileyadhi va nga pheya gu vboha Peru, gu di ri mwalo libandla tigoni momo. Muhuno gu na ni mabandla ma vbindrago 1 000. Tepo vamisyonaryo vathu va nga pheya gu thuma Japawu, Dzifakazi iyoyo kha dza nga ba dzi vboha likhumi. Muhuno dzi ngu vbindra 200 000. Esi si hevbudwago Gileyadhi ndrani nya livbandre migima sa gu pata gu hevbula Lito la Nungungulu khu guvbeleya. Vapiyonero nya guhathege, vamisyonaryo va thumeyago thembweni, vale va thumago Bheteli ni vawoneleyi nya sipandre khavo va ranedwago xikola yeyi gasi gu ya mana sihevbulo nya gutshinge esi si va phasago gu tiyisa thumo mafuni gwatshavbo.

  • Khu yavbi makungo nya Xikola nya Thumo nya Wupiyonero?

  • Khu vamani va ninganedwago khu gu hevbula Xikola nya Vavhangeli nya Mufumo?