Julani

Kumbi Uchimi Ung’anamuwanji?

Kumbi Uchimi Ung’anamuwanji?

Vo Bayibolu limuka

Uchimi ndi uthenga wo ukambirika ndi Chiuta pakukamba za vinthu vo vifiskikengi kunthazi. Bayibolu likamba kuti achimi “alongoronga mazu ngakutuliya kwaku Chiuta mwakukoliyana ndi mo mzimu wakupaturika waŵalongozgiyanga.” (2 Peturo 1:20, 21) Mwaviyo, mchimi ndi munthu mweniyo walonde uthenga kutuwa kwaku Chiuta ndi kuwupereka ku ŵanthu.​—Machitidu 3:18.

Kumbi achimi awulondiyanga wuli uthenga kutuliya kwaku Chiuta?

Chiuta wagwiriskiyanga ntchitu nthowa zakupambanapambana kuti wapereki uthenga waki kwa achimi:

  • Kuziya mu vakulemba. Chiuta wangugwiriskiya ntchitu nthowa yeniyi pa nyengu yo wapaskanga Mozesi marangu 10.​—Chituwa 31:18.

  • Walongolonga kuziya mwa angelu. Mwakuyeruzgiyapu, Chiuta wangugwiriskiya ntchitu mungelu kuti wakakambiyi Mozesi uthenga wo wakhumbikanga kuchiwupereka kwaku Farao ku Ijipiti. (Chituwa 3:2-4, 10) Po pakhumbikanga kukambika mazu ngaki chayingu, Yehova wakambiyanga angelu ŵaki kuti angabisangapu chechosi cha. Nge mo wangukambiya ndi Mozesi kuti: “Ulembi mazu yanga chifukwa ndichitengi phanganu ndi yiwi kweniso Ayisirayeli mwakukoliyana ndi mazu ngenanga.”​Chituwa 34:27. *

  • Kuziya mu Viwona. Nyengu zinyaki Chiuta waŵalongonga viwona achimi ŵe masu. (Yesaya 1:1; Habakuku 1:1) Viwona vinyaki vawonekanga pafupi ukongwa ndi munthu ndipu munthu mwenuyu wakhumbikanga kuchitapu kanthu. (Luka 9:28-36; Chivumbuzi 1:10-17) Nyengu zinyaki, achimi awonanga viwona pa nyengu yo awonekanga nge kuti agona. (Machitidu 10:10, 11; 22:17-21) Chiuta waperekanga so uthenga waki kwa achimi kuziya mu malotu pa nyengu yo yiwu agonanga.​—Danyele 7:1; Machitidu 16:9, 10.

  • Kuziya mu Maŵanaŵanu. Chiuta walongozganga maŵanaŵanu nga achimi kuti akonkhoskengi umampha uthenga waki. Ivi ndivu Bayibolu likamba kuti: “Malemba ngosi ngakukambirika ndi Chiuta.” Mazu ngakuti “ngakukambirika ndi Chiuta,” ngangafwatulika so kuti “Chiuta wangututiyamu mvuchi.” (2 Timote 3:16; The Emphasised Bible) Chiuta wangugwiriskiya ntchitu mzimu waki wakupaturika pamwenga kuti nthazi yo iyu wagwiriskiya ntchitu kuti ‘watutiyi’ maŵanaŵanu ngaki mu maŵanaŵanu nga ateŵeti ŵaki. Mwaviyo, tingakamba kuti uthenga wo achimi alembanga watuliyanga kwaku Chiuta.​—2 Samuele 23:1, 2.

Kumbi nyengu zosi uchimi ukamba ŵaka za vo vichitikengi kunthazi?

Awa. Uchimi wa mu Bayibolu ukamba ŵaka za vinthu vo vichitikengi kunthazi pe cha. Kweni mauthenga nganandi ngo ngatuliyanga kwaku Chiuta ngakambanga vinthu vakunthazi, chinanga kuti ngaperekekanga mwakudunjika cha. Mwakuyeruzgiyapu, achimi aku Chiuta atcheŵeskanga Ayisirayeli mwakuwerezgawerezga chifukwa cha maubudi ngawu. Chiuta wachitanga ivi pakukhumba kuŵakambiya za vitumbiku vo atingi azilondiyengi asani avwiya, kweniso cheruzgu cho atingi azilondiyengi asani aleka kuvwiya. (Yeremiya 25:4-6) Mwaviyo, Ayisirayeli atingi alondiyengi vitumbiku mwakukoliyana ndi vo atingi asankhengi.​—Marangu 30:19, 20.

Vakuyeruzgiyapu va mauchimi nga mu Bayibolu vo vikamba za vinthu vinyaki vo vachitikanga kwambula kukambikiya limu kuti vichitikengi

  • Pa nyengu yinyaki po Ayisirayeli apemphanga Yehova kuti waŵawovyi, iyu wangutuma mchimi kuti wakaŵakonkhoske kuti waŵawovyengi cha chifukwa chakuti angukana kuvwiya malangu ngaki.​—Ŵeruzgi 6:6-10.

  • Pa nyengu yo Yesu wakambiskananga ndi munthukazi wa Chisamaliya, iyu wanguvumbuwa vinthu vo munthukazi uyu wanguchitapu kuvuli vo vatingi vichitikengi cha kwambula kuwovyeka ndi Chiuta. Munthukazi uyu wangukamba Yesu kuti ndi mchimi chinanga kuti panyengu iyi Yesu wangukambapu chechosi cha za vinthu vakunthazi.​—Yohane 4:17-19.

  • Pa nyengu yo Yesu watombozgekanga, arwani ŵaki angumujala kumasu,angumupuma ndipu angumufumba kuti: “Loska! ndiyani yo wakupuma?” Yiwu amufumbanga kuti wakambi vo vichitikengi kunthazi cha kweni kuti waŵakambiyi yo wamupuma mwakugwiriskiya ntchitu nthazi zaku Yehova.​—Luka 22:63, 64.

^ ndimi 7 Chinanga kuti pakwamba vingawoneka nge kuti Chiuta walongolonga ndi Mozesi mwachindunji, kweni Bayibolu lilongo kuti Chiuta wangugwiriskiya ntchitu angelu ŵaki kuti wapereki uthenga wa phanganu la Dangu la ku Mozesi.​—Machitidu 7:53; Agalatiya 3:19.