Julani

Kumbi Adamu ndi Heva Anguchita Ubudi Wuli?

Kumbi Adamu ndi Heva Anguchita Ubudi Wuli?

Vo Bayibolu limuka

 Adamu ndi Heva ndiwu ŵenga ŵanthu akwamba kubuda. Yiwu angubuda ŵati aleka kuvwiya Chiuta mwakurya “vipasu va muchimiti chakuziŵisa chamampha ndi chiheni.” Ŵanthu anandi akamba kuti wenuwu ndiwu wenga ubudi wakwamba. * (Chiyambo 2:16, 17; 3:6; Aroma 5:19) Adamu ndi Heva ŵenga ambula kwenere kurya vipasu va muchimiti ichi chifukwa chamiyanga mazaza ngo Chiuta wenangu ngakusankhiya ŵanthu chinthu chamampha pamwenga chiheni. Adamu ndi Heva anguchita chinthu chambula kwenere kujisankhiya ŵija kuti aryi vipasu va muchimiti chenichi. Vo yiwu anguchita vingulongo kuti akana kuti Chiuta waŵapangiyengi marangu nga cho ntchamampha ndi cho ntchiheni.

  •  Kumbi ntchinthu wuli cho chinguchitika Adamu ndi Heva ŵati abuda?

  •  Kumbi ubudi waku Adamu ndi Heva utitikwaska wuli?

  •  Kumbi tingafwatuka ku ubudi waku Adamu ndi Heva?

  •  Fundu zaboza zakukwaskana ndi ubudi wo Adamu ndi Heva anguchita

Kumbi ntchinthu wuli cho chinguchitika Adamu ndi Heva ŵati abuda?

 Chifukwa chakuti Adamu ndi Heva angubuda, yiwu angukota ndipu pavuli paki angufwa. Yiwu angunanga ubwezi wawu ndi Chiuta ndipu angutaya mwaŵi wakuja ndi umoyu wamuyaya kweniso wambula masuzgu.—Chiyambo 3:19.

Kumbi ubudi waku Adamu ndi Heva utitikwaska wuli?

 Adamu ndi Heva akuŵapaskiyaku ubudi ŵana ŵawu wosi. Venivi viyanana waka ndi mo mpapi wangayambuzgiya matenda ku mwana waki. (Aroma 5:12) Ndichu chifukwa chaki tosi tikuwa ndi “ubudi,” * kung’anamuwa kuti te ambula kufikapu ndipu nkhwambula kusuzga kuchita vinthu viheni.—Sumu 51:5; Aefeso 2:3.

 Taŵanthu titama, tikota ndipuso titufwa chifukwa cha ubudi pamwenga kuti kuleka kufikapu ko tikutole kwaku Adamu. (Aroma 6:23) Tikumana so ndi masuzgu chifukwa cha vinthu vo taŵeni tinangisa ndipuso chifukwa cha vo anyidu anangisa.—Wakutaula 8:9; Yakobe 3:2.

Kumbi tingafwatuka ku ubudi waku Adamu ndi Heva?

 Hinya. Bayibolu likamba kuti Yesu wangufwa nge “sembi yakubenekere maubudi ngidu.” (1 Yohane 4:10, mazu ngamumphata) Sembi yaku Yesu yingatifwatuwa ku masuzgu ngo tikumana nangu chifukwa cha ubudi wo tikutole kwaku Adamu. Yingatiwovya so kuti tizisaniyi umoyu wamuyaya kweniso wambula masuzgu wo Adamu ndi Heva angutaya.—Yohane 3:16. *

Fundu zaboza zakukwaskana ndi ubudi wo Adamu ndi Heva anguchita

 Fundu yaboza: Tingaja cha pa ubwezi ndi Chiuta chifukwa cha ubudi waku Adamu ndi Heva.

 Fundu yauneneska: Chiuta watitimba mulandu cha chifukwa cha ubudi wo Adamu ndi Heva anguchita. Iyu wavwisa kuti te ambula kufikapu ndipu walindizga cha kuti tichitengi vinthu vo tingatondeka kufiska. (Sumu 103:14) Chinanga kuti tikumana ndi masuzgu chifukwa cha ubudi wo tikutole kwaku Adamu, kweni te ndi mwaŵi wakuja pa ubwezi wakukho ndi Chiuta.—Nthanthi 3:32.

 Fundu yaboza: Ubatizu uchitiska kuti munthu wafwatuliki ku ubudi waku Adamu. Mwaviyo, ŵana abonda nawu atenere kubatizika.

 Fundu yauneneska: Mbuneneska kuti tikhumbika kubatizika kuti tizitaskiki, kweni kuvwana mu sembi yaku Yesu pe ndiku kungachitiska kuti munthu watoweseki ku ubudi. (1 Peturo 3:21; 1 Yohane 1:7) Chifukwa chakuti munthu waja ndi chivwanu asani waziŵa uneneska, vingachitika cha kuti ŵana abonda aje ndi chivwanu. Mwaviyo, Bayibolu lizomereza cha kuti ŵana abatizikengi ŵeche abonda. Fundu yeniyi yinguwoneke mu nyengu ya akutumika. Yiwu abatizanga abonda cha, kweni abatizanga “anthulumi ndi anthukazi” arara wo ŵenga ndi chivwanu mu Mazu ngaku Chiuta.—Machitidu 2:41; 8:12.

 Fundu yaboza: Chiuta wakutemba anthukazi chifukwa Heva ndiyu wangwamba kurya chipasu cho Chiuta wanguŵakaniza.

 Fundu yauneneska: Mumalu mwakutemba anthukazi, Chiuta wangutemba “njoka yakali ukongwa yo yidanika kuti Dyaboli kweniso Satana,” yo wanguchitiska kuti Heva wabudi. (Chivumbuzi 12:9; Chiyambo 3:14) Kusazgiyaku yapa, Chiuta wangukamba kuti ubudi ukuza chifukwa chaku Adamu, muwolu waki cha.—Aroma 5:12.

 Ntchifukwa wuli Chiuta wangukamba kuti Adamu wazamulamuliya muwolu waki? (Chiyambo 3:16) Chiuta wachikamba mazu yanga, wachiskanga kuti anthulumi alamuliyengi awolu wawu cha. Mumalu mwaki, wakambiyanga limu masuzgu ngo ngazamuchitikanga chifukwa cha ubudi. Chiuta wakhumba kuti anthulumi ayanjengi awolu wawu ndipuso aŵatumbikengi. Iyu wakhumba so kuti anthulumi aŵatumbikengi ukongwa anthukazi wosi.—Aefeso 5:25; 1 Peturo 3:7.

 Fundu yaboza: Adamu ndi Heva anguchita chigololu.

 Fundu yauneneska: Adamu ndi Heva anguchita chigololu cha. Tikamba viyo chifukwa:

  •   Chiuta wangulamula Adamu kuti wangaryanga cha vipasu va muchimiti chakuziŵisa chamampha ndi chiheni pa nyengu yo Adamu wenga yija, muwolu waki wechendalengeki.—Chiyambo 2:17, 18.

  •   Chiuta wangulamula Adamu ndi Heva kuti ‘abalani ndi kuyandana.’ Ivi ving’anamuwa kuti akhumbikanga kuja ndi ŵana. (Chiyambo 1:28) Mwaviyo, tatingi tikambengi kuti Chiuta ngwankhaza pakulanga Adamu ndi Heva chifukwa chakuchita vo iyu wanguŵalamula.

  •   Adamu ndi Heva angubuda nyengu yimoza cha. Heva ndiyu wangwamba kubuda, pavuli paki mulumu waki.—Chiyambo 3:6.

  •   Bayibolu lizomereza kuti munthulumi ndi munthukazi wo akutolana agonanengi.—Nthanthi 5:18, 19; 1 Akorinto 7:3.

^ ndimi 1 Ŵanthu anandi agomezga kuti ubudi wakwamba ndi wo Adamu ndi Heva anguchita. Kweni nge mo Bayibolu likambiya, uneneska ngwakuti boza lo Satana wangukambiya Heva ndiwu wenga ubudi wakwamba.—Chiyambo 3:4, 5; Yohane 8:44.

^ ndimi 7 Mu Bayibolu, mazu ngakuti “ubudi” ngang’anamuwa kuchita waka vinthu viheni pe cha kweni ngang’anamuwa so kuleka kufikapu ko tikuhara kwaku Adamu.

^ ndimi 9 Kuti muziŵi vinandi vakukwaskana ndi sembi yaku Yesu kweniso mo tingayanduliya ndi sembi yeniyi, wonani nkhani yamutu wakuti: “Kumbi Yesu Wataska Wuli Ŵanthu?