Julani

Kumbi Mauchimi Ngakukamba Zaku Mesiya Ngalongo Kuti Yesu Wenga Mesiya?

Kumbi Mauchimi Ngakukamba Zaku Mesiya Ngalongo Kuti Yesu Wenga Mesiya?

Vo Bayibolu limuka

 Hinya. Pa nyengu yo Yesu wenga pacharu chapasi, wangufiska mauchimi nganandi ngakukwaskana ndi “Mesiya Mulongozgi,” mweniyo wazamuja “Mtaski wa charu.” (Danyele 9:25; 1 Yohane 4:14) Ndipu wati wayuskika, Yesu wangulutirizga mbwenu kufiska mauchimi ngakukwaskana ndi Mesiya.—Sumu 110:1; Machitidu 2:34-36.

 Kumbi zina lakuti “Mesiya” ling’anamuwanji?

 Mazu nga Chiheberi ngakuti Ma·shiʹach (Mesiya) kweniso mazu nga Chigiriki ngakuti Khri·stos (Khristu) ngosi ngang’anamuwa “wakusankhika.” Mwaviyo, mazu ngakuti “Yesu Khristu” ngang’anamuwa kuti “Yesu Ngwakusankhika” pamwenga kuti “Yesu ndi Mesiya.”

 Mu nyengu yakali, asani munthu wasankhika kuti waje pa udindu wapade amudilanga mafuta pa mutu. (Ŵalevi 8:12; 1 Samuele 16:13) Yesu wangusankhika ndi Chiuta kuti waje Mesiya ndipu wenuwu mbudindu ukulu ukongwa. (Machitidu 2:36) Mwaviyo, Chiuta wangugwiriskiya ntchitu mzimu wakupaturika pakusankha Yesu, mumalu mwakuti wadiliki mafuta pa mutu.—Mateyu 3:16.

 Kumbi pakhumbikanga ŵanthu anandi kuti afiski mauchimi ngakukwaskana ndi Mesiya?

 Awa. Nge mo chidindu chiŵiya cha munthu yumoza, mauchimi nga mu Bayibolu nangu ngalongo kuti ngangufiskika ndi munthu yumoza Mesiya pamwenga kuti Khristu. Chinanga ve viyo, Bayibolu litcheŵeska kuti “achimi aboza azamubuka ndi kuchita visimikizu vikulu kweniso vakuziziswa kuti alandizgi ŵanthu, ndipu asani nkhwamachitika alandizgi chinanga mbakusankhika.”—Mateyu 24:24.

 Kumbi Mesiya wazengi kunthazi?

 Awa. Bayibolu likukambiya limu kuti Mesiya wazamuja wa mu mphapu ya Fumu Davidi yaku Isirayeli. (Sumu 89:3, 4) Kweni viwoneka kuti mipukutu yakali ya Ayuda yo yakonkhoskanga vakukwaskana ndi mzeri wa banja laku Davidi yingusoŵa, ndipu yitenere kuti ingunangika panyengu yo Aroma anguthereska Yerusalemu 70 C.E. * Kutuliya pa nyengu iyi, pengavi munthu weyosi yo watingi wakambengi kuti ndi Mesiya kutuwa mu banja lachifumu laku Davidi. Chinanga kuti ve viyo, mu nyengu yaku Yesu penga mipukutu yinyaki yo yinguchitiska kuti arwani aleki kususka vo iyu wangukamba kuti ngwa mu banja laku Davidi.—Mateyu 22:41-46.

 Kumbi ndi mauchimi ngalinga ngakukwaskana ndi Mesiya ngo nge mu Bayibolu?

 Mphakusuzga kuti tikambi unandi wa mauchimi ngo ngakamba zaku Mesiya. Mwakuyeruzgiyapu, pe nthowa zakupambanapambana zo ŵanthu angagwiriskiya ntchitu pakuŵerenge nkhani zakukwaskana ndi Mesiya. Ndipu nkhani yo yizumbulika pa Yesaya 53:2-7 yikonkhoska za mauchimi ngakupambanapambana ngo ngakamba zaku Mesiya. Ŵanthu anyaki angawona nge mavesi ngosi yanga ngakamba ŵaka za uchimi umoza, penipo anyaki angawona kuti fundu yeyosi ndi uchimi pakuwija.

 Mauchimi nganyaki ngakukwaskana ndi Mesiya ngo Yesu wangufiska

Uchimi

Po usanirika

Kufiskika kwaki

Mphapu yaku Abrahamu

Chiyambo 22:17, 18

Mateyu 1:1

Mphapu yaku Isaki, mwana waku Abrahamu

Chiyambo 17:19

Mateyu 1:2

Wanguwiya mu fuku la Yuda

Chiyambo 49:10

Mateyu 1:1, 3

Wangutuliya mu mphapu yaku Davidi

Yesaya 9:7

Mateyu 1:1

Wangubalika ndi munthukazi yo wenga wechendagonanepu ndi munthurumi

Yesaya 7:14

Mateyu 1:18, 22, 23

Wanguwiya ku Betelehemu

Mika 5:2

Mateyu 2:1, 5, 6

Wazamudanika kuti Emanuwelu *

Yesaya 7:14

Mateyu 1:21-23

Wazamuwiya m’banja likavu

Yesaya 53:2

Luka 2:7

Ŵana anamana azamubayika asani waziwaku ŵaka

Yeremiya 31:15

Mateyu 2:16-18

Wazamudanika kuti watuweku ku Ijipiti

Hoseya 11:1

Mateyu 2:13-15

Wazamudanika kuti Mnazareti *

Yesaya 11:1

Mateyu 2:23

Muthenga wazamupharazgiya limu zaku iyu

Malaki 3:1

Mateyu 11:7-10

Wazamusankhika kuja Mesiya mu 29 C.E. *

Danyele 9:25

Mateyu 3:13-17

Chiuta wazakutiziŵisa kuti Yesu ndi Mwana Waki

Sumu 2:7

Machitidu 13:33, 34

Wazakujipereka ukongwa panyumba yaku Chiuta

Sumu 69:9

Yohane 2:13-17

Wazamuja mupharazgi wa Uthenga wamampha

Yesaya 61:1

Luka 4:16-21

Wazamupharazga za ukweru ku Galileya

Yesaya 9:1, 2

Mateyu 4:13-16

Wazamuchita vakuziziswa nge Mozesi

Marangu 18:15

Machitidu 2:22

Wazamukamba mazu ngaku Chiuta nge Mozesi

Marangu 18:18, 19

Yohane 12:49

Wazamuchiza ŵanthu anandi

Yesaya 53:4

Mateyu 8:16, 17

Wazamuchita vinthu mwakujiyanja cha

Yesaya 42:2

Mateyu 12:17, 19

Wazamuchitiya lisungu ŵanthu akusuzgika

Yesaya 42:3

Mateyu 12:9-20; Mariko 6:34

Wazamulongo urunji waku Chiuta

Yesaya 42:1, 4

Mateyu 12:17-20

Wazamuja Wakulunguchizga Wakuziziswa

Yesaya 9:6, 7

Yohane 6:68

Wazamupharazga zina laku Yehova

Sumu 22:22

Yohane 17:6

Wazamusambiza mu ntharika

Sumu 78:2

Mateyu 13:34, 35

Wazamuja Mulongozgi

Danyele 9:25

Mateyu 23:10

Ŵanthu anandi azakumugomezga cha

Yesaya 53:1

Yohane 12:37, 38

Wazamuja mwa wakuguŵiska

Yesaya 8:14, 15

Mateyu 21:42-44

Ŵanthu azakumukana

Sumu 118:22, 23

Machitidu 4:10, 11

Wazamutinkhika kwambula chifukwa

Sumu 69:4

Yohane 15:24, 25

Wazamusere mu Yerusalemu wakwera pa bulu nge fumu

Zekariya 9:9

Mateyu 21:4-9

Ŵana azakumuthamika

Sumu 8:2

Mateyu 21:15, 16

Wazengi mu zina laku Yehova

Sumu 118:26

Yohane 12:12, 13

Wazamuperekeka ndi mubwezi waki wa pamtima

Sumu 41:9

Yohane 13:18

Wazamuperekeka ndi ndalama 30 za siliva *

Zekariya 11:12, 13

Mateyu 26:14-16; 27:3-10

Mabwezi ngaki ngazakumuthaŵa

Zekariya 13:7

Mateyu 26:31, 56

Ŵanthu azakumupusikiya

Sumu 35:11

Mateyu 26:59-61

Ŵanthu akumumba mlandu wazakuŵamuka chechosi cha

Yesaya 53:7

Mateyu 27:12-14

Azakumufunyiya mata

Yesaya 50:6

Mateyu 26:67; 27:27, 30

Azakumupuma pamutu

Mika 5:1

Mariko 15:19

Wazamukwechulika

Yesaya 50:6

Yohane 19:1

Wazakuŵaweze cha ŵanthu wo azakumupuma

Yesaya 50:6

Yohane 18:22, 23

Alongozgi a boma azamulimbana nayu

Sumu 2:2

Luka 23:10-12

Azakumukhoma manja ndi malundi pa chimiti

Sumu 22:16

Mateyu 27:35; Yohane 20:25

Azamuchita mayeri ndi vakuvwala vaki

Sumu 22:18

Yohane 19:23, 24

Azakumuwona nge ngwakubuda

Yesaya 53:12

Mateyu 27:38

Wazamutinkhika ndi kuneneka

Sumu 22:7, 8

Mateyu 27:39-43

Wazamusuzgika chifukwa cha ŵanthu akubuda

Yesaya 53:5, 6

1 Peturo 2:23-25

Wazamuwoneka nge wasiyika ndi Chiuta

Sumu 22:1

Mariko 15:34

Azakumupasa vinyu wakusazgaku vinthu vakuŵaŵa

Sumu 69:21

Mateyu 27:34

Wazamukuvwa nyota wechendafwi

Sumu 22:15

Yohane 19:28, 29

Wazamupereka mzimu waki kwaku Chiuta

Sumu 31:5

Luka 23:46

Wazamupereka umoyu waki

Yesaya 53:12

Mariko 15:37

Wazamupereka sembi yakuwombole ŵanthu ku ubudi

Yesaya 53:12

Mateyu 20:28

Viwanga vaki vazamufyoleka cha

Sumu 34:20

Yohane 19:31-33, 36

Azakumugwaza

Zekariya 12:10

Yohane 19:33-35, 37

Azakumuyika limoza ndi ŵanthu akukhupuka

Yesaya 53:9

Mateyu 27:57-60

Wazamuyuskika kutuliya ku nyifwa

Sumu 109:8

Machitidu 2:29-31

Azamusankha munthu munyaki kuti wasere m’malu mwaku yo wangumupereka

Sumu 109:8

Machitidu 1:15-20

Wazamuja kujanja la maryi laku Chiuta

Sumu 110:1

Machitidu 2:34-36

^ Buku laku McClintock and Strong’s Cyclopedia likamba kuti: “Tikayika cha kuti mabanja nganyaki kweniso mazina nganyaki nga ŵanthu amtundu wa Chiyuda ngangunangika pa nyengu yo Yerusalemu wabwangandulikiyanga.”

^ Mu Chiheberi, zina lakuti Emanuwelu ling’anamuwa kuti “Chiuta We Nasi,” ndipu likonkhoska umampha udindu wo Yesu we nawu nge Mesiya. Kuza kwaki pacharu chapasi kweniso vo wanguchita, vingupereka ukaboni wakuti Chiuta we ndi ŵanthu wo atimusopa.—Luka 2:27-32; 7:12-16.

^ Mazu ngakuti “Mnazareti” ngakutuliya ku mazu nga Chiheberi ngakuti neʹtser, ngo ngang’anamuwa “chitivwa.”

^ Kuti muziŵi vinandi vakukwaskana ndi mauchimi nga mu Bayibolu kuzifika mu chaka cha 29 C.E. cho Mesiya wanguziya, ŵerengani nkhani yakuti “Mo Uchimi Waku Danyele Ungukambiya Limu Vakukwaskana ndi Kuza Kwaku Mesiya,” mu buku lakuti Kumbi Tingasambiranji m’Bayibolu?, pa peji 211-212.

^ Uchimi uwu we mu buku la Zekariya, kweni Mateyu yo wakulembaku Bayibolu wakukamba kuti ‘vingukambikiya limu kuporote mwa mchimi Yeremiya.’ (Mate. 27:9) Viwoneka kuti nyengu zinyaki Buku la Yeremiya laŵikikanga kukwamba kwa Malemba ngo ngadanikanga kuti “Vakulemba va Achimi.” (Luke 24:44) Ndichu chifukwa chaki Mateyu wangukamba kuti uchimi uwu we m’buku la “Yeremiya” pakukamba za mabuku ngosi nga achimi kusazgapu buku la Zekariya.