Julani

Kumbi “Maki nga Ufumu” Ntchinthu Wuli?

Kumbi “Maki nga Ufumu” Ntchinthu Wuli?

Vo Bayibolu likamba

 “Maki nga Ufumu” ngang’anamuwa udindu wakujula nthowa yakuti ŵanthu “azisere mu Ufumu waku Chiuta.” (Mateyu 16:19; The New American Bible; Machitidu 14:22) * Yesu wangupaska Peturo “maki nga Ufumu wakuchanya.” Venivi ving’anamuwa kuti Peturo wangupaskika udindu wakuvumbuwa kuti ŵanthu akugomezgeka ndiwu ŵe ndi mwaŵi wakuzisere mu Ufumu wakuchanya asani alonde mzimu wakupaturika.

Kumbi maki ngangugwiriskikiya ntchitu ku ŵanthu naŵa?

 Peturo wangugwiriskiya ntchitu udindu wo Chiuta wangumupaska kuti wajuliyi nthowa magulu ngatatu nga ŵanthu kuti azisere mu Ufumu.

  1.   Ayuda kweniso ŵanthu wo angung’anamukiya ku Chiyuda. Pati pajumpha nyengu yimanavi kutuliya po Yesu wangufwiya, Peturo wanguchiska gulu la Ayuda akugomezgeka kuti avwani mwaku Yesu, yo Chiuta wakumusankha kuti wakalamuliyi mu Ufumu. Peturo wanguŵakonkhoske vo akhumbikanga kuchita kuti azitaskiki. Vo Peturo wanguchita kwenga kuŵajuliya nthowa yakuti akasere mu Ufumu. Ndipu ŵanthu masauzandi nganandi “anguvwisiya mazu ngaki.”​—Machitidu 2:​38-​41.

  2.   Asamariya. Pavuli paki, Peturo wanguluta kwa Asamariya. * Iyu ndi Yohane angugwiriskiya so ntchitu maki nga Ufumu panyengu yo , “anguŵapemphere kuti alonde mzimu wakupaturika.” (Machitidu 8:​14-​17). Venivi vingujuliya nthowa Asamariya kuti azisere mu Ufumu.

  3.   Ŵanthu ambula kudumulika. Pati pajumpha vyaka vitatu ndi hafu kutuliya po Yesu wangufwiya, Chiuta wanguvumbuliya Peturo kuti ŵanthu ambula kudumulika (wo ŵenga Ayuda cha), nawu ŵenga ndi mwaŵi wakuzisere mu Ufumu. Peturo wanguchita vo Chiuta wangumuvumbuliya ndipu wangugwiriskiya ntchitu ki munyaki pakupharazgiya ŵanthu ambula kudumulika wo ŵenga Ayuda cha. Uku kwenga kuŵajuliya mwaŵi wakuti alonde mzimu wakupatulika, aje Akhristu kweniso kuti aje akwenere kuzisere mu Ufumu.​—Machitidu 10:30-​35, 44, 45.

Kumbi “kusere mu Ufumu” kung’anamuwanji?

 Wosi wo “amusere mu Ufumu,” amulamuliya limoza ndi Yesu kuchanya. Bayibolu likukambiya limu kuti yiwu ‘azamuja pamipandu yaufumu’ ndipu “azamuwusa charu chapasi nge mafumu.”​—Luka 22:29, 30; Chivumbuzi 5:​9, 10.

Fundu zaboza zakukwaskana ndi maki nga Ufumu

 Fundu ya boza: Peturo ndiyu wasankha wo aluta kuchanya.

 Fundu ya uneneska: Bayibolu likamba kuti Peturo ndiyu cha yo “wazamuyeruzga amoyu ndi akufwa” kweni Yesu Khristu. (2 Timote 4:​1, 8; Yohane 5:​22) Chinanga ndi Peturo nayu, wangukamba kuti Yesu “mwenuyu ndiyu Chiuta wakumuŵika mwadangu kuti wayeruzgi amoyu ndi akufwa.”​—Machitidu 10:34, 42.

 Fundu ya boza: Wo ŵe kuchanya alindizanga Peturo kuti ndiyu wasankhengi nyengu yo agwiriskiyengi ntchitu maki nga Ufumu.

 Fundu ya uneneska: Yesu wachikamba vakukwaskana ndi maki nga Ufumu, wangukambiya Peturo kuti: “Chechosi cho ungamanga pacharu chapasi, chazamuja kuti chamangika kali kuchanya, chechosi cho ungafwatuwa pacharu chapasi chazamuja kuti chafwatulika kali kuchanya.” (Mateyu 16:19; The New American Bible) Ŵanthu anyaki aŵanaŵana kuti mazu nga pa lemba ili ngang’anamuwa kuti Peturo ndiyu wasankha vinthu vo vichitika kuchanya. Kweni mazu nga Chigiriki chakwambiriya pa lemba lenili, ngang’anamuwa kuti Peturo ndiyu cha yo wasankhanga vinthu kweni walondonga vinthu vo vasankhika kali kuchanya. *

 Bayibolu lilongo so kuti Peturo wachitanga vinthu vo vasankhika kali kuchanya pakugwiriskiya ntchitu maki nga Ufumu. Mwakuyeruzgiyapu, wanguvwiya ulongozgi wakutuliya kwaku Chiuta pakugwiriskiya ntchitu ki wachitatu.​—Machitidu 10:19, 20.

^ ndimi 1 Nyengu zinyaki, Bayibolu ligwiriskiya ntchitu mazu ngakuti “maki” kulongo udindu pamwenga ntchitu.​—Yesaya 22:20-22; Chivumbuzi 3:​7, 8.

^ ndimi 4 Chisopa cha Asamariya chapambananga ndi chisopa cha Chiyuda kweni vinthu vinyaki vo Asamariya achitanga kweniso asambizanga vatuliyanga mu Dangu laku Mozesi.

^ ndimi 10 Wonani mazu ngo nge palemba la Mateyu 16:19 mu Bayibolu lakusambiriya la pa Intaneti la New World Translation of the Holy Scriptures.