Julani

Kumbi Yesu Wataska Wuli Ŵanthu?

Kumbi Yesu Wataska Wuli Ŵanthu?

Vo Bayibolu likamba

Yesu wangutaska ŵanthu akugomezgeka panyengu yo wangupereke umoyu waki nge sembi. (Mateyu 20:​28) Ndichu chifukwa chaki Bayibolu likamba kuti Yesu ndi “Mtaski wa charu.” (1 Yohane 4:​14) Bayibolu likamba so kuti: “Ndipuso utaski utuliya ku munthu munyaki weyosi cha, pakuti palivi zina linyaki pacharu chapasi lo likuperekeka ku ŵanthu kuti titaskiki nalu.”​—Machitidu 4:​12.

Yesu ‘wangulaŵa nyifwa chifukwa cha munthu weyosi’ yo watimugomezga. (Aheberi 2:9, Yohane 3:​16) Pavuli paki, ‘Chiuta wangumuyuska,’ ndipu wangukwere kuchanya ndi liŵavu la uzimu. (Machitidu 3:​15) Sonu, Yesu wangafiska so “kutaskiya limu wosi wo atuza kwaku Chiuta kuporote mwaku iyu chifukwa ngwamoyu nyengu zosi kuti waŵeyere mumalu mwawu.”​—Aheberi 7:25.

Ntchifukwa wuli Yesu ngwakwenere kutiŵeyere kwaku Chiuta?

Tosi te akubuda. (Aroma 3:23) Ubudi we nge chinthu cho chichitiska kuti ŵanthu alekengi kuja nayu pafupi Chiuta kweniso kuti afwengi. (Aroma 6:​23) Yesu Khristu wateŵete nge ‘wakumiya’ wosi wo agomezga sembi yaki ya uwombozi. (1 Yohane 2:1, mazu ngamumphata) Iyu watiŵaŵeyere mumalu mwawu ndipo wapempha Chiuta kuti wavwengi mapempheru ngawu kweniso kuti waŵagowokiyengi ma ubudi ngawu chifukwa agomezga sembi ya nyifwa yaki. (Mateyu 1:​21, Aroma 8:​34) Chiuta watuvwa mapempheru ngidu asani tipempha kuziya mwaku Yesu mwakukoliyana ndi khumbu laki. Chiuta wangutuma Yesu pacharu chapasi “kuti charu chitaskiki kuporote mwaku iyu.”​—Yohane 3:​17.

Kumbi kugomezga ŵaka Yesu nkhwakukwana kuti tizitaskiki?

Awa. Chinanga kuti kugomezga Yesu nkhwakukhumbika ukongwa kuti tizitaskiki, kweni kuchita viyo nkhwakukwana cha. (Machitidu 16:30, 31) Bayibolu likamba kuti: “Nge mo liŵavu lambula mzimu liŵiya lakufwa, chivwanu chambula ntchitu zaki nachu ntchakufwa.” (Yakobe 2:​26) kuti tizitaskiki tikhumbika:

  • Kusambira zaku Yesu ndipuso Awisi a Yehova.​—Yohane 17:​3.

  • Kuvwana mwaku Yesu kweniso Yehova.​—Yohane 12:​44; 14:1.

  • Kulongo chivwanu chidu mwakuvwiya marangu ngaki. (Luka 6:​46, 1 Yohane 2:​17) Yesu wangukamba kuti ndi wosi cha wo akamba kuti “Ambuya” azamutaskika kweni ŵija pe wo “achita khumbu la Ada [ŵaki] wo ŵe kuchanya.”​—Mateyu 7:​21.

  • Kulutirizga kulongo chivwanu chinanga kuti tingakumana ndi masuzgu. Yesu wangukonkhoska mwakuvwika umampha fundu iyi panyengu yo wangukamba kuti: “Kweni yo wazamukunthiyapu mpaka pakumaliya, wazamutaskika.”​—Mateyu 24:​13.