Chinanga kuti Bayibolu likonkhoska vinandi cha pa nkhani ya kutchova juga, kweni kuŵanaŵaniya fundu za mu Bayibolu kungatiwovya kuziŵa chifukwa cho Chiuta wawone kuti kuchita venivi nkhunanga.—Aefeso 5:17. a

•   Mbunu ndizu zichitiska kuti ŵanthu atchovengi juga, kweni Chiuta watinkha jalidu la mbunu. (1 Akorinto 6:9, 10; Aefeso 5:3, 5) Ŵanthu wo atchova juga akhumba kuti yiwu pe ndiwu awinengi kuti asaniyi ndalama zinandi, ndipu akondwa asani anyawu aluza. Kweni Bayibolu likaniza kukhumbira vinthu va ŵanthu anyaki.—Ekisodo 20:17; Aroma 7:7; 13:9, 10.

•   Kutchova juga, chinanga ungayamba ndi ndalama yimanavi waka, kungapangiska munthu kwamba kwanja ndalama.—1 Timote 6:9, 10.

•   Ŵanthu wo atchova juga, kanandi agomezga vamizimu. Kweni Chiuta wawona kuti kuchita viyo kuyanana waka ndi kusopa angoza, vo vikoliyana cha ndi kusopa kwauneneska.—Yesaya 65:11.

•   Mumalu mwa kukhumba kusaniya vinthu vambula kuvigwiriya ntchitu, Bayibolu lititichiska kuti tigwirengi ntchitu mwaphamphu. (Wakutawula 2:24; Aefeso 4:28) Wo alondo ulongozgi wa mu Bayibolu wenuwu aturya “chakurya cho yiwu ŵeneku achigwiriya ntchitu.”—2 Atesalonika 3:10, 12.

•   Kutchova juga kungayambisa mzimu wamaphara, wo Bayibolu likaniza.—Agalatiya 5:26.