Julani

Kumbi Kuja Wakupaturika Kung’anamuwanji?

Kumbi Kuja Wakupaturika Kung’anamuwanji?

Vo Bayibolu likamba

Kuja wakupaturika kung’anamuwa kutinkha vinthu vakufipiskika. Mazu Ngachiheberi ngo akungafwatuliya kuti “kupaturika” ngatuliya ku mazu ngo ngang’anamuwa kuti “kupatuwa.” Mwaviyo, chinthu cho ntchakupaturika atichipatuwa kuti chigwirengi ntchitu zapade pamwenga zakupaturika pe.

Chiuta ngwakupaturika kuluska chechosi. Bayibolu likamba kuti: “Kulivi wakupaturika kuluska Yehova.” * (1 Samuele 2:2) Mwaviyo, Chiuta ndiyu wakuŵika marangu nga cho ntchakupaturika.

Mazu ngakuti “kupaturika” ngagwiriskikiya ntchitu pakukamba chechosi cho chikwaskana ndi kusopa Chiuta. Mwakuyeruzgiyapu Bayibolu likamba za:

  • Malu Ngakupaturika: Chiuta wangukambiya Mozesi pa chivwati cho chakoliyanga motu kuti: “Malu ngo wamapu ndi malu ngakupaturika.”—Chituwa 3:2-5.

  • Maunganu ngakupaturika: Maunganu ngo Ayisirayeli aŵanga nangu pakusopa Yehova, angadananga kuti “maunganu ngakupaturika.”—Ŵalevi 23:37.

  • Viyaŵi vakupaturika: Viyaŵi vo agwiriskiyanga ntchitu mu nyumba yakusopiyamu ku Yerusalemu avidananga kuti “viyaŵi vakupaturika.” (1 Ŵakaronga 8:4) Chinanga kuti Ayisirayeli awonanga kuti viyaŵi ivi vapade ukongwa kweni akhumbikanga cha kuvisopa. *

Kumbi munthu wakubuda wangaja wakupaturika?

Hinya. Chiuta wakambiya Akhristu kuti: “Muje akupaturika, chifukwa ini nde wakupaturika.” (1 Peturo 1:16) Mbuneneska kuti ŵanthu ambula kufikapu angayanana nayu cha Chiuta pa nkhani ya kuja akupaturika. Kweni ŵanthu wo avwiya marangu ngaku Chiuta angaja ‘akupaturika kweniso akuzomerezeka kwaku Chiuta.’ (Aroma 12:1) Munthu walongo kuti ngwakupaturika kuziya mu vo wakamba ndi kuchita. Mwakuyeruzgiyapu, iyu walondo ulongozgi wa mu Bayibolu wakuti “muje akupaturika ndipuso mungachitanga cha malusu ngaheni ngakugonana” ndi wakuti “jani akupaturika mu vakuchita vinu vosi.”—1 Atesalonika 4:3; 1 Peturo 1:15.

Kumbi vingachitika kuti Chiuta waleki kwanja munthu yo pakwamba wamuwonanga kuti ngwakupaturika?

Hinya. Asani munthu wayamba kuja ndi mijalidu yiheni, Chiuta wawona kuti munthu waviyo ngwakupaturika so cha. Mwakuyeruzgiyapu, buku la Aheberi le ndi uthenga wo uluta kwa “abali akupaturika” kweni litiŵatcheŵeska kuti angayamba “kuja ndi mtima uheni wambula chivwanu mwa kutuwaku kwaku Chiuta wamoyu.”—Aheberi 3:1, 12.

Fundu zaboza zakukwaskana ndi kuja akupaturika

Fundu yaboza: Munthu wangaja wakupaturika asani watijinora vinthu vamampha.

Fundu yauneneska: Bayibolu likamba kuti ‘kusuzga liŵavu,’ pamwenga kujinora vinthu vinyaki vamampha ‘nkhwambula kovya’ kwaku Chiuta. (Akolose 2:23) Mumalu mwaki, Chiuta wakhumba kuti tikondwengi ndi vinthu vamampha. Bayibolu likamba kuti: “Weyosi waryi ndi kumwa ndi kukondwa ndi ntchitu zaki zosi. Ndi mphasu yakutuwa kwaku Chiuta.”—Wakutaula 3:13.

Fundu yaboza: Munthu waja wakupaturika asani wechendagonanepu ndi munthurumi pamwenga munthukazi.

Fundu yauneneska: Chinanga kuti Akhristu angasankha kuleka kuto pamwenga kuyirwa, kuleka kugonana ndi munthurumi pamwenga munthukazi ndiku cha kungachitiska kuti munthu waje wakupaturika kwaku Chiuta. Mbuneneska kuti wo ŵechendato pamwenga kuyirwa angachita uteŵeti wawu kwambula kutimbanyizika ndi chechosi. (1 Akorinto 7:32-34) Kweni Bayibolu lilongo kuti wo ŵe pa banja nawu angaja akupaturika. Peturo yo wenga yumoza wa akutumika aku Yesu, wanguto.—Mateyu 8:14; 1 Akorinto 9:5.

^ ndimi 4 Yehova ndilu zina laku Chiuta. Mu ma Bayibolu nganandi asazga zina ili ndi mazu ngakuti “kupaturika” ndipuso “mutuŵa.”

^ ndimi 8 Bayibolu likaniza kusopa viyaŵi vakali vo agwiriskiyanga ntchitu pakusopa Chiuta.—1 Akorinto 10:14.