Julani

Kumbi Kuja Munthu Wauzimu Kung’anamuwanji? Kumbi Ndingaja Munthu Wauzimu Kwambula Kusere Muchisopa?

Kumbi Kuja Munthu Wauzimu Kung’anamuwanji? Kumbi Ndingaja Munthu Wauzimu Kwambula Kusere Muchisopa?

Vo Bayibolu limuka

 Mu Bayibolu mazu ngakuti munthu wauzimu ngangang’anamuwa mtima wakukhumbisisa kukondwesa Chiuta ndipuso kusambira kuŵanaŵana nge mo Chiuta waŵanaŵaniya. Munthu wauzimu watesesa kuchita vinthu mwakukoliyana ndi fundu zaku Chiuta ndipuso walongozgeka ndi Mzimu Waki Wakupaturika. *Aroma 8:5; Aefeso 5:1.

 Kanandi Bayibolu likonkhoska mphambanu yo yilipu pakati pa vo munthu wauzimu wachita ndi vo munthu yo waleka kwanja vinthu vauzimu wachita. Mwakuyeruzgiyapu, mwakupambana ndi munthu wauzimu, “munthu yo walongozgeka ndi makhumbiru nga liŵavu wativizomera cha vinthu va mzimu waku Chiuta,” pamwenga kuti visambizu vaku Chiuta. (1 Akorinto 2:14-16) Mwakupambana ndi ŵanthu auzimu, ŵanthu a liŵavu aja ndi ‘sanji ndipuso mphindanu’ mumalu mwakuja ndi mtima wakupaska kweniso chimangu. (1 Akorinto 3:1-3) Ndipu ŵanthu wo akamba vinthu viheni vakukwaskana ndi anyawu, apatuska mabwezi ndipu achita vinthu nge “vinyama ndipuso alivi mzimu waku Chiuta.”—Yuda 19; Nthanthi 16:28. *

Mu nkhani iyi tikambiskanengi mafumbu yanga

 Kumbi kuja munthu wauzimu kutuliya pani?

 Tija ŵanthu auzimu chifukwa chakuti tikulengeka mu chikozgu chaku Chiuta. (Genezesi 1:27) Mwaviyo, vakuziziswa cha kuwona kuti ŵanthu anandi akhumbisiska kuziŵa vinthu vo angaleka kuviwona pamwenga kuviko.

 Mwakawi, taŵanthu tilongo mijalidu yakuyanana ndi yo Yehova * Chiuta we nayu nge chimangu, lisungu ndi kuŵavi sankhu. (Yakobe 3:17) Kusazgiyapu yapa, Chiuta wapereka mzimu waki wakupaturika ku ŵanthu wo avwiya marangu ngaki.—Machitidu 5:32.

 Ntchifukwa wuli kuja munthu wauzimu nkhwakukhumbika?

 Kuja munthu wauzimu kulongozge ku “umoyu ndi chimangu.” (Aroma 8:6) Umoyu ndipuso chimangu ndi mphasu yakutuliya kwaku Chiuta.

  •   Umoyu: Chiuta wakulayizga kuti wazamupereka umoyu wamuyaya ku ŵanthu auzimu.—Yohane 17:3; Agalatiya 6:8.

  •   Chimangu: Ivi ving’anamuwa kuja pa chimangu ndi Chiuta. Ŵanthu wo aŵanaŵaniya waka vakuliŵavu aja arwani aku Chiuta. (Aroma 8:7) Kusazgiyapu yapa, Chiuta wapereka mphotu ku ŵanthu wo atesesa kuja akukho mwauzimu mwa kuja ndi “chimangu chaku Chiuta cho chiluska kuziŵa vinthu kosi.” (Afilipi 4:6, 7) Chimangu chamumtima chenichi chitiŵawovya kuja ndi umoyu walikondwa.—Mateyu 5:3.

 Kumbi ndingachita wuli kuti ndije munthu wauzimu?

  •   Musambirengi ndipuso muvwiyengi marangu ngaku Chiuta. Mungachita venivi mwakuŵerenga Bayibolu lo le ndi maŵanaŵanu ngaku Chiuta, ngo ngakulembeka ndi anthulumi wo ‘alongozgekanga ndi mzimu wakupaturika.’ (2 Peturo 1:21) Vo musambirengi vikuwovyeningi kuti musopengi Chiuta “mu mzimu ndi mu uneneska,” mwakulongozgeka ndi mzimu wakupaturika ndipuso mwakukoliyana ndi khumbu laku Chiuta.—Yohane 4:24

  •   Mupempherengi kuti Chiuta wakuwovyeni. (Luka 11:13) Chiuta wakuwovyeningi kuti mulongongi mijalidu yo yingalongo kuti mwe munthu wauzimu. (Agalatiya 5:22, 23) Wangakuwovyani so kuti muje ndi zeru kuti mumalani ndi masuzgu pa umoyu.—Yakobe 1:5.

  •   Muchezengi ndi ŵanthu auzimu. Angakuchiskani kuti muje akukho mwauzimu. (Aroma 1:11, 12) Mwakupambana ndi ŵanthu auzimu, kwanjana ndi ŵanthu wo achita vinthu vo vileka kukondwesa Chiuta, kungakuchitiskani kuti muwere vuli mwauzimu.—Yakobe 4:4.

 Kumbi ndikhumbika kuja muchisopa kuti ndije munthu wauzimu?

 Kuja waka mu chisopa ndiku kuchitiska munthu kuja wauzimu cha. Bayibolu likamba kuti: “Asani munthu munyaki waŵanaŵana kuti wasopa Chiuta kweni watiliko cha lilimi laki, wapusika mtima waki, ndipu kusopa kwaki nkhwaŵaka.”—Yakobe 1:26.

 Chinanga kuti veviyo, Bayibolu lilongo kuti ŵanthu auzimu asopa Chiuta munthowa yo iyu wazomereza. Yiwu aziŵa kuti kwe “mzimu umoza,” wo ndi mzimu wakupaturika waku Chiuta. Mzimu wenuwu utiŵawovya kuti asopengi Chiuta nge “liŵavu limoza,” gulu lakukoliyana lo lisunga “umoza wa mzimu, mwakuja ndi chimangu cho chimanga pamoza.”—Aefeso 4:1-4.

 Fundu zaboza zakukwaskana ndi kuja munthu wauzimu

 Fundu yaboza: Kuja munthu wauzimu kusazgapu nthowa yeyosi yo yingawovya munthu kuti wakhorwengi pamwenga wajivwengi kuti iyu ndiyu munthu wapachanya ukongwa.

 Fundu yauneneska: Bayibolu likamba kuti kuja munthu wauzimu kung’anamuwa kuja umoyu wakulongozgeka ndi maŵanaŵanu ngaku Chiuta. Venivi vilongo kuti munthu wangaja cha wamampha kwambula kulongozgeka ndi Chiuta. Ŵanthu auzimu aziŵa kuti Yehova ndi Mlengi wawu ndipuso kuti akhumbika kuchita vinthu mwakukoliyana ndi khumbu laki.—Salimo 100:3.

 Fundu yaboza: Munthu wangaja wauzimu asani waleka kuja ndi vinthu vo vingachitiska kuti wakondwengi pamwenga asani wachita vinthu vakujipweteka.

 Fundu yauneneska: Munthu yo watijipweteka paliŵavu laki ‘watijisankhiya yija mo wangasope Chiuta’ ndipuso waŵanaŵana mwakuliŵavu. (Akolose 2:18, 23) Bayibolu likamba kuti kuja munthu wauzimu kuzisa likondwa, urwirwi cha.—Nthanthi 10:22.

 Fundu yaboza: Chinthu chechosi cho chikoliyana ndi vakulengeka vauzimu, nge kuchita vamizimu chitovya munthu kuja wauzimu.

 Fundu yauneneska: Nthowa yimoza yakuchitiya vinthu vamizimu, nkhugomezga kuti mzimu wa munthu wakufwa ungalongoro nasi. Kweni, Bayibolu lisambiza kuti ŵanthu akufwa aziŵa chechosi cha. (Wakutawula 9:5) Kuchita vamizimu nkhukambiskana ndi vakulengeka vauzimu vo visuskana ndi Chiuta. Kugomezga vamizimu kutimukwiyiska Chiuta ndipu kutondekesa munthu kuja wauzimu.—Levitiko 20:6; Dotoronome 18:11, 12.

 Fundu yaboza: Mwakawi munthu weyosi waja wauzimu.

 Fundu yauneneska: Chechosi cho Chiuta wakulenga chipereka unkhankhu kwaku iyu. (Salimo 145:10; Aroma 1:20) Kweni, mbanthu pe wo Chiuta wakuŵalenga ndi zeru wo angaja auzimu. Mwakupambana ndi taŵanthu, vinyama vichita vinthu mwakawi kweni vingaja cha pa ubwezi ndi Chiuta. Vichita waka vinthu vo vikhumba. (2 Peturo 2:12) Kweni Bayibolu lipambanisa kuja munthu wauzimu ndi mo vinyama viŵanaŵaniya ndipuso mo vichitiya vinthu.—Yakobe 3:15; Yuda 19.

^ ndimi 1 Mu chineneru chakwambiriya mazu nga mu Bayibolu ngakuti “mzimu” ngang’anamuwa “mvuchi.” Ngangang’anamuwa so chinthu cho chiwoneka cha, kweni ndi nthazi yo yigwira ntchitu. Bayibolu likamba kuti Chiuta ndi Mzimu Wapachanya Ukongwa. Munthu wauzimu wasankha vinthu mwakukoliyana ndi vo Chiuta wakhumba ndipu walongozgeka ndi mzimu Waki wakupaturika.

^ ndimi 2 Mu Bayibolu mazu ngakuti “liŵavu” ngagwiriskikiya ntchitu pakukamba za ŵanthu wo aŵanaŵana ndi kuchita vo liŵavu lawu likhumba kwambula kuŵanaŵaniya fundu zaku Chiuta.

^ ndimi 4 Bayibolu likamba kuti zina laku Chiuta ndi Yehova.—Salimo 83:18.