Julani

Kumbi Chiuta Wangamuka Pempheru Langu?

Kumbi Chiuta Wangamuka Pempheru Langu?

Vo Bayibolu limuka

Hinya. Chiuta wamuka mapempheru nga ŵanthu wosi wo atimupempha mwakutuliya pasi pa mtima kweniso mwakukoliyana ndi khumbu laki. Vingachitika kuti mwechendapempherepu, kweni mungachiskika asani mungaŵerenga mapempheru nga ŵanthu anyaki wo apempheranga kuti “Chiuta ndiwovyeni” ngo ngakulembeka mu Bayibolu. Mwakuyeruzgiyapu:

  • “Ndiwovyeni yimwi Yehova Chiuta wangu; Nditaskeni ndi chanju chinu chambula kumala.”—Sumu 109:26.

  • “Nde wakusuzgika ndipuso nde mukavu, Chiuta ndiwovyeni.”—Sumu 69:6.

Kukamba uneneska, munthu yo wangulemba mazu yanga wamugomezganga ukongwa Chiuta. Kweniso Chiuta watuvwa mapempheru nga ŵanthu wo atimupempha ndi vilatu vamampha, nge wosi wo “asweka mtima” pamwenga “wo mzimu wawu watekenyeka.”—Sumu 34:18.

Mungaŵanaŵananga cha kuti Chiuta we kutali ndi yimwi ndipu waŵanaŵaniyaku cha masuzgu nginu. Bayibolu likamba kuti: “Chinanga kuti Yehova waja kuchanya, wawona ŵanthu akujiyuyuwa, kweni ŵanthu akujikuzga waja nawu patali.” (Sumu 138:6) Yesu nayu wangukambiya akusambira ŵaki kuti: ‘Chinanga ndi sisi la kumutu kwinu Chiuta watiliŵerenga.’ (Mateyu 10:30) Chiuta watikuziŵani umampha ukongwa kuluska po mwaŵeni mutijiziŵiya. Venivi vilongo kuti Chiuta wangamuka mapempheru nginu asani mufipa mtima ndi vinthu vinyaki!—1 Peturo 5:7.