Julani

Kumbi Mungachita Wuli Kuti Muzisaniyi Umoyu Wamuyaya?

Kumbi Mungachita Wuli Kuti Muzisaniyi Umoyu Wamuyaya?

Vo Bayibolu likamba

Bayibolu lilayizga kuti: “Munthu yo wachita khumbu laku Chiuta, waŵengeku mpaka muyaya.” (1 Yohane 2:17) So kumbi Chiuta wakhumba kuti muchitengenji?

  • Musambirengi vakukwaskana ndi Chiuta kweniso Mwana waki Yesu. Mupempheru laki, Yesu wanguti: “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mukutuma.” (Yohane 17:3) Kumbi tikhumbika kuchitanji kuti ‘tiziŵi’ Chiuta ndi Yesu? Tingamuziŵa umampha Chiuta ndi Yesu asani tisambira Bayibolu kweniso asani tigwiriskiya ntchitu fundu zaki pa umoyu widu. * Bayibolu lititiwovya kuziŵa kuti vo Yehova Chiuta yo ndi mulengi widu kweniso yo ndi mweneku wa umoyu wakhumba kuti tichitengi. (Machitidu 17:24, 25) Bayibolu lititikambiya so za Mwana waki Yesu yo wasambizanga za “umoyu wamuyaya.”​—Yohane 6:67-69.

  • Mugomezgengi sembi ya uwombozi yo Yesu wangupereka. Yesu wanguza pacharu chapasi “kuziteŵete ndi kupereka umoyu waki sembi.” (Mateyu 20:28) Sembi ya uwombozi yo Yesu wangupereka yikujula nthowa yakuti ŵanthu anandi azilonde umoyu wambula kumala mu paradayisu pacharu chapasi. * (Sumu 37:29) Yesu wanguti: “Chiuta wakuchiyanja ukongwa charu, mwakuti wakupereka Mwana waki wapade, kuti weyosi wakuvwana mwaku iyu waleki kunangika, kweni waje ndi umoyu wamuyaya.” (Yohane 3:16) Kweni tikhumbika kuziŵa kuti pe vinthu vinandi vo titenere kuchita pade pa kugomezga ŵaka Yesu. Tikhumbika kulongo kuti te ndi chivwanu mwaku iyu kweniso kuti tichita vinthu mwakukoliyana ndi vo iyu watitisambiza ndipuso vo Awisi akhumba.​—Mateyu 7:21; Yakobe 2:17

  • Mukhumbika kuja pa ubwezi wakukho ndi Chiuta. Chiuta wakhumba kuti tindere kufupi ndi iyu ndipuso kuti tije nayu paubwezi. (Yakobe 2:23; 4:8) Chifukwa chakuti Chiuta wangafwa cha, iyu wakhumba kuti mabwezi ngaki nangu so ngajengi kwamuyaya. Kuziya mu Mazu ngaki, Chiuta watitikambiya vo wakhumba kuŵachitiya ŵanthu wosi wo atimupenja kuti: “Mukondwi ndi umoyu kwamuyaya.”​—Sumu 22:26.

Fundu Zaboza pa Nkhani ya Kuja ndi Umoyu Wamuyaya

Fundu yaboza: Vinthu vo ŵanthu alusu atesesa kuchita ndivu vazakutichitiska kuti tizisaniyi umoyu wamuyaya.

Fundu yauneneska: Chinanga kuti achipatala atesesa kusaniya nthowa zakutalikiskiya umoyu, kweni vosi venivi ndivu cha vingachitiska kuti tizije ndi umoyu wamuyaya. Ndi Chiuta yija pe yo wangatipaska umoyu wamuyaya chifukwa iyu ndiyu “chisimi cha umoyu.” (Sumu 36:9) Iyu watitilayizga kuti “wameziyengi limu nyifwa kwamuyaya” ndipu waperekengi umoyu wambula kumala kwaku wosi wo atimugomezga.​—Yesaya 25:8; 1 Yohane 2:25.

Fundu yaboza: Ŵanthu amitundu yinyaki pe ndiwu azamulonde umoyu wamuyaya.

Fundu yauneneska: Chiuta watanjiya ŵanthu a mtundu unyaki cha pakuchita vinthu. Ndipu Bayibolu likamba kuti, “iyu walondere munthu wakutuliya mu mtundu wewosi yo watimuwopa ndi kuchita urunji.” (Machitidu 10:34, 35) Mwaviyo asani ŵanthu a mitundu kweniso a midawuku yakupambanapambana angavwiya Chiuta, angafiska kuzija ndi umoyu wamuyaya.

Fundu yaboza: Umoyu wambula kumala ngwambula kukondwesa.

Fundu yauneneska: Chiuta watitipaska mwaŵi wakuti tizilonde umoyu wamuyaya. Iyu watitiyanja ndipu wakhumba kuti tikondwengi. (Yakobe 1:17; 1 Yohane 4:8) Chiuta waziŵa kuti taŵanthu tija ndi umoyu walikondwa asani tigwira ntchitu zamampha. (Wakutaula 3:12) Ndichu chifukwa chaki iyu watitilayizga kuti wosi wo azamuja pacharu chapasi, azamukondwa ndi ntchitu zo azamugwiranga limoza ndi akwanjiwa ŵawu.​—Yesaya 65:22, 23.

Kusazgiyapu pa fundu yeniyi, ŵanthu wosi wo azamuja kwamuyaya azamulutirizga kusambira vinthu vasonu vakukwaskana ndi Mulengi ndipuso vinthu vinandi vakupambanapambana vo iyu wakulenga. Chiuta wakulenga ŵanthu ndi mtima wakuti ajengi kwamuyaya ndipuso kuti asambirengi vaku iyu chinanga kuti angafiska cha kuziŵa “ntchitu yo Chiuta wauneneska wagwira kutuliya pakwamba mpaka pa umaliru.” (Wakutaula 3:10, 11) Ndichu chifukwa chaki wosi wo azamuja kwamuyaya, nyengu zosi azamusambira ndikuchita vinthu vamampha.

^ ndimi 4 Akaboni aku Yehova Asambira Bayibolu ndi ŵanthu kwawezi. Kuti muziŵi vinandi woneriyani vidiyo yakuti Kumbi Sambiru la Bayibolo Lichitika Wuli?

^ ndimi 5 Wonani nkhani yakuti “Kumbi Yesu Wataska Wuli Ŵanthu?