Julani

“Kugomezga Yesu”—Kumbi Kugomezga Yesu Nkhwakukwana Kuti Munthu Wazitaskiki?

“Kugomezga Yesu”—Kumbi Kugomezga Yesu Nkhwakukwana Kuti Munthu Wazitaskiki?

Vo Bayibolu limuka

 Akhristu agomezga kuti Yesu wangufwa chifukwa cha maubudi nga ŵanthu. (1 Peturo 3:18) Kweni kuti munthu wazitaskiki, pakhumbika vinthu vinandi kuluska waka kugomezga kuti Yesu ndi Mtaski. Tikamba viyo chifukwa chakuti viŵanda navu viziŵa kuti Yesu ndi “Mwana waku Chiuta,” kweni vazamutaskika cha. Mumalu mwaki vazamubayika.—Luka 4:41; Yuda 6.

 Kumbi nditenere kuchitanji kuti ndizitaskiki?

  •   Mutenere kugomezga kuti Yesu wakupereka umoyu waki chifukwa cha maubudi ngidu. (Machitidu 16:30, 31; 1 Yohane 2:2) Venivi visazgapu kugomezga kuti Yesu wenga munthu chayiyu, kweniso kuti vinthu vosi vo Bayibolu likamba vakukwaskana ndi iyu vauneneska nadi.

  •   Ziŵani vo Bayibolu lisambiza. (2 Timote 3:15) Bayibolu likamba kuti wakutumika Paulo ndi Sila angukambiya mulonda wa jeri kuti: “Gomezga mwa Ambuya Yesu ndipu yiwi ndi a munyumba yaku mutaskikengi.” Pavuli paki, yiwu angwamba kumusambiza “mazu ngaku Yehova.” * (Machitidu 16:31, 32) Venivi vilongo kuti mulonda wa jeri wakhumbikanga dankha kungavwisa umampha Mazu ngaku Chiuta kuti wamugomezgengi ukongwa Yesu. Iyu wakhumbikanga so kungaziŵa umampha Malemba.—1 Timote 2:3, 4.

  •   Lapani. (Machitidu 3:19) Mutenere so kulapa, pamwenga kuti kujivwiya chitima chifukwa cha maŵanaŵanu ngaheni kweniso maubudi ngo kali mwachitanga. Ŵanthu azamuziŵa kuti mwalapa nadi asani mwaleka kuchita vinthu vo Chiuta watinkha ndi kwamba kuchita “ntchitu zakukoliyana ndi kulapa.”—Machitidu 26:20.

  •   Batizikani. (Mateyu 28:19) Yesu wangukamba kuti weyosi yo wakhumba kuja wakusambira waki wakhumbika kubatizika. Mulonda wa jeri yo tamuzumbuwapu kali wangubatizika. (Machitidu 16:33) Mwakuyanana ŵaka, wakutumika Peturo wati wasambiza mzinda wa ŵanthu uneneska wakukwaskana ndi Yesu, “ŵanthu wo angulonde mazu ngaki ndi mtima wosi angubatizika.”—Machitidu 2:40, 41.

  •   Muvwiyengi ulongozgi waku Yesu. (Aheberi 5:9) Ŵanthu wo ‘asunga vinthu vosi’ vo Yesu wakulamula, alongo kuti mbakusambira ŵaki kuziya mu vakuchita vawu. (Mateyu 28:20) Yiwu ‘achita vo mazu ngakamba ndipu atuvwa ŵaka cha.’—Yakobe 1:22.

  •   Mukunthiyengepu mpaka pakumaliya. (Mariko 13:13) Akusambira aku Yesu ‘akhumbika kukunthiyapu’ kuti azitaskiki. (Aheberi 10:36) Mwakuyeruzgiyapu, wakutumika Paulo wavwiyanga vinthu vosi vo Yesu wasambizanga, ndipu nyengu zosi wenga wakugomezgeka kwaku Chiuta. Iyu wangukunthiyapu kutuliya pa zuŵa lo wangujaliya Mkhristu mpaka po wangufwiya.—1 Akorinto 9:27.

 Wuli pa nkhani ya “Pempheru la Munthu Wakubuda”?

 Mu matchalitchi nganyaki, ŵanthu apemphera mapempheru nganyaki ngo ngaziŵika kuti “Pempheru la Munthu Wakubuda” kweniso “Pempheru la Utaski.” Mapempheru yanga ngalongo kuti azomereza kuti mbakubuda kweniso agomezga kuti Yesu wakufwa chifukwa cha maubudi ngawu. Kweniso apempha Yesu kuti wasere mumitima yawu pamwenga mu umoyu wawu. Kweni Bayibolu likambapu cha pamwenga kuzomereza mapempheru ngakuchita kuloŵeza, nge “Pempheru la Munthu Wakubuda.”

 Ŵanthu anyaki aŵanaŵana kuti munthu wazamutaskika asani wapemphera “Pempheru la Munthu Wakubuda.” Kweni pempheru pakulija lingataska munthu cha. Pakuti te ŵanthu akubuda, nyengu zinyaki tinangisa. (1 Yohane 1:8) Ndichu chifukwa chaki Yesu wangusambiza akusambira ŵaki kuti nyengu zosi apempherengi kuti maubudi ngawu ngagowokereki. (Luka 11:2, 4) Kweniso, Akhristu anyaki wo ŵenga ndi mwaŵi wakuzija ndi umoyu wamuyaya angutaya mwaŵi wenuwu chifukwa chakuti anguleka kuteŵete Chiuta.—Aheberi 6:4-6; 2 Peturo 2:20, 21.

 Kumbi “Pempheru la Munthu Wakubuda” likwamba wuli?

 Akulemba mbiri asuskana pa nkhani ya nyengu yo ŵanthu angwambiya kupemphera “Pempheru la Munthu Wakubuda.” Anyaki akamba kuti pempheru ili lingwamba pa nyengu yo Chipulotesitanti chingwambiya. Penipo anyaki agomezga kuti pempheru ili lingwamba pa nyengu yo visopa vinyaki vasonu vingwambiya mu vyaka va mu ma 1700 ndi 1800. Kweni mwemosi mo vingaŵiya, Malemba ngatilizomereza cha pempheru ili ndipu lisuskana ndi vo Bayibolu lisambiza.

^ ndimi 3 Bayibolu likamba kuti zina laku Chiuta ndi Yehova.