Julani

Kumbi Bayibolu Lisambiza Kuti Charu Ntchafulati?

Kumbi Bayibolu Lisambiza Kuti Charu Ntchafulati?

Vo Bayibolu likamba

Awa. Bayibolu lisambizapu cha kuti charu ntchafulati. * Bayibolu ndi buku lo lisambiza sayansi cha. Kweni likoliyana ndi vinthu vauneneska vo asayansi asaniya. Mazu nga mu Bayibolu “ngakugomezgeka nyengu zosi, kutuwa sonu mpaka muyaya.”—Sumu 111:8.

 Kumbi Bayibolu ling’anamuwanji asani likamba kuti “makona nganayi nga charu chapasi”?

Mazu ngakuti “makona nganayi nga charu chapasi” ndipuso ngakuti “kuvigoti va charu” ngo ngasanirika mu Bayibolu, ngang’anamuwa kuti charu chapasi ntchamakona nganayi cha pamwenga kuti che ndi vigoti. (Yesaya 11:12; Jobu 37:3) Mumalu mwaki, mazu yanga ngakugwiriskikiya ntchitu mwantharika ndipu ngang’anamuwa ŵaka charu chosi. Bayibolu ligwiriskiya so ntchitu mazu ngakuti kuvuma, kuzambwi, kunkhondi ndi kumwera asani likamba charu chosi.—Luka 13:29.

Mazu nga Chiheberi ngo ngakufwatulikiya kuti “makona” pamwenga “vigoti” ngatuliya ku mazu ngo ngang’anamuwa “mapapa.” Buku linyaki likamba kuti, “chifukwa chakuti kayuni kagwiriskiya ntchitu mapapa pakubenekere tiŵana taki, [mazu yanga nga Chiheberi] ngang’anamuwa kukumaliya kwa chinthu chechosi cho ntchakutambasuka.” (The International Standard Bible Encyclopedia) Buku lenili likamba so kuti pa Jobu 37:3 kweniso pa Yesaya 11:12, “mazu yanga ngang’anamuwa mumphepeti mwa nyanja, mphaka pamwenga kukumaliya kwa charu chapasi.” *

 Nanga Dyaboli wanguchita wuli pakuyesa Yesu?

Kuti wayesi Yesu, Dyaboli wangumutole “pachanya pa phiri litali ukongwa ndipu wangumulongo maufumu ngosi nga pacharu chapasi ndi vinthu vawu vakuzirwa.” (Mateyu 4:8) Anyaki akamba kuti lemba ili lilongo kuti charu ntchafulati ndipu chiwoneka asani munthu wama pamalu nganyaki ngatali ukongwa. Kweni ndimu viliri cha, chifukwa mazu ngakuti “phiri litali ukongwa” pa lemba ili ngakuyeruzgiya waka. Wonani vifukwa vo tikambiya venivi.

  • Pacharu chapasi palivi phiri lo asani munthu wangamapu wangawona maufumu ngosi.

  • Lemba ili lilongo kuti Dyaboli wangulongo Yesu maufumu pe cha, kweni wangumulongo so “vinthu vawu vakuzirwa.” Vinthu venivi munthu wangaviwona cha wama patali. Mwaviyo, Dyaboli watenere kuti wangulongo Yesu chiwona. Venivi vingayanana ŵaka ndi kulongo munthu vithuzi va malu ngakupambanapambana mwakugwiriskiya ntchitu sikirini.

  • Lemba la Luka 4:5 lo pasanirika so nkhani yeniyi, likamba kuti Dyaboli wangulongo Yesu “maufumu ngosi nga pacharu chapasi mu kanyengu kamanavi.” Jisu la munthu lingafiska cha kuwona vosi venivi mu kanyengu kamanavi. Lemba ili lilongo kuti Dyaboli wangugwiriskiya ntchitu nthowa yinyaki pakulongo Yesu vinthu venivi.

^ ndimi 3 Bayibolu likamba kuti Chiuta “waja pachanya pa charu chapasi chakuzunguliya.” (Yesaya 40:22) Mabuku nganyaki ngakamba kuti mazu ngakuti “chakuzunguliya” ngangang’anamuwa chinthu cha nge bola, kweni mbakaswiri wosi cha wo akoliyana ndi fundu yeniyi. Mosi mo vingaŵiya, Bayibolu lisuska fundu yakuti charu ntchafulati.

^ ndimi 8 Revised Edition, Volume 2, peji 4.