Awa, Bayibolu lisambiza kuti ‘asani munthu wataskika kamoza ndikuti kwamala’ cha. Munthu yo wataskika chifukwa cha kuvwana mwaku Yesu Khristu wangaleka kuja ndi chivwanu chenichi ndipu wangazitaskika so cha. Bayibolu likamba kuti, munthu wakhumbika kuchita phamphu pamwenga ‘kuyesesa kufwiyapu’ kuti walutirizgi kuja ndi chivwanu. (Yuda 3, 5) Paulo wangukambiya Akhristu akwambiriya wo anguzomera kulondo Khristu kuti: “Lutirizgani kugwiriya ntchitu utaski winu, mwamantha kweniso mwakumbwambwanthiya.”​—Afilipi 2:​12.

Mavesi nga m’Bayibolu ngo ngasuska chisambizu chakuti ‘asani munthu wataskika kamoza, mbwenu kwamala’

•   Bayibolu litcheŵeska kuti kuchita maubudi ngakulungakulu kuchitiska kuti munthu wazileki kusere mu Ufumu waku Chiuta. (1 Akorinto 6:​9-11; Agalatiya 5:​19-​21) Asani munthu wangataskika kamoza pe mbwenu kwamala, ndikuti vo Bayibolu litititcheŵeska vambula phindu. Kweni Bayibolu lilongo kuti munthu yo wataskika, wangazitaskika cha asani wangayamba kuchita ubudi ukulu. Mwakuyeruzgiyapu, lemba la Aheberi 10:26 likamba kuti: “Pakuti asani tichitiya dala ubudi pavuli pakuti tawuziŵa umampha uneneska, palivi so sembi ya ubudi yo yingaperekeka.”​—Aheberi 10:26; 6:​4-6; 2 Peturo 2:​20-​22.

•   Yesu wangukonkhoska kuti kulutiriza kuja ndi chivwanu nkhwakukhumbika ukongwa. Iyu wangukamba ntharika yo wangujiyeruzgiya ndi chimiti cha mphereska, ndipu akusambira ŵaki wanguŵayeruzgiya ndi mphanda za chimiti chenichi. Anyaki angulongo kuti ŵenga ndi chivwanu mwaku iyu mu vakuchita vawu. Kweni pavuli paki, anguleka kulutiriza kuja ndi chivwanu ndipu ‘anguponyeka kubwalu nge mphanda yambula kupasa vipasu.’ Ivi vinguchitiska kuti aleki kuzitaskika. (Yohane 15:​1-6) Wakutumika Paulo nayu wangukonkhoska ntharika yeniyi kuti Akhristu wosi wo aleka kulutirizga kuja ndi chivwanu ‘azamudumulika.’​—Aroma 11:17-​22.

•   Akhristu alamulika kuti atenere ‘kulutirizga kuja masu.’ (Mateyu 24:42; 25:13) Wosi wo agona mwauzimu kaya mwakuchita ‘ntchitu za mdima’ pamwenga mwakuleka kuchita vosi vo Yesu wakuŵalamula kuti achitengi, azamutaskika cha.​—Aroma 13:11-​13; Chivumbuzi 3:​1-3.

•   Malemba nganandi ngalongo kuti wosi wo alutirizgengi kukunthiyapu mpaka pakumaliya, ndiwu azamutaskika. (Mateyu 24:13; Aheberi 10:36; 12:​2, 3; Chivumbuzi 2:​10) Akhristu a mu nyengu ya akutumika angukondwa ukongwa ŵati ŵavwa kuti Akhristu anyawu akunthiyangapu masuzgu chifukwa cha chivwanu chawu. (1 Atesalonika 1:​2, 3; 3 Yohane 3, 4) Mwaviyo, asani ŵanthu anyaki angutaskika chinanga kuti angukunthiyapu cha, ndikuti vo Bayibolu likamba kuti tikunthiyengepu kuti tizitaskiki vatingi vijengi vambula kuvwika.

•   Pa nyengu yo wakutumika Paulo wenga pafupi kufwa, wangusimikiza kuti iyu wazamutaskika nadi. (2 Timote 4:​6-8) Kukwambiriya kwa umoyu waki, iyu wanguziŵa kuti asani wangachita vo liŵavu laki lakhumbanga watingi wazitaskikengi cha. Iyu wangulemba kuti: “Ndipuma liŵavu langu ndipu nditililongozga nge kapolu, kuti pavuli pakuti ndapharazgiya anyaki ini ndamweni ndileki kuja wambula kuzomerezeka.”​—1 Akorinto 9:​27; Afilipi 3:​12-​14.