•  Vo mutenere kuziŵa

•  Vo mungachita

•  Vo achinyamata anyinu akamba

•   Palivi mabwezi ngo ngaleka kuguŵiskana. Chifukwa chakuti te ambula kufikapu, munthu yo ticheza nayu pamwenga mubwezi widu wapamtima wangachita vinthu vinyaki pamwenga kulongoro mazu ngo ngangatiguŵiska. Mutenere kukumbuka kuti namwiso mwe ambula kufikapu. Kumbi yimwi mwechendaguŵiskepu munyinu chijaliyi?​—Yakobe 3:2.

•   Ntchipusu kuguŵa asani mucheza pa Intaneti. Mwakuyeruzgiyapu, munyamata munyaki zina laki David wangukamba kuti: “Asani ucheza pa Intaneti ndipu uwona kuti mubwezi waku waŵikapu vithuzi vo wachezanga ndi ŵanthu anyaki, ungayamba kujifumba kuti ntchifukwa wuli ini angundidaniyaku cha. Ndipu pavuli paki ungayamba kujiwona nge we mbuzi yawakawaka.”

•   Ziŵani mo mungamaliyana ndi masuzgu.

 Jifufuzeni. Bayibolu likamba kuti: “Ungakwiyanga liŵi cha, pakuti kukwiya kulongo uzereza.”​—Wakutaula 7:9.

 “Nyengu zinyaki uwamu asani pajumpha nyengu kuti unguguŵa ndi vinthu vakuti zii.”​—Alyssa.

 Ŵanaŵaniyani mafumbu yanga: Kumbi ndiguŵa waka ndi chechosi? Kumbi mungasulaku waka vo anyinu akunangiyani?​—Wakutaula 7:21, 22.

 Ŵanaŵaniyani umampha wakugowoke anyinu. Bayibolu likamba kuti: ‘Kuziŵaniza vo munthu wakunangiya, kuchitiska kuti uwoneki wakutowa.’​—Nthanthi 19:11.

 “Mbumampha kugowoka ndi mtima wosi chinanga kuti mungaŵa ndi chifukwa chakudandawuliya. Venivi ving’anamuwa kuti mukhumbika cha kumusungiya chakukhosi munthu yo wakunangiyani kweniso kumukambiya kuti wakupepeseni asani wakunangiyani. Asani mwagowoka, mungazivikumbusanga so cha.”​—Mallory.

 Ŵanaŵaniyani mafumbu yanga: Kumbi ndi nkhani yikulu nadi? Kumbi mungagowoka waka cha kuti mulutirizgi kuja mwachimangu?​—Akolose 3:13.

 Muŵanaŵaniyengi vakukhumba va munyinu. Bayibolu likamba kuti: “Mungaŵanaŵaniyanga vakukhumba vinu pe cha, kweni va ŵanthu anyaki so.”​—Afilipi 2:4.

 “Visuzga cha kumalana liŵi ndi masuzgu asani mutanjana kweniso asani mutumbikana pa ubwezi winu, chifukwa mosi muwona kuti ubwezi winu ngwakukhumbika ukongwa. Pajumpha nyengu yitali kuti mwaŵanthu muje pa ubwezi. Mwaviyo, mungayanja cha kuti ubwezi winu umali.”​—Nicole.

 Ŵanaŵaniyani fumbu ili: Kumbi mungawona vinthu vinyaki vo munyinu wachita umampha?​—Afilipi 2:3.

 Fundu yakukhumbika ukongwa: Kuziŵa vo mungachita asani munyinu wakuguŵiskani ndi lusu lo lingazikuwovyani asani mwakuwa. Sambirani lusu lenili kweche sonu.