Kaŵi pa sabata, Akaboni aku Yehova achita maunganu ku malu ngawu ngakusopiyaku. Malu ngenanga ngaziŵika kuti Nyumba za Ufumu. Kumbi ndi vinthu wuli vo vichitika kwenuku? Nanga mungayanduwa wuli asani mungasanilika pa maunganu ngenanga?

•  Kumbi ndi vinthu wuli vo vichitika pa Nyumba ya Ufumu?

•  Ntchifukwa wuli mutenere kusanirika pa maunganu ngenanga?

•  Vo achinyamata anyinu akamba

 Ku Nyumba ya Ufumu ndiku Akaboni aku Yehova asambiriya vo Bayibolu lisambiza. Maunganu yanga ngangakuwovyani kuti:

•   musambiri uneneska wakukwaskana ndi Chiuta.

•   muvwisi vinthu vo vichitika mazuŵa nganu.

•   muje munthu wamampha.

•   musaniyi mabwezi ngamampha.

 Kumbi muziŵa? Malu ngakusopiyamu nga Akaboni aku Yehova ngaziŵika kuti Nyumba ya Ufumu. Malu yanga ngaziŵika ndi zina ili chifukwa kwenuku ndiku asambiriya vakukwaskana ndi Ufumu waku Chiuta.​—Mateyu 6:9, 10; 24:14; Luka 4:43.

 Ndiku mungasambira vinthu vo vingakuwovyani. Fundu za mu Bayibolu zo Akaboni aku Yehova akambiskana pa maunganu ngawu zingakuwovyani kuti ‘musaniyi zeru.’ (Nthanthi 4:5) Venivi vilongo kuti Bayibolu lingakuwovyani kuti musankhengi umampha vinthu paumoyu. Lingakuwovyani so kuti musaniyi kwamuka kwa mafumbu ngakukhumbika ukongwa, nge ngakuti:

•   Ntchifukwa wuli te ndi umoyu?

•   Kumbi Chiuta ndiyu wachitiska masuzgu ngo tikumana nangu?

•   Ntchinthu wuli chichitika asani munthu wafwa?

 Mumphata umu mwe mitu yimanavi waka ya nkhani zo zikambika pa maunganu ngo ngachitika kukumaliya kwa sabata:

•   Ntchifukwa Wuli Titenere Kulongozgeka ndi Bayibolu?

•   Kumbi ndi Nunkhu ko Mungasaniya Chovyu Panyengu ya Masuzgu?

•   Vo Ufumu Waku Chiuta Utitichitiya Sonu.

 “Zuŵa linyaki, munyangu yo ndisambira nayu sukulu wanguza ku maunganu ngidu. Wangujaliya limoza ndi banja lidu, ndipu taŵerengiyanga nayu limoza mabuku. Pakumaliya pa maunganu, iyu wangundikambiya kuti wanguchiskika ukongwa ndi ndemanga zo ŵanthu amukanga. Wangukamba so kuti ku tchalitchi kwawu alivi mabuku ngakusambiriya Bayibolu nge mo tichitiya isi.”​—Brenda.

 Kumbi muziŵa? Maunganu ngosi ngawezi ku Nyumba ya Ufumu kweniso kulivi mbali ya mpasku.

 Ŵanthu wo mwamucheza nawu akukuchiskani. Bayibolu likamba kuti Akhristu akhumbika kuwungana pamoza kuti ‘achiskanengi.’ (Aheberi 10:24, 25) Ku maunganu yanga, mwamuchiskika ukongwa chifukwa mwamucheza ndi ŵanthu wo aŵanaŵaniya ukongwa vo Chiuta wakhumba. Yiwu aŵanaŵaniya so ukongwa vakukhumba va anyawu mumalu mwa vakukhumba vawu. Ivi vakusoŵa ukongwa mazuŵa nganu chifukwa ŵanthu anandi aŵanaŵaniya waka vawu pe.

 “Ndivuka ukongwa asani ndagwira ntchitu zuŵa losi lamphumphu. Kweni ndituvwa umampha asani ndaluta ku Nyumba ya Ufumu chifukwa ndicheza ndi abali ndi azichi. Asani ndiwe ku Nyumba ya Ufumu, ndikondwa ndipu ndisaniya so nthazi zakugwiriya ntchitu zuŵa lakulondopu.”​—Elisa.

 Kumbi muziwa? Pacharu chosi chapasi pe mipingu yakujumpha 120,000 ya Akaboni aku Yehova, ndipu awungana mumalu ngakujumpha 60,000. Pa avereji, Nyumba za Ufumu pafufupi 1,500 zizengeka chaka chechosi kuti ŵanthu aje ndi malu ngakukwana ngakuwunganamu. a