Julani

Mzichi Valentina Suvorova ndi mulumu waki Vladimir

MARCH 9, 2021
RUSSIA

Mzichi wa Vyaka 73 Angamuyeruzga Kuti Ngwakunanga Chifukwa cha vo Wagomezga

Mzichi wa Vyaka 73 Angamuyeruzga Kuti Ngwakunanga Chifukwa cha vo Wagomezga

Nyengu yo Khoti Liyeruzgiyengi Mulandu

Pambulla kuswera yapa Khoti la muchigaŵa cha Metallurgichesky liperekengi cheruzgu chaki pa mulandu wa Mzichi Valentina Suvorova. * Loya wa boma wechendakambi cheruzgu cho wakhumba kuti mzichi uyu wapaskiki.

Vakukwaskana ndi Munthu Uyu

Valentina Suvorova

  • Chaka cho Wakuwiya: 1948 (Ku Sorovskoye, muchigaŵa cha Kurgan)

  • Mo Wakukuliya: Wakuleka ntchitu ya usambizi pa sukulu yo yisambiza kumba mutawuni ya Chelyabinsk. Wangugwira ntchitu iyi kwa vyaka vakujumpha 30. Watanja kulima, kuvina ndipuso kuvwisiya sumu

    Wakutolana ndi Vladimir mu 1973. Mwana wawu munthulumi zina laki, Igor, wakutayika vyaka vo vajumpha chifukwa cha matenda nga kansa. Anyina ndi mubali waki atayika pambula kuswera yapa

Vo Vinguchitika Kuti Wambiki Mulandu

Pa 26 March 2019, apolisi wo anyamuwa futi angufufuza nyumba zakujumpha 20 za abali ŵidu ku Chelyabinsk ndi ku Yemanzhelinsk. Ŵati amufufuza kwa nyengu yitali, pa 5 December 2019, Mzichi Valentina, yo pasonu panu we ndi vyaka 73 angumuyeruzga kuti ngwakunanga chifukwa chakuti waŵerenganga Bayibolu ndipuso kukambiyaku anyaki vo wagomezga. Pasonu panu akumukaniza kuti wangutuwangamu cha mu charu cho waja. Vladimir nayu angamuyeruzga kuti we ndi mulandu chifukwa cha vo wagomezga.

Iyu wakumbuka vo vingumuchitikiya apolisi wo wenga ndi futi ŵati ayamba kufufuza munyumba yawu yiwu ŵeche mutulu. Mzichi uyu wangukamba kuti: “Tingusamba cha, kupesa sisi lidu pamwenga kuvwala malaya ngakwenere. Vinthu venga umampha cha. Apolisi yaŵa angwamba kufufuza peposi, mumakabati, mo tisunga ndolu ndi vakupode, mukawaleti ndipuso mumathumba nga vakuvwala. . . . Angufufuza so chinanga ndi mu mapotu, mumaketani ndi pakugona pidu viyo. Tingakamba waka kuti angufufuza peposi.”

Chifukwa chakuti ngwakukota ndipuso we ndi masuzgu nganyaki muliwavu, mzichi Valentina wafipanga mtima kuti panyaki kutombozgeka kungananga umoyu waki.

Valentina wangukonkhoska kuti kuŵerenga Bayibolu nyengu zosi kwamuwovya kuti walutirizgi kuja wakugomezgeka. Iyu wangukamba kuti: “Kuchita lemba la zuŵa, kuŵanaŵaniyapu pa vo ndaŵerenga ndipuso kuvigwiriskiya ntchitu, kwandiwovya kuti ndikunthiyepu mayeseru ngosi ngenanga.”

Valentina wangukamba so kuti kunozgeke maunganu ndi kusanilikapu, kusambira pakuwija ndipuso kuchita kusopa kwa pa banja nkhwakukhumbika ukongwa kuti munthu ukunthiyepu masuzgu nge yanga. Iyu wanguti: “Pa nyengu yeyosi yo ndaluta ku maunganu, ndisambira fundu yasonu ndipu nditesesa kuyigwiriskiya ntchitu.” Wangulutirizga kukamba kuti mapempheru ngatimuwovya ukongwa. Iyu wanguti: “Nyengu zosi nditimuwonga Chiuta chifukwa watindiwovya.”

Kusazgiyapu yapa, Valentina wakumbuka kweniso kukumbusa Akhristu anyaki fundu yakuti: “Palivi chifukwa chakuchitiya mantha ndi chinthu chechosi. Lutirizgani kuja ndi chivwanu chakukho ndipu mukumbukengi lemba la Mateyu 6:33 ndi 2 Akorinto 1:3, 4.”

Wenuwu mbukaboni wakuti abali ndi azichi ŵidu ku Russia, kusazgapu Valentina ndi Vladimir alondo fundu ya pa Salimo 64:10 yakuti: “Munthu murunji wakondwengi mwaku Yehova kweniso wabisamengi mwaku iyu; ŵanthu wosi akunyoloka mtima akondwengi.”

^ ndimi 3 Ndi nyengu zosi cha po akambiya limu zuŵa lo khoti liyeruzgiyengi mulandu.