Julani

Mubali Anatoliy Vilitkevich ndi muwolu waki Alyona

APRIL 7, 2021
RUSSIA

Mubali Anatoliy Vilitkevich Walutirizga Kuja Wakukho po Walindizga vo Khoti Liyeruzgengi

Mubali Anatoliy Vilitkevich Walutirizga Kuja Wakukho po Walindizga vo Khoti Liyeruzgengi

Nyengu yo Khoti Liyeruzgiyengi Mulandu

Pambula kuswera yapa, khoti la Leninskiy lo le muchigaŵa cha Ufa liperekengi cheruzgu chaki pa mulandu wa Mubali Anatoliy Vilitkevich. * Loya wa boma wechendakambi cheruzgu cho wakhumba kuti mubali uyu wapaskiki.

Vakukwaskana ndi Munthu Uyu

Anatoliy Vilitkevich

  • Chaka cho Wakuwiya: 1986 (Muchigaŵa cha Khabarovsk)

  • Mo Wakukuliya: Wagwira ntchitu ya ukalipentala. Wakutolana ndi Alyona mu 2008. Yiwu atanja kugona ko aluta kuchiwona malu ndipuso atanja kukwera mapiri

    Weche wachinyamata, apapi ŵaki angumuwovya kuti wayanjengi Mlengi. Iyu watanja layizgu lakuti zuŵa linyaki, ŵanthu ndi vinyama azamuja mwachimangu. Wakubatizika mu 1997 we ndi vyaka 11

Vo Vinguchitika Kuti Wambiki Mulandu

Pa 8 August 2018, Mubali Anatoliy Vilitkevich wakuŵikika mu gulu la ŵanthu wo atiŵaŵanaŵaniya kuti achita vinthu va uchigeŵenga. Limoza ndi Mubali Dennis Christensen, Anatoliy wenga yumoza mwa Akaboni akwamba wo anguŵajaliya mujeri kulindizgiya mulandu wawu kutuliya po Khoti Likulu Ukongwa ku Russia lingukaniziya ntchitu za Akaboni aku Yehova mu April 2017.

Akufufuza anguŵika mwakubisa makamera munyumba yaku Anatoliy ndi Alyona. Pavuli paki, angukamba kuti Anatoliy we ndi “mulandu” chifukwa chakuti wakambiskananga nkhani za mu Bayibolu ndi anyaki. Pasonu panu atimumba mulandu wakuti wachita vinthu vakukwaskana ndi gulu lo atilikamba kuti ndakofya.

Pa nyengu yo Anatoliy alutanga nayu ku polisi, yumoza mwa apolisi ŵenaŵa wangukambiya Alyona mwambula ulemu kuti “saniya munthulumi munyaki.” Anatoliy wangukamba kuti pa nyengu yo amufumbanga mafumbu vinthu venga umampha cha. Iyu wanguti: “Ndingusuzgika ukongwa maŵanaŵanu. Yiwu angundikambiya kuti asani ndilekengi kuzomereza mulandu wo atindimba, ndikuti muwolu wangu ndipuso ŵanthu wosi wo ŵenga munyumba mwangu panyengu yo tachitanga maunganu asuzgikengi ukongwa. Kanandi andikambiyanga kuti muwolu wangu nayu wazamufwiya mujeri. Pa nyengu yosi yeniyi, ndapempheranga kwaku Yehova ndipu ndamupemphanga kuti wandipaski chimangu cha mumtima.”

Anatoliy wanguja mujeri kwa myezi yakujumpha yiŵi wachilindiziya mulandu waki, kwa myezi pafufupi 9 wachigwira ukayidi wa panyumba kweniso kwakujumpha chaka ndi hafu angumukaniza kutuwa mucharu chaki. Pa nyengu yo wenga mujeri wangulemba mu notibuku yaki vakuwoniyapu va ŵanthu wo azumbulika mu Bayibolu wo nawu angutombozgekapu. Iyu wangukamba kuti: “Ndikumbuka kuti Yehova wanguŵavikiliya cha ku masuzgu ngo angukumana nangu kweni wanguŵaluwa cha. Fundu yeniyi yingundichiska ukongwa ndipu yingundisimikiziya kuti Yehova wandirwiyengi nkhondu. Kuja wakugomezgeka ndiku kwakukhumbika ukongwa.” Kalata yo muwolu waki wangumulembe nayu yingumuchiska ukongwa. Anatoliy wangukamba kuti: “Mukalata yinyaki pa makalata ngo wangwamba kundilembe, muwolu wangu Alyona wangunditumiziya vithuzi vinandi vo tingujambulisa ndi mabwezi ngidu ngakwanjiwa. Mazulu ngengosi ndawonanga vithuzi venivi ndipu ndayesesanga kukumbuka vinthu vinyaki vakuchiska vo vinguchitika pakati paku ini ndi ŵanthu wo ŵe pa chithuzi. Venivi vandiwovyanga kuti ndijivwengi nge kuti ndenawu pasina.”

Chakuwoniyapu chamampha chaku Anatoliy ndi Alyona pa nkhani yakuja akugomezgeka chititichiska ukongwa tosi. Tikondwa kuziŵa kuti abali ndi azichi ŵidu wosi ku Russia alutirizga kuja pa ubwezi wakukho ndi Yehova chinanga kuti atombozgeka. Ndipu titimuwonga ukongwa Yehova chifukwa wavwisiya mapempheru ngidu ngo titiŵapemphere abali ŵidu.—2 Akorinto 1:11.

^ ndimi 3 Ndi nyengu zosi cha po akambiya limu nyengu yo khoti liyeruzgiyengi mulandu.