Julani

Kutuwa kumazge kuluta kumaryi: Mubali Aleksey Berchuk ndi muwolu waki Anna; Mubali Dmitriy Golik ndi muwolu waki Kristina

MARCH 9, 2021
RUSSIA

Mubali Aleksey Berchuk ndi Dmitriy Golik ku Blagoveshchensk Angayeruzgika Kuti Mbakunanga

Mubali Aleksey Berchuk ndi Dmitriy Golik ku Blagoveshchensk Angayeruzgika Kuti Mbakunanga

Nyengu yo Khoti Liyeruzgiyengi Mulandu

Pambula kuswera yapa, Khoti la muchigaŵa cha Blagoveshchenskiy of the Amur liperekengi cheruzgu chaki pa mulandu wa Mubali Aleksey Berchuk ndi Dmitriy Golik. *

Vakukwaskana ndi Ŵanthu Yaŵa

Aleksey Berchuk

  • Chaka cho Wakuwiya: 1975 (Ku Kartaly, muchigaŵa cha Chelyabinsk)

  • Mo Wakukuliya: Wagwiranga ntchitu ya vakuzengazenga kweniso ya ukalipentala. Wangwamba kusambira Bayibolu mu vyaka va mu ma 1990. Wakuleka masaza nga chiwawa ndipu sonu watanja kutchaya bola ndi anyaki. Wakubatizika mu 1998. Wakutolana ndi Anna, mu 2008

Dmitriy Golik

  • Chaka cho Wakuwiya: 1987 (Ku Tokhoy, ku Republic of Buryatia)

  • Mo Wakukuliya: Wagwiranga ntchitu yakufwatuliya Chitchayinizi kuya muchineneru cha ku Russia. Watanja kunyamuwa maweti, kutchaya bola kweniso kumba gitala

    Banja laki losi lingwamba kusambira Bayibolu cha mu ma 1990. Wangubatizika mu 2002. Ŵati amukambiya kuti wasere usilikali wangukana, mumalu mwaki wangupempha kuti amupasi waka ntchitu yinyaki. Angumukambiya kuti wakagwirengi ntchitu yakuphwere ŵanthu akukota. Wakutolana ndi muwolu waki Kristina mu 2012. Wosi pamoza asambira Chingelezi ndi Chitchayinizi kuti apharazgiyengi ŵanthu anandi

Vo Vinguchitika Kuti Ambiki Mulandu

Kukwambiriya kwa chaka cha 2018, akumiya boma anguŵika mwakubisa kachipangizu ko kajambula mazu kweniso vidiyo mu nyumba ya Mubali Golik. Mu June 2018, gulu la apolisi la Federal Security Service (FSB) lingufufuza nyumba 7 za Akaboni aku Yehova ku Blagoveshchensk. Pavuli paki, Mubali Dmitriy Golik ndi Aleksey Berchuk anguŵajuliya mulandu. Yiwu atiŵamba mulandu wakuti achita vinthu vakofya.

Aleksey angumukambiya mwaliŵi cha kuti we ndi mulandu. Pa 21 January 2019, angumumanga ku malu ngakukwere ndegi nga Domodedovo ku Moscow. Mura wa gulu la FSB wanguchiperekeza Aleksey ku tawuni ya kwawu ndipu walutirizga kulondo ulongozgi wakuti wangatuwanga cha mucharu chaki.

Abali wosi ŵenaŵa angukamba kuti munthu ukhumbika kunozgeke limu kuti ungatombozgeka. Dmitriy wangukamba, “Mbumampha kulindizga vinthu vamampha kweni mukhumbika kunozgeke so limu kuti mungatombozgeka.” Iyu wangulutirizga kukamba kuti: “Mbuneneska kuti kunozgeke umampha kungundiwovya. Kweni kunozgeke mwauzimu ndiku kwenga kwakukhumbika ukongwa. Asani titombozgeka, mbumampha cha kujithemba pamwenga kuŵanaŵaniya mo tingajibisiya ku ŵanthu wo atititombozga, kweni chakukhumbika ukongwa nkhuja akugomezgeka kwaku Chiuta. Yesu nayu wakakhumbengi watingi wajibisengi kwa arwani ŵaki, kweni ndivu wanguchita cha. Nge akusambira aku Yesu, chilatu chidu nkhugwentha masuzgu cha, kweni kukunthiyapu mwachiganga.”

Aleksey wangukamba so kuti: “Kungaja kunanga kuŵanaŵana kuti: ‘Venivi vingandichitikiya cha.’ Viwoneke limu kuti Yehova wazomereza kuti venivi vichitikengi. Asani muziŵiya limu kuti mutombozgekengi ndipuso mwe ndi maŵanaŵanu ngakwenere, chiŵengi chipusu kwaku yimwi kukunthiyapu kweniso kuthemba Yehova asani venivi vayamba kukuchitikiyani.”

Tiziŵa kuti abali ndi azichi ŵidu ku Russia, kusazgiyapu Aleksey, Dmitriy, kweniso awolu ŵawu, alutilizgengi kuvwa nge mo wamasalimo wangukambiya kuti: “Awonani! Chiuta ndiyu watindiwovya; Yehova we ndi ŵanthu wo atindiwovya.”—Salimo 54:3, 4.

^ ndimi 3 Ndi nyengu zosi cha po akambiya limu nyengu yo khoti liperekiyengi cheruzgu