Julani

Mubali Sai Asher wakamba nkhani ya Chikumbusu

APRIL 21, 2021
MYANMAR

Mwambu wa Chikumbusu wa 2021—Myanmar

Nkhani ya Chikumbusu Yingukambika Kuziya pa Foni Chinanga Kuti Kwachitikanga Vivulupi

Mwambu wa Chikumbusu wa 2021—Myanmar

Kwambiya waka mu February 2021, ku Myanmar kwaja kuchichitika vivulupi. Mwakuti kwaja masabata ngamanavi kuti tichiti Chikumbusu cha nyifwa yaku Yesu, mumalu nganandi mucharu ichi ŵanthu angwamba kupumana. Venivi vinguchitiska kuti anandi mwa apharazgi 5,102 wo ŵe mucharu ichi asuzgiki ndi Intaneti. Mwaviyo, abali angugwiriskiya waka ntchitu foni kuti avwisiyi nkhani ya Chikumbusu.

Mutawuni yinyaki, pa zuŵa la Chikumbusu ŵanthu alasananga ndi futi. Asilikali angwamba kufufuza munyumba za ŵanthu kuti asaniyi wo achitanga vivulupi. Abali angupembuzgika ukongwa ndi mazu nga pa Yesaya 30:15 ngo ngakamba kuti: ‘jani mwakufwasa kweniso muthembengi Yehova.’ Pa nyengu ya Chikumbusu, weyosi wanguchitiya munyumba yaki, alongoronga pasipasi, magesi anguzimwisa. Venivi vinguwovya kuti achiti mwambu wa Chikumbusu kwambula suzgu yeyosi. Chinanga kuti kwenga vivulupi, kweni chiŵerengeru cha ŵanthu wo anguvwisiya nkhani ya Chikumbusu chingukwera ukongwa kuphara vyaka vosi vo vajumpha. Anandi anguvwisiya kuziya pa foni.

Ŵanthu 11,877 angusanirika pa Chikumbusu, chiŵerengeru ichi chingukwera ukongwa ndi 14 peresenti kuphara chiŵerengeru cha mu 2019.

Azichi ŵaŵi awonere nkhani ya Chikumbusu kuziya pa tabuleti. Avwisiya mazu kuziya pa sipika yikulu kuti ŵanthu anyaki avwisiyi umampha kuziya pa mafoni ngawu

Tigomezga kuti Ada ŵidu akuchanya, a Yehova Chiuta, akondwa asani awona kuti abali ŵidu akhumbisiska kulutirizga kuŵasopa chinanga kungaŵa vivulupi.—Nthanthi 27:11.