Julani

APRIL 7, 2021
CAMBODIA

Bayibolu la Charu Chifya Likutuzgika mu Chineneru cha Chikambodiya

Bayibolu la Charu Chifya Likutuzgika mu Chineneru cha Chikambodiya

Pa 3 April 2021, Bayibolu la Charu Chifya la Malemba Ngakupaturika lakuchita kusindikiza ndipuso lakuŵerenge pa vipangizu va mazuŵa nganu likutuzgika muchineneru cha Chikambodiya. Abali ndi azichi anguwonere pulogilamu yakuchita kujambula. Mubali Kenji Chichii, wa mu Komiti ya Nthambi ku Japan, * ndiyu wangutuzga Bayibolu lenili.

Ku Cambodia kwe ŵanthu pafufupi 16 miliyoni wo alongoro chineneru cha Chikambodiya. Ndipu kwe apharazgi akujumpha 1,100.

Mubali Masahiro Harada, wa mu Komiti ya Nthambi ku Japan wangukamba kuti: “Tigomezga kuti Bayibolu ili liwovyengi ŵanthu kuziŵa mijalidu yamampha yaku Chiuta nge chanju kweniso lisungu. Liwovyengi so ŵanthu anandi a mtima wamampha ku Cambodia kuti aje paubwezi ndi Yehova ndipuso kuti amuthamikengi.”

Ma timu ngaŵi nga akufwatuliya angugwira ntchitu yakufwatuliya Bayibolu lenili kwa vyaka vinayi. Mzichi yo wangugwiraku ntchitu iyi wangukamba kuti: Mu Bayibolu lasonu lenili mulivi mazu ngakali. Ndiswera cha kulivwisa ndipu vo ndiŵerenga vitindifika pa mtima. Mumtima ndituvwa nge mo munthu yo wangulemba Salimo 139:17 wavwiyanga. Iyu wangulemba kuti: ‘Mwaviyo kwaku ini, maŵanaŵanu nginu ngakuzirwa ukongwa!’”

Wakufwatuliya munyaki so wangukamba kuti: “Ndigomezga kuti asani abali ndi azichi aŵerenga Bayibolu lenili, ajengi paubwezi wakukho ndi Yehova. Liŵawovyengi kujivwa kuti Yehova watiŵayanja pa nyengu yo atijivwa kuti ŵe ŵija. Ajivwengi kuti mbakuvikilirika asani akumana ndi vinthu vakofya. Ajengi ndi chimangu asani ayamba kufipa mtima. Ndipu apembuzgikengi asani akumana ndi mayeseru.”

Tisimikiza kuti Bayibolu lenili liwovyengi ŵanthu anandi kuziŵa Mlengi wawu Mura, Yehova ndipu amuthamikengi kweniso kupereka unkhankhu wo iyu wakhumbika kulonde.—Chivumbuzi 4:11.

^ ndimi 2 Ofesi ya Nthambi ku Japan ndiyu yiwonere ntchitu ya ku Cambodia.