DECEMBER 3, 2024
UNITED KINGDOM
Malu Ngakusazgiyaku Ngakujambuliya Vinthu Vakuvwisiya Kweniso Mavidiyo ku Nthambi ya ku Britain Ngakwamba Kugwira Ntchitu
Pa 7 September, 2024, Timu Yakujambula Mavidiyo ku Britain (RVT) yingwamba kujambuliya mavidiyo mu malu ngasonu kweniso ngakulu ngakujambuliya ngo ngakusazgikiyaku ku nthambi ya Chelmsford, ku England. Malu ngasonu ngenanga nge ndi situdiyo yakujambuliyaku mavidiyo, situdiyo yakujambuliyaku vinthu vakuvwisiya, ndipuso malu ngakunozge vo vajambulika. Abali ndi azichi akujumpha 90 ndiwu angugwiraku ntchitu yakuzenga malu ngenanga.
Kuja ndi situdiyo yachiŵi yakujambuliyaku mavidiyo kuwovyengi kuti ntchitu ziŵi zigwirikengi pa nyengu yimoza. Kweni situdiyo yeyosi yakhumbikanga kupangika munthowa yakuti mulekengi kusere chiwawa. Kuti tifiski venivi, tingupanga plasitala kweniso tinguŵika vinthu vinyaki mukati ndi kubwalu kuti viwawa vilekengi kusere. Tinguyipanga so munthowa yakuti mukati muzizirengi kwenso mufundengi umampha ndipu pasi pangupangika munthowa yakuti asani munthu watenda mudinu ungavwikanga ukongwa cha.
Kwambiya pachanya kuzunguliya kumazge: Aŵika vinthu ku siling’i vo vitovya kuti chiwawa chileki kuvwika ukongwa mu situdiyo yakujambuliyamu mavidiyo. Apima utali wa chipangizu cha HVAC. Aŵika pulasitala ku vimati vakuserere ku situdiyo yakujambuliyaku vinthu vakuvwisiya
Mubali Paul Norton, wa mu Komiti ya Nthambi ku Britain wangukamba kuti: “Vakukondwesa ukongwa kuja ndi malu ngakusazgiyaku ngenanga. Ngawovyengi kuti Timu Yakujambula Mavidiyo (RVT) yijambulengi mavidiyo kweniso vinthu vakuvwisiya mwalusu ukongwa. Ndi mwaŵi ukulu ukongwa kuwovya ‘kapolu wakugomezgeka ndi wazeru’ po walutirizga kupereka chakurya chauzimu kwa abali ndi azichi pacharu chosi.”—Mateyu 24:45.
Munthu yo wajambula kweniso koshi agwira ntchitu limoza ndi mubali yo we mu situdiyo
Titiŵawonga ukongwa abali ndi azichi chifukwa cha phamphu lawu pa ntchitu yeniyi. Ndipu tigomezga kuti vinthu vo vititiwovya kulivwisa umampha Bayibolu vo vipangika ku malu ngenanga, vitiwovyengi kundere kufupi ukongwa ndi Yehova, Msambizi widu Mura, po tilutirizga kumuthamika.—Yesaya 30:20.