Pa 21 May 2025, Khoti Likulu Ukongwa ku Sri Lanka lingupereka cheruzgu chakukhumbika ukongwa cho chiwovyengi ŵanthu wosi kuti asopengi mwawanangwa. Pavuli pa vyaka 11 kutuliya po mulandu uwu ungwambiya, khoti ili linguyeruzga kuti apolisi angunangisa kumanga azichi ŵidu anayi chifukwa cha kugwiraku ntchitu yakupharazga. Cheruzgu ichi chiŵawovyengi ukongwa ŵanthu aku Yehova ku Sri Lanka. Chifukwa wuli tikamba venivi? Mwakuyeruzgiyapu, khoti likukonkhoska mwakuvwika umampha kuti mwakukoliyana ndi marangu nga ku Sri Lanka, Akaboni aku Yehova ŵe ndi wanangwa wakukambiyaku anyawu vakukwaskana ndi chivwanu chawu. Kusazgiyapu yapa, vo khoti lenili likukamba viwovyengi kuti ŵanthu muchigaŵa chosi chakumwera kwa Asia atumbikengi wanangwa wakusopa.

Mu October 2014, azichi anayi apharazganga mumuzi wa Kirama, kumwera kwa Sri Lanka. Mwamabuchibuchi kunguza chigulu chikulu cha ŵanthu ndipu chinguyukiya Akaboni ŵenaŵa. Apolisi ŵati ŵaza, mumalu mwakuti adikisi chigulu cha ŵanthu, yiwu angumanga azichi anayi ŵenaŵa chinanga kuti pengavi chechosi cho angunanga. Chinanga kuti anguŵajuliya mulandu wewosi cha, azichi yaŵa anguŵajaliya mujeri ndipu anguŵaŵika mumaselu ngakupambana ngo mwengaso ŵanthu akofya. Kweni azichi ŵidu angulutirizga kuja akuzika kweniso apempheranga kwaku Yehova pa nyengu yakusuzga yeniyi. Zuŵa lakulondopu, azichi yaŵa angutuzgika.

Chifukwa chakuwona kuti anguŵaphwanyiya wanangwa wawu, azichi anayi yaŵa anguchimangala kukhoti. Kweni pati pajumpha mwezi umoza, mu November 2014, khoti limana linguyeruzga kuti palivi cho boma lingunanga ndipu lingujala mulandu uwu. Mwaviyo, Azichi yaŵa anguchimangala so ku Wupu Wakuwona va Wawanangwa wa Ŵanthu kweniso ku Khoti Likulu Ukongwa la ku Sri Lanka. Pakumaliya paki, mu May 2025, Khoti lingusaniya kuti arara aboma anguphwanya nadi wanangwa wa azichi ŵidu ndipu linguyeruzga so kuti boma limulipiri ndalama mzichi weyosi. Khoti Likulu Ukongwa lati layeruzga nkhani iyi, Mzichi Malkanthi wangukamba kuti: “Vo khoti lingukamba penapa vinguwovya waka isi tanayi pe cha. Kukamba uneneska, cheruzgu ichi chiwovyengi abali ndi azichi wosi ku Sri Lanka kuti asopengi mwawanangwa. Sonu ndipu ndisimikizga kuti vo Chiuta wakutilayizga pa Yesaya 54:17 vauneneska nadi. Pa lemba ili iyu wakutilayizga kuti ‘palivi chidya cho chapangikiya yiwi cho chazamuchita kanthu’!”

Tikondwe limoza ndi abali ndi azichi ŵidu ku Sri Lanka chifukwa cheruzgu cho khoti likupereka chikusimikizgiya kuti abali ku Sri Lanka ŵe ndi wanangwa ndipuso chikuŵawovya kuti ‘alutirizgi kuja ndi umoyu wachimangu ndipuso wakufwasa kuti ajiperekengi ukongwa kwaku Chiuta.’—1 Timote 2:2.