Julani

Mzichi Saron Ghebru, wati watuzgika mujeri pa 7 December, 2024

DECEMBER 30, 2024
ERITREA

Mzichi Saron Ghebru yo we ndi Nthumbu, Wakutuzgika Mujeri ku Eritrea

Mzichi Saron Ghebru yo we ndi Nthumbu, Wakutuzgika Mujeri ku Eritrea

Pa 7 December, 2024, Mzichi Saron Ghebru wakutuzgika mujeri la ku Mai Serwa ku Eritrea. Iyu we ndi nthumbu ya miyezi 9 ndipu wangabala nyengu yeyosi. Mwenuyu waŵengi mwana waki wakwamba. Saron ndi mlumu waki, Fitsum, ŵenga pagulu la ŵanthu akujumpha 20 wo angumangika mu mwezi wa September 2024, chifukwa chakusanirika pa maunganu nga Akaboni aku Yehova. Pa gulu lenili penga anthulumi, anthukazi kweniso ŵana.

Ntchachitima kuti pati pajumpha waka mwezi umoza, pa 1 November, 2024, achinyamata anayi wo Mbakaboni aku Yehova, angumangikiya kusukulu ŵati akana kuperekaku ndalama yakovye pa vakuchitika va ndali. Achinyamata ŵenaŵa ndi Mubali Zesani Biniam, Mubali Ebenezer Yonas, Mzichi Sidon kweniso Mzichi Horeb Tekeste. Pasonu panu, ŵe mujeri la ku Mai Serwa. Pa 2 November, mzichi wa vyaka 50 zina laki, Almaz Gebhrehiwot wakumangika chifukwa chakukana kusere chipani.

Achinyamata anayi kweniso mzichi wa vyaka 50 akumangika ndipuso kuŵikika mujeri ku Eritrea mu mwezi wa November 2024

Pasonu panu, ku Eritrea, kwe abali ndi azichi 68 wo ŵe mujeri. Abali ndi azichi pafufupi 10 wo akumangika mba vyaka vakujumpha 70, kusazgiyapu Mzichi Leterbrhan Tesfay yo we ndi vyaka 85. Mzichi waku Saron, zina laki Henok waja mujeri kwa vyaka pafufupi 20 sonu kwambula kuyeruzgika pamwenga kumbika mulandu. Abali ŵeche kulutirizga kuyesesa kuti abali ndi azichi ŵidu wosi ŵenaŵa atuzgiki mujeri.

Nge ŵanthu a banja limoza lauzimu, te akukondwa chifukwa chakutuzgika kwa mzichi widu Saron mujeri. Ndipu tipempha kuti Awusefwi akuchanya, Yehova alutirizgi kuŵapaska chiganga, nthazi kweniso zeru abali ndi azichi ŵidu akugomezgejka wo ŵeche mujeri ku Eritrea.—Salimo 91:1.