Julani

Abali ndi azichi akondwa kuwona malu ngatatu ku nthambi ya ku Canada ngo ngalongo mbiri ya Akaboni mu charu ichi

DECEMBER 9, 2024
CANADA

Malu Ngatatu Ngakuwonesiyaku Mbiri ya Akaboni aku Yehova Ngakwamba Kugwira Ntchitu ku Nthambi ya Canada

Malu Ngatatu Ngakuwonesiyaku Mbiri ya Akaboni aku Yehova Ngakwamba Kugwira Ntchitu ku Nthambi ya Canada

Mu 2024, Nthambi ya ku Canada yikujula malu ngakuwonesiyaku mbiri yakukwaskana ndi Bayibolu kweniso ntchitu ya Akaboni aku Yehova ku Canada. Malu ngaŵi ngalongo mo uthenga wa mu Bayibolu ungupharazgikiya mucharu cha Canada. Malu ngachitatu ngalongo mo akusambira Bayibolu pacharu chosi anguyengetulika, mayeseru ngo angukumana nangu kwambiya mu chaka cha 1914 mpaka 1919 ngati ngajumphapu.

Malu ngo ngaziŵika kuti “Ukweru wa Uneneska Uŵala Mucharu cha Canada,” ngatovya ŵanthu wo aza kuziwona malu kuziŵa mbiri ya Akaboni aku Yehova ya vyaka pafufupi 150 ku Canada. Malu ngenanga nge ndi vinthu vinyaki vo vilongo phamphu lo anthulumi kweniso anthukazi achiganga ŵenga nalu pakupharazga uthenga wa mu Bayibolu. Malu yangu ngalongo so vo vinguwovya Akaboni kuti apharazgiyengi ŵanthu amitundu yosi chinanga kuti kwenga sankhu ndipu afwatuliyanga mabuku ngo ngawovyanga ŵanthu anandi kusazgiyapu wo awonekanga kuti mbakumaliyapu.

Kusazgiyapu yapa, pamalu ngenanga palongoreka so vinthu vinyaki vo vinguwovya Akaboni kukunthiyapu mayeseru ngakofya, nge kumangika ndipuso kukanizgika kuchita chechosi chakukwaskana ndi kusopa. Kweniso palongoreka mbiri yakukondwesa kweniso yakukhumbika ukongwa yo yikonkhoska milandu yo Akaboni awinapu kuti avikiliyi wanangwa wawu wakupharazga kweniso kuwina milandu yinyaki yo yinguwovya ŵanthu wosi ku Canada kuja ndi wanangwa. Wati wayende malu ngosi ngatatu ngenanga, mubali munyaki wangukamba kuti: “Kuwona vithuzi kweniso kuziŵa vo abali ndi azichi angukumana navu pakusopa kwa uneneska ku Canada, kwandichiska ukongwa kuti nani ndiyezgi chiganga kweniso kukunthiyapu kwawu pa umoyu wangu.”

Malu ngo ngaziŵika kuti “Kulimbana ndi Akususka ku Quebec” ngalongo mayeseru ngo Akaboni aku Yehova angukumana nangu muchigaŵa cha Quebec mu vyaka va m’ma 1940 ndi m’ma 1950

Malu ngo ngaziŵika kuti “Mazu Ngaku Chiuta Widu Ngaŵengepu Mpaka Muyaya—Bayibolu ku Canada,” ngalongo Mabayibolu ngakupambanapambana ngo ngenga nga Akusambira Bayibolu akwambiriya, wo anguwovya kuti uthenga wamampha upharazgiki mucharu chosi cha Canada. Mabayibolu ngenanga ngaja ngachigwiriskikiya ntchitu ndi ŵanthu anandi ndipu ngawovya ukongwa kuti ŵanthu asambiri uneneska wa mu Bayibolu mu vineneru vinandi.

Pa malu yanga palongoreka so Mabayibolu nganandi ngo ŵanthu anyaki angufwatuliya ndipu venivi visunga mbiri ya ŵanthu a ku Canada. Mwakuyeruzgiyapu, palongoreka Bayibolu lo lingufwatulika ndi John Henry White ndipu pasonu panu liwoneka bweka cha. Bayibolu lenili lenga lakwamba kusindikizika mucharu cha Canada, ndipu ngo ngalipu pasonu panu ngajumpha cha 10. Malu yanga ngalongo so Mabayibolu ngakwambiriya ngo ngalongo phamphu lo ŵanthu anyaki ŵenga nalu kwa vyaka vinandi kuti afwatuliyi uthenga wa mu Bayibolu, mu vineneru vo ŵanthu anandi alongoro nge Chiinukitituti, Chimasachuseti, Chikamiki, Chimohoku, Chiojibwe, kweniso Chicree Chakuzambwi.

Chigaŵa cha malu ngo ngaziŵika kuti “Mazu Ngaku Chiuta Widu Ngaŵengepu Mpaka Muyaya—Bayibolu ku Canada,” chilongo Mabayibolu ngakupambanapambana mu vineneru vo ŵanthu alongoro ku Canada ndipuso vineneru vo ŵanthu akali ukongwa ku Canada alongoronga

Pakumaliya, pe malu nganyaki ngapade ngo ngaziŵika kuti “Anguchita Chiganga Ndipu Anguja Akugomezgeka pa Nyengu ya Mayeseru.” Malu yanga ngakonkhoska ntchitu kweniso chiganga cho Akusambira Bayibolu akwambiriya ŵenga nachu kukumaliya kwa vyaka va m’ma 1800. Kweniso malu yanga ngalongo masuzgu ngo angukumana nangu pa nyengu ya Nkhondu Yakwamba ya Pacharu Chosi mu 1914 ndipu yingulutiriya mpaka mu 1919. Malu yanga ngamaliza kulongo mo Akusambira Bayibolu akugomezgeka anguchisikiya ndi vo abali ndi azichi anyaki angukumana navu kweniso mo venivi vinguŵawovye kunozgeke kuzigwira ntchitu yo yenga panthazi pawu.

Malu ngo ngaziŵika kuti “Anguchita Chiganga Ndipu Anguja Akugomezgeka pa Nyengu ya Mayeseru,” ngalongo unandi wa abali ndi azichi wo angumangika chifukwa chakukana kusere usilikali pa nyengu ya Nkhondu Yakwamba ya Pacharu Chosi

Mubali Kevin Knaus, wa mu Komiti ya Nthambi ku Canada wangukamba kuti: “Malu ngatatu ngenanga ngalongo chihara chauzimu chakuzirwa ukongwa cha Akaboni aku Yehova ku Canada. Kweni kuphara vosi, ngasimikiziya uneneska wa mazu ngakuti “mazu ngaku Yehova ngaŵengeku mpaka muyaya” ndipu ngalongo mo Yehova walutirizgiya kuwovya kuti uthenga wamampha upharazgikiyi ku ŵanthu amitundu yosi.”—1 Peturo 1:25.